Po'unde-unde 115 - Wunta Mempori

Marambaa butu tia-Do Ue Ala 115:1-18

¹ Komba ndi omami, oo Ue, komba ndi omami, sine a nee-Miumo moikoano iwineeako marambaa, hangano pompehohawa-Miu, hangano petenunu-Miu!

² Tembio luwuno tongku asalakono ka dompotae, ”Isuake Ue Alado?”

³ Ondae Ue Alato kongko i suruga! Ondae weweuo hapa anu inehe-Do.

⁴ Luwuno lahumoado butu salaka ka wulaa, wineweuno kaeno mia,

⁵ hinao ngangano, sine nahi pokompepau, hinao matano, sine nahi pokompongkita,

⁶ hinao birino, sine nahi pokomporonge, hinao engeno, sine nahi pokompowoo,

⁷ hinao kaeno, sine nahi pokomperare, hinao karuno, sine nahi pokompelempa, ka nahi polio moluarako suarano a burokono.

⁸ Ondae anu meweweuo ira gagi mpengkena kanatuu, kanatuu koa mbo'u luwuno mia anu mpe'ala-alao.

⁹ Hei to Isaraeli, impe'ala-ala Iramo i Ue! — Ondaemo anu tumulungi ira ka kantado.

¹⁰ Hei sukuno i Haruni, impe'ala-ala Iramo i Ue! — Ondaemo anu tumulungi ira ka kantado.

¹¹ Hei luwuno mia anu doitoako Ira i Ue, impe'ala-ala Iramo i Ue! — Ondaemo anu tumulungi ira ka kantado.

¹² Dorambe kitamo i Ue; Ira rumonso kita, rumonsoo suku Isaraeli, rumonsoo sukuno i Haruni,

¹³ rumonso ira mia anu doitoako Ira i Ue, moiko anu kodei maupo anu langkai.

¹⁴ Po'ineeomo ka Dotiangio i Ue porokomu, porokomu ka inulemu.

¹⁵ Po'ineeomo ka Doronso komiu i Ue, anu mokogagio langi ka tolino.

¹⁶ Langi atuu langi-Do i Ue, tolino Doweeako ira anano mia.

¹⁷ Komba mia mate anu ta umunde-unde Ira i Ue, ka komba mbo'u luwuno mia metiiomo a mpo'ianga boni-boni,

¹⁸ sine ontaemo anu umunde-unde Ira i Ue, mompu'u kanandio-andio hawe nahina tampulaano. Haleluya!