Po'unde-unde 112 - Wunta Mempori

Urano mia mentee 112:1-10

¹ Haleluya! Me'uraomo mia anu doitoako Ira i Ue, anu tedoa ineheno a luwuno parenta-Do.

² Inuleno ira memoroso i tolino, inuleno mia mentee ta rinonso.

³ Arataa ka kaeaa hinao a laro rahano, poweweuno anu moiko nahi bali ranta nahina tampulaano.

⁴ A laro wongi-wongi saba mewine tiano mia mentee; onae me'aroa ka mompehohawa, ka moleo.

⁵ Me'uraomo mia anu me'aroa ka mompesaboako, anu weweuo urusano moleo,

⁶ onae nahi ta telelu ranta nahina tampulaano. Mia mentee ta rinambe nahina tampulaano,

⁷ onae nahi doitoakono lele mosa'o, aroano moroso, buke pompe'ala-alano ndi Ondae i Ue.

⁸ Aroano moroso, onae nahi ta doito, onaemo ka ipe'uru-uru ira iwalino.

⁹ Saru pe'aroano onae montia-tia a mia mongkokolaro; poweweuno anu moiko nahi bali ranta nahina tampulaano, tandu rosono pinoko'ondau a laro marambaa.

¹⁰ Mia mosa'o gauno kumitao, ka i'amba mahaki aroa, ipokingkio ngisino, ka i'amba gagi motewe aroa; po'eheno mia mosa'o gauno te'aro a matea.