Po'unde-unde 109 - Wunta Mempori

Pekakai mo'ema pombaloa 109:1-31

¹ Tiano petewawado anu mpenani. Penani po'unde-undeno i Daudi. Oo Ue Ala inunde-undeku, si po'inee aku!

² Hangano mia mosa'o gauno ka anu mompopo'oo menganga sumapoi aku, ondae mpopau pegaupi mongkona ongkue;

³ saru luwuno pau mpo'o'alia domengkadu aku ka mpeteaakune nahina pu'uno.

⁴ Gagi sulono pompehohawaku domentuluri aku, sine kongkoku mekakai.

⁵ Domensuloakono wineweu mosa'o ndi ongkue euno moikoa ka po'o'alia euno pompehohawaku.

⁶ ”Ipotoroakonomo asa mia mosa'o gauno, ka po'ineeomo asa mia anu motuntu mentade i koanano;

⁷ tewala binitara, po'ineeomo ipeluarako gagi mia anu sala, ka po'ineeomo pekakaino gagi hala.

⁸ Po'ineeomo tinuwuno ka imakura, po'ineeomo potorono i'alao mia susua.

⁹ Po'inee iramo anano nahina amado, ka kombiano gagi tuwu beine.

¹⁰ Po'inee iramo anano dompelakopi memarasai mpiha ka mpo'ema-ema, ka mpokare-karei inso a rawo-rawono rahado.

¹¹ Po'ineeomo anu monsinga pasua ka i'alangkorao luwuno anu pine'ueno, ka mia susua mpomuruo hasilino pe'iseino.

¹² Si hina mia anu kongko mehohawao, si hina mia anu mehohawa ira anano anu nami hina amado.

¹³ Po'ineeomo ka ipinokotampula inuleno, ka ipinahihi neeno a inule asa api lembuino.

¹⁴ Po'ineeomo salado uempu'uno rinorambe i aro-Do i Ue, ka si pinahihi halano ineno.

¹⁵ Po'ineeomo luwuno atuu Dowela mekokoongakono i Ue, ka ipinokotampula rambeado inso i tolino.

¹⁶ Hangano onae nahi perioo pompehohawa, ka butu molampui mia marasai ka mongkokolaro ka mia anu tedoa masusa aroano ka ipinepate.

¹⁷ Ikekewoio totonaa, onaemo ka itetotonaa; onae nahi behe ronso, onaemo ka i'olai ronso inso ndi onae.

¹⁸ Ipakeo totonaa kana lembano, onaemo ka isumoo pontotonaa kana uwoi a laro ngkoroino, kana lana a laro luwuno wukuno.

¹⁹ Po'ineeomo ndi onae totonaa atuu kana sangka anu pinokonano, kana peboo ntonga anu wela pinakeno.

²⁰ Po'ineeomo luwuno atuu inso ndi Ondae i Ue ka igagi tambono mia anu tumuluri aku, ka tambono mia anu mompau mosa'o mongkona ongkue.”

²¹ Sine Omiu, oo Ue Ala, Ueku, Ipehohawa akumo hangano nee-Miu, Ipotola akumo hangano pompehohawa-Miu anu langkai!

²² Hangano ongkue mongkokolaro ka marasai, ka tedoa ondalo mobelano aroaku;

²³ moliu aku kana eo-eo melaa, tinapisi aku kana kosume.

²⁴ Olontuuku mondidi-ndidi hangano puasa, ka koroiku gagi morungku, nami mentaba.

²⁵ Gagi akumo tataado; tempono domengkita aku, mebitu-bitu ulu ira.

²⁶ Itulungi akumo, oo Ue, Ue Alaku, Ikadudui akumo menunu saru pompehohawa-Miu,

²⁷ ka domento'orio, nine wineweunomo kae-Miu atuu, nine Omiumo, oo Ue, anu weweuo.

²⁸ Po'ineeomo dompototonaa, polo ka Iporonso; tewala mpentade ira, ira mempinokoko'ii, sine tetenaa-Miu ta mawongko.

²⁹ Po'ineeomo mia anu tumuluri aku ka ipesangkaako mokoko'iia, ka po'ineeomo dompelemba meloeako mokoko'ii.

³⁰ Tedoa aku montarimakasiako ngangaku ndi Ondae i Ue, aku umunde-unde Ira i tongano mia hadio.

³¹ Hangano Ondae mentade i koanano mia mongkokolaro Ira kumaduduio inso a mia anu humukuo.