Po'unde-unde 108 - Wunta Mempori

Pekakai tiano ponangia 108:1-14

¹ Penani. Penani po'unde-undeno i Daudi.

² Aroaku tetinda, oo Ue Ala, aku menani, aku menani mo'unde-unde. Pewangumo, hei sumangaku,

³ pewangumo, hei gambusu ka katapi, aku wanguo towea.

⁴ Aku montarimakasi ndi Omiu i olodo luwuno tongku, oo Ue, ka aku menani umunde-unde Komiu i olodo luwuno suku tongku;

⁵ hangano pompehohawa-Miu maluaopo sekono langi, ka petenunu-Miu hawe a laro nseru.

⁶ Ipopokitaomo langkaino pabawa-Miu i langi, oo Ue Ala, ka maramba-Miu i asa wawontolino.

⁷ Ka domentola mia anu kinekewoi-Miu, Ikaduduiakunemo kae ngkoana-Miu ka Isangki aku!

⁸ Ondae Ue Ala mepau Iramo a mpo'ianga mempori-Do, ”Saru pohio mpetea Aku tumia-tiao Sikemi, ka lembono Sukoti Aku sumongkao.

⁹ Ongkuemo me'ueo Gileadi, Ongkuemo me'ueo Manase, Eparai onaemo pelingono ulu-Ku, Yehuda onaemo tuko poparentaa-Ku,

¹⁰ Moabi onaemo pewo'ohia-Ku, ndi Edomi Kupetendeakono solopi-Ku, ka hangano Pelisitea Ongkue kokora-kora mo'unde.”

¹¹ Isemake anu ta wawa aku a ngkota anu mebente? Isemake anu tumaate aku lumako i Edomi?

¹² Kombake Omiu, oo Ue Ala, anu tumadi kamimo? Omiu nahi lako, oo Ue Ala, merongaako ira luwuno sorodadumami.

¹³ Itulungi kamimo umaropi ira iwali, hangano nahina tuduno pongkadudui inso a mia.

¹⁴ Saru Ondae Ue Ala kita meweweuo luwuno poweweu moroso ka mosia, hangano Ondae isa'a anu lumolanda ira iwalito.