Po'unde-unde 107 - Wunta Mempori

TIANO V: 107–150 Penani pontarimakasido mia anu tinolosi-Do i Ue

¹ Pontarimakasimo ndi Ondae i Ue, hangano me'aroa Ira! Menteeano ranta nahina tampulaano pompehohawa-Do.

² Po'ineeomo atuu domempauo mia anu tinolosi-Do i Ue, anu tinolosi-Do inso a mpabawa anu mompokoma'iso,

³ anu pinumpu-Do inso a luwuno wita susua, inso i sabaano oleo ka inso i sumooano oleo, inso i utara ka inso a ntahi.

⁴ Hinao ba'opia mia mpelakopi a mpada malua, pesalaa lumako a ngkota mpo'ianga nahi domehaweo;

⁵ memokoninggo ira ka memokoranga, sumangado telusa molema.

⁶ Onaemo ka dompeboo-boolimo ndi Ondae i Ue a laro pompema'isodo, ka Dopotola ira inso a masusaado.

⁷ Dowawa ira mentondao sala anu moleo, ranta hawe a ngkota po'ianga.

⁸ Po'ineeomo dompontarimakasi ndi Ondae i Ue hangano pompehohawa-Do, hangano luwuno wineweu-Do anu kinohali-haliako a luwuno anano mia,

⁹ hangano Dopotendeo sumanga anu mokoranga, ka sumanga anu mokoninggo Dopokomowohiakono moikoa.

¹⁰ Hinao ba'opia mia anu mentoro a laro worikidi ka wongi-wongi, te'uko a mpongu labu anu mobobarasai.

¹¹ Hangano dome'ewaio luwuno parenta-Do Ue Ala, ka mentatao songka-Do Anu Tedoa Mantande,

¹² Dopokompetuuduo aroado a laro masusaa, ntetidu ira, sine nahina anu montulungi.

¹³ Onaemo ka dompeboo-boolimo ndi Ondae i Ue a laro pompema'isodo, ka Dokadudui ira inso a masusado,

¹⁴ Dowawa ira mpeluarako inso a laro worikidi ka wongi-wongi, ka Dopuduo luwuno pongudo.

¹⁵ Po'ineeomo dompontarimakasi ndi Ondae i Ue hangano pompehohawa-Do, hangano luwuno wineweu-Do anu kinohali-haliako a luwuno anano mia,

¹⁶ hangano Dopeha ira pewowa mala, ka Dorawo-rawo ira lansono pewowa labu.

¹⁷ Hinao mia benge-benge anu marasai hangano halado, ka hangano luwuno salado;

¹⁸ domemokoburuakono luwuno kaanga ka mehawe iramo a mpewowa langkaino matea.

¹⁹ Onaemo ka dompeboolimo ndi Ondae i Ue a laro pompema'isodo, ka Dokadudui ira a laro masusado,

²⁰ Dopohaweo pau-Do ka mokotompa ira, motola ira inso a ngkekeno kaburu.

²¹ Po'ineeomo dompontarimakasi ndi Ondae i Ue hangano pompehohawa-Do, hangano luwuno wineweu-Do anu kinohali-haliako a luwuno anano mia.

²² Po'ineeomo dompopesombaako pesomba pontarimakasi, ka paleleo luwuno inangga-Do saru mengkokora-kora memawongko!

²³ Hinao ba'opia mia anu lumako sumakio tahi saru ba'opia kapala, anu mpebalu-balu a ntahi malua;

²⁴ domengkitao luwuno inangga-Do i Ue, ka luwuno wineweu-Do anu kinohali-haliako a ondaloano.

²⁵ Ondae mepau, ka i'amba mepuuriomo angi mokora anu mokolangkaio bombano tahi malua.

²⁶ Ondae mentinande hawe i langi ka mempinepasiako a ondaloano tahi, aroado doito hangano masolaa atuu;

²⁷ mokolili uludo ka kobangku-bangku kana mia molangu, ranta nami domponto'ori hapa dompoweweu.

²⁸ Onaemo ka dompeboo-boolimo ndi Ondae i Ue a laro pompema'isodo, ka Doluarako ira inso a masusaado,

²⁹ angi mokora atuu Doweweuomo temonto, onaemo ka ipenaa-naamo mebomba.

³⁰ Mpo'unde ira, hangano luwuno roodo, ka Dotaate ira a ntiima anu tinunggaido.

³¹ Po'ineeomo dompontarimakasi ndi Ondae i Ue hangano pompehohawa-Do, hangano luwuno wineweu-Do anu kinohali-haliako a luwuno anano mia.

³² Po'ineeomo dome'unde-unde Ira a laro tepumpuano bawaa, ka umunde-unde Ira a laro majelisi mempinemota'u.

³³ Doweweu ira korono gagi pada one, ka mata uwoi gagi wita mokari,

³⁴ wita anu mewalo gagi pada mopa'i, hangano mia anu mpo'iangario mpoweweu anu mosa'o.

³⁵ Doweweuo pada one gagi limbo, ka wita motu'i gagi mata uwoi.

³⁶ Donaa ira i ra'ai mia anu hieno memokoninggo, ka dompowangu kota po'ianga,

³⁷ mporawoakono wuku mpinopaho a luwuno lere ka weweu ira lere anggoro, anu hadio ntu'u hasilino.

³⁸ Doronso ira onaemo ka dontetiangi hadio ntu'u, ka luwuno pinotuwudo Doweweuo nahi makura.

³⁹ Sine lembuino ondae gagi memakura ka mpe'i'isei hangano pompokonsii ka masusa.

⁴⁰ Do'uwuo pompokongkodei a luwuno mia pinemota'u, ka Doweweu ira mpelakopi a mpada malua anu nahina pesalaa;

⁴¹ sine mia mongkokolaro Dotandeo inso a marasai, ka Doweweuo sukudo kana hadiono bawaano bimba.

⁴² Luwuno mia mentee mengkitao, ka do'amba memawongko, sine luwuno molengkua mpekomu.

⁴³ Isema anu hinao ponto'orino anu mentee? Po'ineeomo ka ipe'ini a luwuno atuu, ka mekokoongakono luwuno pompehohawa-Do i Ue.