Po'unde-unde 106 - Wunta Mempori

Pompehohawa-Do Ue Ala ka moteano aroado to Isaraeli

¹ Haleluya! Pontarimakasimo ndi Ondae i Ue, hangano moiko Ira! Menteeano ranta nahina tampulaano pompehohawa-Do.

² Isemake anu polio pauo moroso-Do i Ue, moporongeo luwuno po'unde-unde ndi Ondae?

³ Me'ura iramo mia anu mpe'ini a songka, anu meweweuo moleoa a luwuno tempo!

⁴ Irambe akumo, oo Ue, tewala Ipehohawa ira bawaa-Miu, Iperio akumo, tewala Ikadudui ira,

⁵ ka kukitao moiko-Miu a luwuno mia bininiki, ka mawongko a laro mawongkodo bawaa-Miu, saru mo'unde meronga mia-Miu.

⁶ Omami ka uempu'umami mpoweweu kamimo hala, mensala kamimo, mpoweweu kamimo gau mosa'o.

⁷ Uempu'umami i Masiri nahi dompokonto'orio luwuno wineweu-Miu anu kinohali-haliako, nahi domerambeo hadio ntu'u pompehohawa-Miu, tendeano ondae me'ewa i wiwi ntahi, i wiwi Ntahi Teberau.

⁸ Sine, Dokadudui ira a nee-Do, Ira mopoto'orio roso-Do.

⁹ Dowuraraio Tahi Teberau, onaemo ka imo'are, Dowawa ira mpelempa telalo a ondaloano tahi kana molalo pada one.

¹⁰ Kanatuumo Dokadudui ira inso a ngkaeno anu mo'o'aliaako, tumolosi ira inso a ngkaedo iwali;

¹¹ uwoi tumutuwi ira luwuno iwalido, ranta nahina maupo te'asa mia anu tuwu inso ndi ondae.

¹² Tempo atuu mpompe'ala-ala iramo a luwuno pau-Do, ka mpenaniako po'unde-unde ndi Ondae.

¹³ Sine, sarai koa ka domengkolupeo luwuno wineweu-Do, ka nahi domponsikori pontiso-Do;

¹⁴ memodoko ira ntu'u i pada one, ka umara-arahako Ira Ue Ala a mpada malua.

¹⁵ Doweeako ira hapa anu inemado, sine Ondae mompotii haki magasi ipesaki i olodo.

¹⁶ Domemosiriakono i Musa a mpekemaa, ka ndi Haruni, mia mempori-Do i Ue.

¹⁷ Tolino menganga ka tumeleo i Datani, tumutuwio gerombolano i Abirami.

¹⁸ Api melanga a mpenggowoado, langano api mokomo'aio luwuno mia mosa'o gauno atuu.

¹⁹ Mpoweweu ira ana nsapi i Horebi, ka mpenggolontu mpesomba a ntinaha tinawa;

²⁰ Ue Alado anu maramba domentobosiakono lahumoa sapi lakino anu mongkaa ewo.

²¹ Domengkolupe Ira Ue Ala anu kumadudui iramo, anu mokomengkaaomo langkaino pabawa-Do i Masiri:

²² luwuno wineweu anu kinohali-haliako i wita Hama, luwuno wineweu anu mongkokongiri i wiwi Ntahi Teberau.

²³ Onaemo ka Dopepau mingki rumopu ira, ande-andeno i Musa, mia bininiki-Do, nahi gagi wala i aro-Do, anu umonsoio mosa'ono aroa-Do rumopu ira.

²⁴ Nahi domentarimao wita anu tekosi atuu, nahi dompe'ala-alao pau-Do.

²⁵ Mpewuruki ira a ngkemado, ka nahi domperorongeakono pau-Do.

²⁶ Ka i'amba mesumpa Iramo saru tumandeo kae-Do ka Dopepate ira i pada one,

²⁷ ka sumiarawo ira inuledo i olodo tongku, ka rumawo-rawo ira a witado mia susua.

²⁸ Ondae mpe'ini moroso a Ba'ala Peori, ka mengkaano luwuno pesomba sinumbeleako mia mate.

²⁹ Aroa-Do dompokomahakiakono wineweudo, ka haweomo pohuku i olodo.

³⁰ Sine i Pinehasi mentade gagi po'oloti, onaemo ka ipenaa-naa pohuku atuu.

³¹ Onaemo ka Dorekeo Ue Ala mongkona atuu ndi ondae kana menteea mapa'api-api inule, ranta nahina tampulaano.

³² Dompokotekuda Ira umpeda uwoi Meriba, onaemo ka ikonao masolaa i Musa hangano ondae;

³³ hangano dome'ewaio Penaa-Do, onaemo ka ipepauki i Musa.

³⁴ Nahi domeropu ira luwuno tongku, kana anu Doparentaako ira i Ue,

³⁵ tendeano dompesaloako ira luwuno tongku, ka mentondao luwuno wineweudo.

³⁶ Ondae mpesomba a lahumoado luwuno tongku, anu gagi pete'umalaado.

³⁷ Ondae mpesombaakono nana'ote ntamado ka nana'ote beinedo a luwuno penaa mosa'o,

³⁸ ka mpo'uwu reano mia anu nahina salano, reano nana'ote ntama ka nana'ote beinedo, anu pinesombaakodo a luwuno lahumoado to Kana'a, onaemo pu'uno wita atuu ka itesosa'ai hangano pasua rea.

³⁹ Koroido domengkokoburutiakono hapa anu wineweudo, ka mpososaboako luwuno wineweudo.

⁴⁰ Onaemo ka itensila tekuda-Do i Ue a bawaa-Do, ka Domokoburuako ira mia-Do.

⁴¹ Dopeweengako iramo a ngkaedo luwuno tongku, ranta luwuno mia anu umo'aliaako ira pabawai ira.

⁴² Ondae dompokonsii ira iwalido, onaemo ka dompetenunu i totono pabawado.

⁴³ Mararu Dopotola ira, sine saru luwuno sinongkado kongkodo umewai Ira, mentoondu ira a laro salado.

⁴⁴ Sine, Doperioo masusa-Do, tempono Dorongeo peboolido.

⁴⁵ Dorambeo pedandia-Do saru ondae ka Dopehohawa ira menunu saru langkaino pompehohawa-Do.

⁴⁶ Doweweu ira mpohawe pompehohawa inso a luwuno mia anu tumawa ira.

⁴⁷ Ikadudui kamimo, oo Ue, Ue Alamami, ka Ipumpu kamimo inso i olodo luwuno tongku, ka kimpontarimakasi a nee-Miu anu mempori, ka memawongko a laro mpo'unde-unde ndi Omiu.

⁴⁸ Unde-unde Iramo i Ue, Ue Alado to Isaraeli, inso nahina tampulaano hawe nahina tampulaano, ka po'ineeomo luwuno bawaa mpotae, ”Ami!” Haleluya!