Po'unde-unde 105 - Wunta Mempori

Po'unde-unde a wineweu-Do Ue Ala a ntutuluno amba-ambano bawaa-Do 105:1-45

¹ Pontarimakasimo ndi Ondae i Ue, pebooliakonomo nee-Do, popoto'oriomo wineweu-Do i olodo luwuno tongku!

² Penanimo tia-Do, penaniakomo po'unde-unde tia-Do, popauomo luwuno wineweu-Do anu kinohali-haliako!

³ Mawongkomo i larono nee-Do anu mempori, po'ineeomo ka imawongko aroado mia anu umungke Ira i Ue!

⁴ Ungke Iramo i Ue ka roso-Do, ungkeomo mpiha rupa-Do!

⁵ Rambeomo luwuno poweweu kinohali-haliako anu wineweu-Do, luwuno wineweu-Do anu kinohali-haliako ka pomputusi-Do anu pinau-Do,

⁶ hei inuleno i Burahima, tetenaa-Do, hei luwuno anano i Yako, luwuno mia bininiki-Do!

⁷ Ondaemo i Ue, Ue Alato, i asa wawontolino pinake pomputusi-Do.

⁸ Pedandia-Do Dorambeo ranta nahina tampulaano, pau anu pinakosi-Do tiano asa nsowu api inule,

⁹ pedandia anu winutu-Do saru i Burahima, ka sumpa-Do ndi Saki,

¹⁰ anu pinokoroso-Do gagi pompakosi tiano i Yako, gagi pedandia nahina tampulaano tiado to Isaraeli,

¹¹ ”Ndi omue Aku meweengakono wita Kana'a, gagi tia pusaka anu tinantui tiamu.”

¹² Tempono porokodo nahi te'opia, asa bawaa mia hawe i wita atuu,

¹³ ka mpelakopi inso a tongku melako a tongku, inso a asa poparentaa melako a nsuku tongku susua,

¹⁴ nahi Dopo'ineeo maupo te'asa mia mokonsii ira, ka mopoto'oriako ira luwuno mokole hangano ondae,

¹⁵ ”Si sosanggelo ira mia anu inurapi-Ku, ka si mpoweweu mosa'o a luwuno nabi-Ku!”

¹⁶ Tempono Dopompotii mokoninggoa i wita atuu, ka sumolangio luwuno pepatinda kaanga,

¹⁷ Dotenao asa mia mese'elungi ira. I Yusupu inasa gagi ata.

¹⁸ Karuno domempangaakono rante, we'uno mewinso a laro enu-enu labu,

¹⁹ hawe tempo pauno te'ihii, ka dandi-Do i Ue mokomenteeo.

²⁰ Mokole metena motolao, anu pabawa a luwuno tongku mpotolao.

²¹ Onae pinokogagi pe'uea a langkanaeno, anu pabawaio luwuno arataano,

²² ka ipoweeako ira pontiso a luwuno anu langkai potorodo montonda pandeno mosongka ka paguruako ira ponto'ori anu mentee a luwuno mia memota'uno.

²³ Kanatuumo to Isaraeli dome'aiwa i Masiri, i Yako mo'ia gagi mia hawe i wita Hama.

²⁴ Ondae i Ue weweu ira bawaa-Do tedoa nte'ule, ka mokogagi ira moroso irapo sekono luwuno iwalido;

²⁵ Dobalio aroado ka do'o'aliaako ira bawaa-Do, ka dompopo'oo ira tetenaa-Do.

²⁶ Dotenao i Musa, tetenaa-Do ka i Haruni anu Dobinikiomo;

²⁷ orua ira mokohinao luwuno petondoni-Do i olodo, ka luwuno anu kinohali-haliako i wita Hama:

²⁸ Dotenao wongi-wongi onaemo ka igagi wongi mpusu. Sine kongkodo koa me'ewaio pau-Do.

²⁹ Dobalio uwoido gagi rea, ka dopepate ira boudo.

³⁰ Hadio tumpa mpenggowo i witado, maupo a luwuno bolongkono mokoledo;

³¹ Mepau Ira, ka mehawe iramo lale uso, ka tiporo a luwuno witado;

³² euno usa Do'uwuo i wawodo usa seru baku, ka api anu kolanga-langa i witado;

³³ Dopobangku ira keu anggoro ka keu arado, Dopobangku ira luwu keu i witado;

³⁴ Mepau Ira, ka haweomo kosume, kosume anu mpelonso nahi pinokopau hadiono,

³⁵ anu kumaano luwuno pinopaho i witado, kumaano hasilino witado;

³⁶ Dopepate ira luwu ana akado i witado, wua amba-ambano inso a luwuno rosodo.

³⁷ Dotaate ira bawaa-Do mpeluarako mpowawa salaka ka wulaa, ka i olono sukudo nahina anu tetidu.

³⁸ Tempono dompeluarako, to Masiri mpo'unde, hangano i'alu ira doitoa a nto Isaraeli.

³⁹ Dowileo seru gagi boru, ka api ka ipokomewineo wongi.

⁴⁰ Montonda po'emado Dopotiio manu-manu puru, ka saru roti inso i langi Dopokomowohi ira.

⁴¹ Do'ungkahio torukuno watu, tepanaomo uwoi, ka i'amba waa kana korono a luwuno pada mokari;

⁴² hangano Dorambeo pau-Do anu mempori, ka i Burahima tetenaa-Do.

⁴³ Dotaate ira bawaa-Do mpeluarako saru mawongko ka luwuno mia bininiki-Do mengkokora-kora mpo'unde.

⁴⁴ Doweeako ira luwuno witado mperupa-rupa tongku, onaemo ka dompe'ueo hasilino pe'iseido luwuno suku tongku,

⁴⁵ ka domentondao mpiha pompakosi-Do, ka me'inio luwuno pompaguru-Do. Haleluya!