Po'unde-unde 104 - Wunta Mempori

Langkaino pabawa-Do i Ue a laro luwuno pinokogagi-Do 104:1-35

¹ Unde-unde Iramo i Ue, hei sumangaku! Omiu Ue, Ue Alaku, langkai ntu'u pabawa-Miu! Omiu mesangka pompelangkai ka marambaa,

² metutuwiako mewine kana sawu. Omiu wileo langi kana tenda,

³ montade ira bolongko-Miu a wawo uwoi i langi, Omiu mokogagi ira seru gagi pe'ulaa-Miu, ka melelu a wawo mpanino angi,

⁴ Omiu weweuo angi gagi tetenaa-Miu, ka api anu melanga gagi puu pompekakaako-Miu,

⁵ Omiu motakoo tolino a wawo empehino, onaemo ka nahi ta telelu ranta nahina tampulaano.

⁶ Tahi malua tumutuwio kana sangka; uwoi mewuatakoomo lumaloi ira torukuno.

⁷ Hangano pewurarai-Miu uwoi atuu molai, melulu tompa tinendeno inso a unino rundu-Miu,

⁸ mewuatako a ntorukuno, metii a lembono a mpo'ianga anu Ipakosiako ira.

⁹ Tida tinantui-Miu, nahi ira melaloo, nahi ira mpekule mentutuwio tolino.

¹⁰ Omiu weweuo mata uwoi bubulaka a luwuno lembono, korono uwoi waa i olono luwuno torukuno,

¹¹ mopo'inuo luwuno kondehora mo'ila, mokontendeo mokorangado kalide ntobu;

¹² umpeda ndi onae mpomua manu-manu i laro meene, me'u'uni inso i olodo lewe ngkeu.

¹³ Omiu mopo'inuo torukuno inso a luwuno bolongkono dunsi-Miu, tolino mowohiako wuano inangga-Miu.

¹⁴ Omiu motuwuo ewo tiano pinotuwu ka luwuno pinopaho ka dompete'umalao mia, ka ipehasiliako kaanga inso a laro wita,

¹⁵ anggoro anu mokonsanaao aroano mia, lana anu mokomewantao rupa, ka mperupa-rupa kaanga anu mokomadooo aroano mia.

¹⁶ Luwuno keu-Do i Ue gagi mowohi, luwuno keu arasi i Libano anu pinaho-Do,

¹⁷ po'iangado manu-manu mpeseno, manu-manu timba'u anu rahano a luwuno keu sanobari;

¹⁸ Luwuno torukuno ondau gagi po'iangano bembe ntobu, luwuno pongku watu gagi pewuniado tangkasi.

¹⁹ Wula Ipokogagiomo potantui tempo, mata'oleo ito'orio tempo sumooano.

²⁰ Tewala Ipotiio wongi-wongi, ka oleo mbo'u gagi woongi, tempono atuu dompompu'u mpelakopi luwuno kondehora ntobu.

²¹ Luwuno singa mongura mpengaoli mpo'ungke rangkamiado, ka mpotuntu kaangado inso ndi Ondae Ue Ala.

²² Tewala saba oleo, mpepumpu iramo luwu ka mpepombole a mpe'egoado.

²³ Ka i'amba meluarakoomo mia lumako a mpo'anggaano, a mpo'usahaano hawe ngkiniwia.

²⁴ Hadio ntu'u wineweu-Miu, oo Ue, luwuno Ipokogagiakono ponto'ori anu mentee, tolino bukeako pinokogagi-Miu.

²⁵ Kitaomo tahi atuu, langkai ka malua po'iangano, i tu'ai mpelelu, nahi pinokopau hadiono, luwuno kondehora kodei ka langkai.

²⁶ I tu'ai domesumomba luwuno kapala ka Lewiata anu Iweweuomo mepalindo i larono.

²⁷ Luwuno mensikori Komiu, ka domempinaka a tempono.

²⁸ Tewala Ipoweeako ira, domepumpuo; tewala Iwileo kae-Miu, memowohiako ira luwuno anu moiko.

²⁹ Tewala Iwunio rupa-Miu, ondae ntededengke; tewala I'alao penaado, ondae memate ka mpekule gagi pampawu.

³⁰ Tewala Itenao penaa-Miu, megagi ira, ka Ipokowo'ohuo wawontolino.

³¹ Po'ineeomo maramba-Do i Ue kongko mpiha ranta nahina tampulaano, po'ineeomo Domawongko i Ue hangano luwuno wineweu-Do!

³² Ondae anu mensiroio tolino onaemo ka ipondidi-ndidi, anu dumanggi ira torukuno onaemo ka ime'ahu.

³³ Aku menani tia-Do i Ue tempono kutuwu, aku menaniako po'unde-unde tia-Do Ue Alaku tempono da kukongko.

³⁴ Po'ineeomo wuano pinewowoloku mo'ahi iteronge ndi Ondae! Aku mo'unde hangano Ondae i Ue.

³⁵ Po'ineeomo ka ipingko mia tehala inso i wawontolino, ka po'ineeomo mia mosa'o gaudo nami hina mbo'u! Unde-unde Ira i Ue, hei sumangaku! Haleluya!