Po'unde-unde 103 - Wunta Mempori

Ondae i Ue me'aroa ka mompehohawa 103:1-22

¹ Inso ndi Daudi. Unde-unde Iramo i Ue, hei sumangaku! Unde-undeomo nee-Do anu mempori, hei tompaano aroaku!

² Unde-unde Iramo i Ue, hei sumangaku, ka si kolupeo luwuno moiko-Do!

³ Ondae anu umampunio luwuno salamu, anu mokotompao luwuno hakimu,

⁴ Ondae anu kumaduduio penaamu inso a aano kaburu, anu rumamba-ramba uluakomu pompehohawa ka pompowee,

⁵ Ondae anu mokontendeakono moikoa po'eheno aroamu, ranta tempo monguramu gagi wo'ohu kana rajawali.

⁶ Ondae i Ue anu mokorosoo moleoa ka songka tiado luwuno mia anu tepokonsii.

⁷ Luwuno pesalaa-Do Dopopoto'oriomo ndi Musa, luwuno wineweu-Do a nto Isaraeli.

⁸ Ondae i Ue me'aroa ka mompehohawa, tedoa sabara ka langkai ntu'u pompehohawa-Do.

⁹ Komba wela Ira motuntu, ka komba ranta nahina tampulaano Doponaa tekuda.

¹⁰ Komba Doweweuo ndi ontae menunu saru halato, ka nahi Dopombalo ndi ontae menunu saru salato,

¹¹ sine kana mantandeno langi inso i tolino, kanatuumo langkaino pompehohawa-Do a mia anu doitoako Ira,

¹² kana olaino sabaano oleo inso i sumooano oleo, kanatuumo Dopoko'olaio polimpa'ito.

¹³ Kana ama mehohawa ira anano, kanatuumo Dopehohawao i Ue mia anu doitoako Ira.

¹⁴ Hangano Doto'orio inso a hapa tomewineweu, Dorambeo nine ontae andio pampawu.

¹⁵ Kanatuumo mia, oleo tuwuno kana ewo, kana bunga a mpada kanatuumo imensisi;

¹⁶ tewala ilaloo angi, onae nami kongko mbo'u ka po'iangano nami to'orio mbo'u.

¹⁷ Sine, pompehohawa-Do i Ue inso nahina tampulaano hawe nahina tampulaano a mia anu doitoako Ira, ka moleo-Do tiado inule,

¹⁸ tiado anu mpe'ini a mpedandia-Do, anu rumambeo weweuo parenta-Do.

¹⁹ Ondae i Ue mokorosoo kadera poparentaa-Do i suruga ka poparentaa-Do pabawa a luwuakoano.

²⁰ Unde-unde Iramo i Ue, hei luwuno mala'eka-Do, hei luwuno pongkiari moroso anu weweuo pau-Do tempono irongeo suarano pau-Do.

²¹ Unde-unde Iramo i Ue, hei luwuno sorodadu-Do, hei luwuno puu pompekakaako-Do anu weweuo po'ehe-Do.

²² Unde-unde Iramo i Ue, hei luwuno pinokogagi-Do, a luwuno po'ianga pinabawai-Do! Unde-unde Iramo i Ue, hei sumangaku!