Po'unde-unde 102 - Wunta Mempori

Pekakaino asa mia marasai tiano Sioni 102:1-29

¹ Pekakaino asa mia marasai, tempono itelusa molema ka moluarako masusano i aro-Do i Ue.

² Oo Ue, Irongeomo pekakaiku, ka po'ineeomo pebooliku mepetulungi hawe ndi Omiu.

³ Siimo Iwunio rupa-Miu ndi ongkue a oleo kupompema'iso. Ipo'aroomo biri-Miu ndi ongkue; a oleo kupebooli, rongamo Isangki aku!

⁴ Hangano luwuno oleo ntumuwuku moliu kana ahu, luwuno wukuku mewaro kana pompotuwua api.

⁵ Aroaku tededengke ka telusa kana ewo, ranta-ranta kukolupeo kumaano rotiku.

⁶ Hangano pekakaiku anu meroku, ndio akumo koa kuli montongo wuku.

⁷ Kana akumo manu-manu koa i pada one, gagi akumo kana manu-manu pupuunggu a nterawoano.

⁸ Nahi kupokompoturi ka gagi akumo kana manu-manu tensia a wawo ato.

⁹ Hawe sumoo oleo domentata aku iwaliku, mia anu memae-maeakune metotonaa saru pauo neeku.

¹⁰ Hangano ongkue mongkaa awu kana roti, ka inuaku mesaloako uwoi mata,

¹¹ hangano tekuda-Miu ka bamburu-Miu, hangano Itande akumo ka Ipepasiakune.

¹² Luwuno oleo ntumuwuku kana eo-eo ondau, ka ongkue moleu kana ewo.

¹³ Sine Omiu, oo Ue, mentoro a ngkadera poparentaa ranta nahina tampulaano, ka nee-Miu rinambe mpiha mapa'api-api inule.

¹⁴ Omiumo anu Komiu mentade ka mehohawao Sioni, hangano haweomo tempono ka Ipehohawao, haweomo tempo anu pinakosi.

¹⁵ Hangano luwuno tetenaa-Miu mpehohawa ira watuno, ka mpewaintoo pampawuno anu terawo.

¹⁶ Ka luwuno tongku lembuino gagi medoitoakono nee-Do i Ue, ka luwuno mokole ntolino me'ondahao maramba-Miu,

¹⁷ tewala Dowanguomo i Ue Sioni ka mepopokita a laro maramba-Do,

¹⁸ mewolili Iramo merorongeakono pekakaino mia nahina po'iangano, ka komba Dopebungkuio pekakaido.

¹⁹ Po'ineeomo ka ibinuri mongkona andio tiado inule lembuino, ranta tongku anu pinokogagi lembuino ta umunde-unde Ira i Ue,

²⁰ ”Menteeano melungaako Iramo inso a mpo'ianga-Do anu mantande ka mempori, Ondae i Ue mensiro i tolino inso i suruga,

²¹ Ira rumongeo pinemasusano mia tinorungku, Ira motolao mia anu hinuku mate.”

²² Ka nee-Do i Ue ta tinutulu i Sioni, ka Ira inunde-unde i Yerusale,

²³ tempono luwuno tongku ka poparentaa mpepumpu mperonga-ronga ira mpesomba ndi Ondae i Ue.

²⁴ Dopuduomo rosoku a ntonga nsala, ka moko'owowao tinuwuku.

²⁵ Kupotae, ”Oo Ue Alaku, si alao penaaku a entongano tinuwuku! Luwuno ta'u-Miu kongko mpiha mapa'api-api inule!”

²⁶ I ndi'ipua Ipokogagiomo tolino, ka langi onaemo wineweuno kae-Miu.

²⁷ Luwuno atuu ta tampula, sine Omiu kongko mpiha, ka luwuno atuu ta gagi mowuru kana sangka, kana lemba I'eu ira, ka do'amba mentinadi;

²⁸ sine Omiu nahina tampulaano, ka tuwu-Miu nahina tompaano.

²⁹ Inuledo tetenaa-Miu ira merodo mpo'ia, ka ana'uedo mpo'ia mpiha i aro-Miu.