Po'unde-unde 101 - Wunta Mempori

Pontangano asa mokole 101:1-8

¹ Penani po'unde-undeno i Daudi. Aku menaniako pompehohawa ka moleoa, aku menani umunde-unde Komiu, oo Ue.

² Aku mekokoongakono tumuwu anu nahina tataano. Te'ipiake Komiu aiwa ndi ongkue? Ineheku tuwu moleo aroa a laro rahaku.

³ Mataku nahi behe mongkita pompokonsiia; poweweu anu pansia ku'o'aliaakono, komba ku'ineheakono.

⁴ Aroa anu molengku kutadio olai ntu'u, nahi kubehe anu mosa'o.

⁵ Mia anu mewuni-wuni mompepaukiako walino, aku mepateo. Mia anu mompelangka-langkai ka labampau, komba ineheku.

⁶ Mataku te'aro a mia anu metenunu i wita andio, ka dompo'ia saru ongkue. Mia anu tuwu nahina tataano, ta mekakaakune.

⁷ Mia anu mompopo'oo nahi ta mo'ia a laro rahaku, mia anu megaupi nahi ta polio mentade i aroku.

⁸ Sompo mo'oru aku mepate ira luwuno mia mosa'o gauno i wita andio; ka kupokotampulao inso a ngkota-Do i Ue, luwuno mia anu moweweu mosa'o.