Po'unde-unde 10 - Wunta Mempori

¹ Tembio ka Ipentade ola-olai, oo Ue, ka Ipepusu a laro tempo ma'isoa?

² Saru pompelangka-langkai mia mosa'o gauno lumampuio mia tepokonsii; po'ineeomo dontekadu a laro pompopo'oo anu sinongkado.

³ Hangano mia mosa'o gauno mo'undeakono po'eheno aroano, ka mia modoko mompepaukiako ka tumata Ira i Ue.

⁴ Mepau mia mosa'o gauno atuu saru engeno kontahane, ”Ondae Ue Ala nahi Ira motuntu! Nahina Ue Ala!”, onaemo atuu luwuno pinewowolono.

⁵ Luwuno wineweuno wela mehasili; luwuno songka-Miu mantandeno lahi; iperuanahi ira luwu anu umewaio.

⁶ Onae mepau i laro aroano, ”Nahi aku telelu. Nahi ta umalu aku masolaa mapa'api-api inule.”

⁷ Ngangano bukeako sumpa pontotonaa, pompopo'oo ka pompokonsiia; a ntoto elono hinao lambaha ka mosa'oa.

⁸ Onae mentoro montowoki umpeda pe'iniaa, a mpo'ianga anu tewuni onae mompepate mia anu nahina salano. Matano mompesimi mia molema;

⁹ onae mompora a mpo'ianga anu tewuni kana singa a laro tongangkura; onae mompora ta monsapoi mia tepokonsii. Onae sumapoio mia tepokonsii atuu saru rumendeo a laro mpesenoano.

¹⁰ Onae me'odo ka me'opo, ntedonta iramo mia anu me'urasa'o a laro mpekapono anu moroso.

¹¹ Onae mepau i laro aroano, ”Ondae Ue Ala kumolupeo; Ondae wunio rupa-Do, ka nahi ta hori mbo'u kumitao.”

¹² Ipentademo, Ue! Oo Ue Ala, tasiakonomo kae-Miu, si kolupe ira mia anu tepokonsii.

¹³ Tembio mia mosa'o gauno ka itata Ira Ue Ala ka mepau i laro aroano, ”Nahi Komiu motuntu?”

¹⁴ Omiu isa'a kumitao masusaa ka marasai, Omiu kumitao ka umalao a laro ngkae-Miu. Ndi Omiumo mia urasa'o ipeweengakono koroino; Omiumo anu tumulungio nana'ote nahina amano.

¹⁵ Ipuduomo tokiano mia mosa'o gauno ka mia mosa'o wineweuno, Ituntuomo hawe gauno anu mosa'o nami kohumaweo mbo'u.

¹⁶ Ondaemo mpiha i Ue Mokole ranta nahina tampulaano. Luwuno tongku tampula inso i wita-Do.

¹⁷ Po'ehedo mia anu tepokonsii Irongeomo, oo Ue; Omiu mokorosoako ira aroado, Omiu mo'aroo biri-Miu,

¹⁸ ka moweeako ira moleoa nana'ote nahina amano ka mia anu melinolanda; ka si hina maupo te'asa mia i tolino anu mosia mompokodoito.