Ponsabangi 5 - Wunta Mempori

Pekakai pinomule

¹ Irambeomo, oo Ue, hapa anu gagi ndi omami, Ipensiroiomo ka Ikitaomo mongkokolaroamami.

² Tia pusakamami telimba a mia susua, luwuno rahamami a mia mehawe.

³ Omami megagi nana'ote nahina amamami, ka inemami kana tuwu beine.

⁴ Uwoimami kime'owahio ba kimpo'inu, omami mpohawe keu kime'owahio.

⁵ Omami melinulu tepo'umpeda, memokendo kami, omami nahina penaa-naa.

⁶ Omami metasiakono kaemami i Masiri, ka a nto Asuri ka kimemowohiako roti.

⁷ Amamami mpoweweu ira hala, ondae nami domekongko mbo'u, ka omami anu mentembio mosa'oado.

⁸ Puu pompekakaako meparenta kami; nahina anu motola kami inso a ngkaedo.

⁹ Ka doitoako matea hangano ponsapoino ponai i pada one, asalakono kami mpo'ala kaangamami.

¹⁰ Kulimami motaha kana pompuuria api, hangano mongkokongirino mokoninggoa.

¹¹ Ondae mpedada mewowaliako ira beine i Sioni ka ana beine a luwuno kota i Yehuda.

¹² Kaedo ndumoe ira luwu petewawa, mia pinemota'u nahi domempinelangkai.

¹³ Mia memongura asalakono mpontembi watu pogili, nana'ote mentebangku hangano mobeano keu pino'aha.

¹⁴ Mia pinemota'u nahi dompepumpu mbo'u a mpewowa langkai, mangalitau mpenaa-naa mpemae katapi.

¹⁵ Tampulaomo mawongkono aroamami, po'ense-ensemami baali gagi po'inombo.

¹⁶ Ramba-ramba ulu tedontaomo inso a ulumami. Wainto kamipo, hangano mpoweweu kamimo hala!

¹⁷ Hanganomo andio ka imahaki aroamami, hanganomo andio matamami gagi mowewu:

¹⁸ hangano pongku Sioni anu londa, pelakopiado dahu mo'ila

¹⁹ Omiu, oo Ue, mentoro a kadera poparentaa-Miu ranta nahina tampulaano, kadera poparentaa-Miu kongko mpiha sompo tempo!

²⁰ Tembio ka Ikolupe kami ranta nahina tampulaano, binta kami tehine ntu'u?

²¹ Iwawa kamimo ndi Omiu, oo Ue, asalakono kami mpepokule, Ipokowo'ohuomo oleomami kana i ndi'ipua!

²² Ke, Itadi kamimo mpihake? Tedoa Komiu tekudake ndi omami?