Ponsabangi 3 - Wunta Mempori

Pontarero a laro marasaia 3:1-66

¹ Ongkuemo anu kumitao marasaia hangano ponsepi tekuda-Do.

² Dosaari aku ka weweu aku melempa a laro wongi-wongi nahina mewine.

³ Menteeano, Dopopotundu-tunduhiakune kae-Do asa oleo.

⁴ Doweweuo ihi ka kuliku tengkuru, wukuku Dopudu ira,

⁵ Ondae mowangu rere watu lumimbu aku, lumimbuakune masusaa.

⁶ Doweweu aku mo'ia a laro wongi-wongi kana mia anu tehineomo mate.

⁷ Dowanguo wala lumimbu aku, ranta nahi kupokompeluarako; ranteku Dopokomobeao.

⁸ Maupo kupebooli ka meraali mepetulungi, Dokominoakono pekakaiku.

⁹ Salaku Do'onsoiakono poleno watu, ka mokogagio sala kodeiku nahi pinesalai.

¹⁰ Kana berua Dotowoki aku, kana singa a mpewuniano.

¹¹ Dopelengkuakono salaku, beri-beri aku ka weweu aku tededengke.

¹² Dopadiio pana-Do, ongkue gagi tetutuano mata mpana.

¹³ Dopepahoakono a laro aroaku ana mpana inso a mponaapa-Do.

¹⁴ Ongkue gagi pengingisiado luwuno tongkuku, gagi penani pompopodeu-deudo asa oleo.

¹⁵ Dopokomowohiakune masukaraa, mopo'inuakune rasu mopa'i.

¹⁶ Ngisiku Dopuroakono one; Dodanso aku a laro pampawu.

¹⁷ Omiu lumiahakono penaaku inso a rodoa, kukolupeo me'uraa.

¹⁸ Kupewowoloo: tampulaomo marambaku ka pomperorohiaku ndi Ondae i Ue.

¹⁹ ”Pewowoloomo marasaiku ka pelakopiku, a ipo ka rasu atuu.”

²⁰ Sumangaku wela rumambeo mongkona atuu ka me'isei a loro ngkoroiku.

²¹ Sine ndiomo anu kupekokoongakono, hangano atuu kupomperorohi:

²² Menteeano nahi otu-otu pompehohawa-Do i Ue pompowee-Do nahi hori pingko,

²³ wo'ohu mpiha sompo mo'oru; langkai petenunu-Miu!

²⁴ ”Ondaemo i Ue tiaku,” ipotae sumangaku, onaemo pu'uno ka kupomperorohi ndi Ondae.

²⁵ Ondae i Ue atuu moiko a mia anu momperorohi ndi Ondae, sumangano anu umungke Ira.

²⁶ Moikoomo mesikori saru menoro-noro pontulungi-Do i Ue.

²⁷ Moikoomo asa mia tama tumembio pasanga tempono imongura.

²⁸ Po'ineeomo ka ipentoro asa-asano ka menoro-noro tewala Ondae i Ue monaakono pasanga.

²⁹ Po'ineeomo ipebangkuako saru rupano a laro pampawu, bara'ura hinao pomperorohia.

³⁰ Po'ineeomo ipeweengakono kombisi a mia anu tumampeleo, po'ineeomo imowohiako pepaukia.

³¹ Hangano komba nahina tampulaano nahi Dotarimao i Ue.

³² Maupo Dopompotii masusaa, me'aroa Ira koa mbo'u montonda langkaino pompehohawa-Do.

³³ Hangano komba inso i aroa-Do mompokonsii ka mokomasusa ira anano mia.

³⁴ Tewala linolandaako karu luwuno tinawa a wita,

³⁵ tewala tiano mia pinelengkuako i aro-Do Anu Tedoa Mantande,

³⁶ ke mia wineweu nahi moleo a laro kara-karano, nahike Ira kumitao i Ue?

³⁷ Isemake Ondae anu mepau, ka luwuno gagi? Kombake Ondae i Ue anu meparentaakono?

³⁸ Kombake inso a nganga-Do Anu Tedoa Mantande meluarako hapa anu mosa'o ka anu moiko?

³⁹ Tembio mia anu tuwu me'anaiki? Sompo mia anu nahi pompesompo hangano halano!

⁴⁰ Aiwamo tompempenteeo ka memparesao tuwuto, ka tompepokule ndi Ondae i Ue.

⁴¹ Aiwamo tomentandeo aroa ka kaeto ndi Ondae Ue Ala i suruga:

⁴² Tehala kamimo ka me'ewa, nahi oniniakami halamami.

⁴³ Omiu mesoumbuako tekuda, lumulu kami ka mepate kami nahina pompehohawa.

⁴⁴ Omiu mesoumbuako seru, ranta nahina pekakai anu haweako.

⁴⁵ Ipokogagi kami rompo ka mokoburua i olodo tongku.

⁴⁶ Ndi omami, luwuno iwalimami mpongangao ngangado.

⁴⁷ Tededengke ka oho kumona kami, ropua ka terawoa

⁴⁸ Mataku mompo'iti waaano uwoi, hangano terawoano ana beineno tongkuku.

⁴⁹ Uwoi mataku waa mpiha nahi penaa-naa,

⁵⁰ ranta ka Dokitao i Ue inso i wawono ka mensiro inso i suruga.

⁵¹ Mataku mokomopoeo sumangaku hangano luwuno ana beineno kotaku.

⁵² Kana manu-manu linulu aku mpiha hangano ondae anu gagi iwaliku nahina pu'uno.

⁵³ Ondae mpepate aku a laro aa, mewunoakune watu.

⁵⁴ Uwoi mowo a wawo uluku, kupewowoloo, ”Mate akumo!”

⁵⁵ ”Oo, Ue, kupoboio nee-Miu inso a laro aa anu ondalo.

⁵⁶ Irongeo suaraku! Sii tompoo biri-Miu a pe'anaikiku ka pebooliku!

⁵⁷ Omiu umpeda tempono kupoboi-Komiu, Omiu mepau, Sii doito!”

⁵⁸ ”Oo Ue, Iteahakonomo kara-karaku, Ikaduduiomo tuwuku.

⁵⁹ Ikitaomo nahi moleoa ndi ongkue, oo Ue; Iweeakunemo moleoa!

⁶⁰ Ikitaomo luwuno pombalodo, luwuno tinoodo ndi ongkue.”

⁶¹ ”Irongeomo pepaukido, oo Ue, luwuno tinoodo ndi ongkue,

⁶² wua wiwido mia anu me'ewai aku, ka tinoodo ndi ongkue asa oleo.

⁶³ Ipekokoongakono pentoro pentadedo! Ongkue pinokogagi penani pompopodeu-deudo.”

⁶⁴ ”Omiu moweweu pombaloa ndi ondae, oo Ue, menunu saru wineweuno kaedo.

⁶⁵ Omiu mokomoteao aroado; po'ineeomo i'alu ira pontotonaa-Miu!

⁶⁶ Omiu lumuluako ira tekuda ka rumopu ira inso i totono langi, oo Ue!”