Ponsabangi 2 - Wunta Mempori

Tekuda-Do Ue Ala ndi Sioni 2:1-22

¹ Ha, kana'umpe Ondae i Ue tumutuwiakono seru ana beine Sioni a laro ntekuda-Do! Marambano Isaraeli Dopetadiakono inso i langi tii i tolino. Nahi Dorambeo pelandaa-Do a oleo tekuda-Do.

² Nahina pompehohawa-Do i Ue rumopuo luwuno po'iangano i Yako. A laro tekuda-Do Dorawo-rawo ira benteno Yehuda. Doweweuo poparentaa ka luwuno petewawano tepasiako a wita ka tesosa'ai.

³ A laro ntekuda anu tensila Dopuduo sompo tanduno Isaraeli, wali dumiio kae ngkoana-Do tempono iwali me'umpeda, ka tumunuo i Yako kana api anu melanga, anu monsila'e limbu-limbu.

⁴ Dodiio pana-Do kana asa mia iwali, kae ngkoana-Do tetinda kana asa mia umewa. Ondae mepate ira luwu anu pinemoikono mata a laro kemado ana beine Sioni, lumuao tekuda-Do kana api.

⁵ Ondae i Ue gagi kana iwali; Isaraeli Dokaano, rumopuo luwuno po'iangano, rumawo-rawoo luwuno benteno, mokohadioo masusa ka mekohe a ana beine Yehuda.

⁶ Dorongkao kema-Do ande-andeno atuu lere, rumawo-rawoo tepotowoa-Do. I Sioni Doweweuo i Ue mia kumolupeo porame-ramea ka oleo Saba, saru a laro bamburuno tekuda-Do nahi Dotarima ira mokole ka sando mpesomba.

⁷ Meda pontunua pesomba-Do nahi Dotarimao i Ue, nahi Doperioo po'ianga mempori-Do; meweengakono a ngkaeno iwali rere watu luwuno po'iangano. Maroa suara a laro Raha-Do Ue Ala kana teweweuno a mporame-ramea.

⁸ Doputusiomo i Ue Ira rumawoo rere watuno ana beine Sioni. Luwuno Dosongkaakono koloro posongka, ka nahi Dodiio kae-Do ka Dorawo-rawoo. Doweweuo bente ka rere watu po'inombo, luwudo mpe'isei.

⁹ Dotano ira matubo a laro wita; pinudu ka Dorawo-rawoo luwuno lansono pewowano. Mokole ka luwuno petewawano kongko i olodo tongku, nahina pontiso, maupo nabi nahi dompotarima mbo'u pongkita inso ndi Ondae i Ue.

¹⁰ Mpentoro mpenoro-noro a wita luwuno mia pinemota'uno ana beine Sioni; domporawoakono awu a wawo uludo, ka pompokona sawu po'inombo. Luwuno ana beineno Yerusale mpetuundu a wita.

¹¹ Mataku mowewu hangano uwoi mata, aroaku nahi rodo; pingko terawo-rawo aroaku; hangano terawo-rawodo ana beineno tongkuku, hangano nana'ote ka ana da kodei memolema a luwuno tanalapano kota.

¹² A ineno dompesikeno, ”Isua roti ka anggoro?”, kontongaado memolema kana mia mobela a luwuno tanalapano kota, tempono te'otu penaa a mpo'awiano ineno.

¹³ Hapa anu aku mokomengkaao ndi omue, saru hapa anu aku mokomengkenaakomu, hei ana beine Yerusale? Saru hapa aku mokompongkenaakomu ka utinarero, oo ana beine, ana beine Sioni? Hangano malua kana tahi terawo-rawomu; isema ta momuleko?

¹⁴ Luwuno nabimu mpongkitaakomu pongkita anu nahina pengkonaano ka mooa. Nahi dompokomengkaao salamu ka upinomule. Dompoluarakoakomu pinau anu nahi manasa ta gagi butu pegaupi ka mompokotesaa.

¹⁵ Luwuno mia anu telalo mpotopa hangano omue. Ondae mpomansu mpopopodeu-deu ka mebitu-bituo uludo a ana beine Yerusale, ”Onaemoke kota anu pinau kota tekosi ntu'u, ineheno asa wawontolino?”

¹⁶ Ndi omue luwuno iwalimu mpongangao ngangado. Ondae mpomansu mpopopodeu-deu, mpokingkio ngisido, ka mpotae, ”Umariomo kimeropuo! Ndiomo oleo anu sinisikorimami, omami mpembasaio, omami mengkitao!”

¹⁷ Doweweuomo i Ue hapa anu tinoo-Do, Do'ihiio hapa anu pinau-Do, anu Dopeparentaako i ndi'ipua. Ondae monsolangi nahina pompehohawa, Doweweuo iwali mawongkoakomiu, ka tumandeo tandudo anu umewai komiu.

¹⁸ Aroado mpebooli ndi Ondae i Ue. Hei, rere watuno ana beine Sioni, po'itiomo uwoi mata kana korono meene ka wongi; si po'ineeo koroimu menaa-naa, siimo irodo matamu!

¹⁹ Pewangumo, peraipimo ia wongi, a pompu'uano pepo'eu mpodagai wongi; luarakonomo ihino aroamu kana uwoi i aro-Do i Ue. Tandeomo kaemu ndi Ondae ka domentuwu koa anamu, anu memolema hangano mokoninggo a sompo untuno sala!

²⁰ Ikitaomo, Ue, ka Ipekokoongakonomo, isemake weweuo mongkona andio? Nde asalakonoke beine kumaano ana ngkoroino, nana'ote anu da mensinoe? Nde asalakonoke sando mpesomba ka nabi pinepate a laro mpo'ianga mempori-Do i Ue?

²¹ A sompo sala tepombole a wawo wita mia mongura ka mia mota'u; luwuno ana beineku ka mangalitauku memateako ponai; Ipepate ira tempono Itekuda, nahina pompehohawa Isumbele ira!

²² Ande-andeno tiano oleo porame-ramea I'oluo luwuno anu kudoitoakono inso a limbu-limbuku. Tempono Dotekuda i Ue nahina maupo te'asa mia anu tola ke tekadudui. Ondae anu sinoeku ka pinokolangkaiku dompepate ira iwaliku.