Ponsabangi 1 - Wunta Mempori

Tekaleno ka boni-bonino Yerusale

¹ Ha, tedoa tensia kota atuu, anu i ndi'ipua maroa! Kanamo asa tuwu beine onae, anu i ndi'ipua maramba i olodo luwuno tongku. Anu i ndi'ipua mokole beine i olodo luwuno kota, kanandio-andio gagi pine'ata.

² Ia wongi onae sensedu mengese, uwoi matano tewaa a kombisi; inso a luwuno pinehohawano, nahina maupo te'asa mia anu tumareroo. Luwuno walino nahi dompetenunu, ondae megagi iwalino.

³ Yehuda domebintaomo palilino hangano marasai ka hangano pompe'ata anu mobea; onae mo'ia i tonga-tongano luwuno tongku, sine nahi pohawe rodoa; isemamo koa anu monsapoi mokompewinsokio tempono itepakada.

⁴ Luwuno sala lumako i Sioni bukeako pompemasusa, hangano nahina anu me'aiwa a mporame-ramea; boni-boniomo luwu pewowa langkaino, mpompau iramo pinemasusado sando mpesombano; tedoa iramo pompemasusa ana beineno; ka onaeno tedoa masusa aroano.

⁵ Luwuno anu me'ewaio pabawaio, luwuno iwalino mempo'unde. Mentee ntu'u, Ondae i Ue weweuo boni-boni, hangano hadio salano; nana'oteno mpelempa i arodo iwali gagi mia mentinawa.

⁶ Tampulaomo inso a ana beine Sioni luwuno marambano; Petewawano kana iramo rusa anu nahi pohawe pada ewo; ondae mpelempa nahina roso i arodo anu lumulu ira.

⁷ Terorambeomo Yerusale, a luwuno oleo tebobarasai ka marasaiano, a luwuno arataa anu pine'ueno i ndi'ipua; tempono palilino ntedonta a ngkaedo iwali, ka nahina tumulungio, luwuno iwali mengkitao, ka mpengingisi hangano tekaleno.

⁸ Yerusale tedoa tehala, onaemo ka imokoburu; i ndi'ipua luwuno anu mpelangkaio, kanandio-andio mentetewehio, hangano domengkitao kolambe-lambeno; ka onae isa'a mompau pinemasusano, ka iwolilio rupano.

⁹ Mokoburuno metako a tompa sawuno; nahi ipewowoloo poko'ariano, tedoa ondalo itedonta, nahina mia tumareroo. ”Oo, Ue, kitaomo tebobarasaiku, hangano iwaliku mompelangka-langkai!”

¹⁰ Ewaino weroo kaeno a luwuno arataano; tendeano ka ikitao kana'umpe luwuno tongku dompewinso a laro mpo'ianga memporino, kahinaano Omiu, oo Ue, i'onto iramo ka dompewinso bawaa-Miu.

¹¹ Mpopau ira pinemasusado luwuno palilino, tekonai ira mpo'ungke roti; arataa dompeweengakono euno kaanga, ka itesombu tuwudo. ”Ikitaomo, oo Ue, Ipensiroiomo, ongkue andio tedoa mokoburu!

¹² Nahinake pomperiomiu luwuno anu ntelalo? Imengkitaomo, hinaoke pompemasusa kana pompemasusa anu Doweeakune i Ue, weweu aku marasai tempono tekuda-Do tensila!

¹³ Inso i wawono Do'oliwio api mewinso a laro wukuku; Dopontendeakono buani a ngkaruku, weweu aku monsuka; Ondae mokontededengke aku, mompemahaki asa oleo.

¹⁴ Luwuno salaku hinowu gagi pasanga, wineweuno kae-Do i Ue, ninaa a wawo banga we'uku, ranta ka imolema koroiku; ongkue Dopeweengakonomo i Ue a ngkaedo mia, anu nahi kupoko'ewaio.

¹⁵ Dotadio luwu i Ue puu mpeteaku anu kongko a mpetengi-tengiku; Ondae mompoboi tepumpuano mia umewai aku rumopu ira mangalitauku; Dololandaomo i Ue ana beineno Yehuda, ana beine atuu, kana monsesa anggoro.

¹⁶ Onaemo ka kupengese, mataku mompowaa uwoi; hangano olai pontarero inso ndi ongkue anu mompokomadoo sumangaku; ntededengke iramo anaku, hangano iwaliku tedoa moroso.”

¹⁷ Sioni tumineo kaeno, sine nahina tumareroo; mongkona i Yako, Ondae i Ue tumena ira mia petengi-tengino gagi ewaino. Yerusale gagi mokoburu i olodo.

¹⁸ ”Ondaemo i Ue anu mentee, sine ku'ewaiomo pau-Do; rongeomo hei luwuno tongku, ka kitaomo pompemasusaku; luwuno ana beineku ka mangalitauku melako gagi mia mentinawa.

¹⁹ Kupoboi ira pinehohawaku, sine domempopandei aku. Luwuno sando mpesombaku ka mia pinemota'uku memate iramo a ngkota, tempono dompo'ungke kaangado ka itesombu tuwudo.

²⁰ Oo, Ue, Ikitaomo, tedoa aku masusa, aroaku nahi rodo; aroaku tewowalite a laro radaku, hangano lansaraomo pe'ewaku; i bungkuno, ponai mepate ira inule, a laro raha, matea.

²¹ Ondae merongeo tedoa pompemasusaku, sine nahina tumarero aku; domerongeo iwaliku mongkona masolaaku, ka ondae mpo'unde hangano ndi Omiu insoano! Po'ineeomo ka ihawe oleo anu Ipakosiomo atuu, ka po'ineeomo ka domegagi kana ongkue!

²² Po'ineeomo wineweudo anu mosa'o hawe i aro-Miu, ka weweuomo ndi ondae, kana anu Iweweuomo ndi ongkue hangano luwuno salaku; hadio ntu'u pompemasusaku, ka mahakino aroaku.”