Podoaa 9 - Wunta Mempori

Luwuno pompakosi mongkona pompokomaroa Pasa

¹ Mepau Ira i Ue ndi Musa i pada one Sinai, ia wula amba-ambano ta'u ko'orua umarido mpeluarako inso i wita Masiri,

² ”To Isaraeli asalakono mpokomaroao Pasa ia tempono.

³ Ia oleo kohopulu ka opaa wula andio, i tempono ngkiniwia, asalakono impokomaroao ia tempo anu pinakosi. Montonda luwuno pompakosi ka atorano asalakono impokomaroao.”

⁴ Ka i'amba i Musa tumena ira to Isaraeli mpokomaroao Pasa.

⁵ Onaemo ka dompokomaroao Pasa ia wula amba-ambano, oleo kohopulu ka opaa wula atuu i tempono ngkiniwia i pada one Sinai. Kona ntu'u kana parenta-Do i Ue ndi Musa, kanandiomo domeweweuo to Isaraeli.

⁶ Sine, hinao ba'opia mia anu mokoburu hangano wata ngkoroi, ranta nahi pokomaroao Pasa ia oleo atuu. Me'aiwa ira mpe'aro ndi Musa ka ndi Haruni ia oleo koa mbo'u atuu.

⁷ Dompotae ndi onae, ”Omami lano mokoburu hangano wata ngkoroi, tembio ka kime'inonto mpowawa pesomba ndi Ondae i Ue i tonga-tongado to Isaraeli ia tempo anu pinakosi?”

⁸ Ka i'amba i Musa sumangki ira, ”Siipo ari, aku rumongeo hapa anu ta peparenta-Do i Ue mongkona omiu.”

⁹ Ka Do'amba mepau i Ue ndi Musa,

¹⁰ ”Pauako iramo to Isaraeli: Tewala asa mia i olomiuke inulemiu mokoburu hangano wata ngkoroi, ke a laro pelempaa olai, asalakono onae mbo'u mokomaroao Pasa ndi Ondae i Ue.

¹¹ Ia wula ko'orua, oleo kohopulu ka opaa, i tempono ngkiniwia, asalakono luwuno mia atuu mpokomaroao. Asalakono domengkaano saru roti nahi peragi ka inahu mopa'i.

¹² Sii domebintao asa ntia inso ndi onae hawe mo'oru ka maupo te'asa wukuno si domempuduo. Asalakono dompokomaroao montonda luwuno pompakosi Pasa.

¹³ Posuleno mia anu nahi mokoburu ka komba a laro pelempaa, sine nahi pomperio mokomaroao Pasa, mia atuu asalakono pinokotampula inso i olodo mia pe'asa tongkuno, hangano nahi powawa pesombano ndi Ondae i Ue ia tempono. Mia atuu ta tumembio halano.

¹⁴ Tewala asa mia hawe anu mo'iaomo mpiha ndi omiu mingki mokomaroao Pasa ndi Ondae i Ue, asalakono ipokomaroao montonda luwuno pompakosi ka atorano Pasa. Asalakono asa pompakosi anu tinondamiu, moiko a mia hawe maupo lano mia i tu'ai.”

Seru-Do Ue Ala metewawa a mpelempaado to Isaraeli

¹⁵ Ia oleo iwinangu Kema Mempori, seru tumutuwio Kema Mempori, kemano songka-Do Ue Ala; ka i tempono wongi hawe mo'oru seru atuu kongko i wawono Kema Mempori, tengkita kana api.

¹⁶ Kanandiomo anu wela gagi: seru atuu tumutuwio Kema, ka i tempono wongi tengkita kana api.

¹⁷ Sompo ipewuatako seru atuu inso i wawono Kema, to Isaraeli mbo'u mpelungka, ka a mpo'iangano seru atuu, i ra'aimo dompekema to Isaraeli.

¹⁸ A mpetena-Do i Ue to Isaraeli mpelungka ka a mpetena-Do koa mbo'u i Ue ondae mpekema; tempono ipo'ia seru atuu iwawono Kema Mempori, mpekema ira mpiha.

¹⁹ Tempono seru atuu tehine i wawono Kema Mempori, to Isaraeli mpekariao anggaado ndi Ondae i Ue ka nahi dompelungka.

²⁰ Eheano butu ba'opia oleo seru atuu i wawono Kema Mempori; a mpetena-Do i Ue dompekema ka a mpetena-Do koa mbo'u i Ue dompelungka.

²¹ Eheano ipenaa-naa seru atuu butu inso ngkiniwia hawe mo'oru, mansano mewuatako seru atuu tempono mo'oru, ondae mbo'u mpelungka. Moiko i tempono meene maupo wongi, mansano mewuatako seru atuu, ondae mbo'u mpelungka.

²² Tempono ipenaa-naa seru atuu i wawono Kema Mempori, moiko orua oleo, asa wula ke lalu tehine, to Isaraeli mpekema mpiha ka nahi dompelungka. Sine, mansano mewuatako seru atuu, ka do'amba mpelungka.

²³ A mpetena-Do i Ue dompekema ka a mpetena-Do koa mbo'u i Ue dompelungka. Dompekarioa anggaado ndi Ondae i Ue, montonda petena-Do i Ue telalo ndi Musa.