Podoaa 6 - Wunta Mempori

Songka mompeweengako tumuwu ndi Ondae i Ue

¹ Mepau Ira i Ue ndi Musa,

² ”Pepaumo a nto Isaraeli ka pauako ira: Tewala asa tama ke beine mompau pontanga pinesusua, pontangano mia anu meweengakono tumuwuno ndi Ondae i Ue,

³ asalakono ipoko'olaio koroino inso a anggoro ka inua anu mompokomolangu, nahi po'inu inua anu wineweu inso a wua anggoro ka nahi pongkaa wua anggoro, moiko anu da sarai inopu maupo anu pinokomokari.

⁴ Ilarono ipeweengakono tinuwuno ndi Ondae i Ue nahi moiko ipongkaa maupo hapa anu te'inso a ngkeu anggoro, inso a wukuno hawe a ngkulino.

⁵ Ilarono tempo pontangano gagi mia meweengakono tumuwuno ndi Ondae i Ue nahi moiko uluno idanggio piso pongkeru. Hawe kai sompo tempono ipesusuao koroino ndi Ondae i Ue, asalakono kai mempori mpiha ka mo'ineeo wuuno tuwu ondau.

⁶ Ilarono ipesusuao koroino ndi Ondae i Ue, nahi moiko i'umpedaakono mia mate;

⁷ tendeano tewala amano ke maupo ineno, pepaekompono tama ke maupo beine mate, nahi moiko ipokomokoburuo koroino hangano ondae, hangano tondonino ipeweengakono tumuwuno ndi Ondae Ue Ala a ntoro'uluno.

⁸ Ilarono ipeweengakono tumuwuno onae mempori ndi Ondae i Ue.

⁹ Sine tewala asa mia mansa mate umpeda ndi onae, ranta kai pokomokoburuo wuuno, asalakono ikeruo wuuno a oleo pepokomorinano; a oleo ko'opitu ka i'amba kumeruo.

¹⁰ Ia oleo ko'oalu asalakono iwawao orua manu-manu wurokou ke orua anano manu-manu marapati a sando mpesomba, a mpewowano Kema Tepotowoa.

¹¹ Asalakono anu asa iweweuo sando mpesomba gagi pesomba po'onini hala ka anu susua gagi pesomba tinunu, saru moweweuakono pesintuwua, hangano tehalaomo kongko umpeda a mia mate. Ia oleo koa mbo'u atuu asalakono ipokomemporio uluno,

¹² ka mesusuao tempo ipeweengakono tinuwuno ndi Ondae i Ue. Asalakono iwawao asa bimba lakino tinuwuno asa nta'u gagi pesomba pontolosi sala. Luwuno oleo anu telaloomo rineke nahi gagi, hangano wuuno gagiomo mokoburu.

¹³ Ndiomo songka mongkona asa mia anu meweengakono tinuwuno. Mansano sompo tempo ipeweengakono tinuwuno ndi Ondae i Ue, asalakono ka iwinawa a mpewowano Kema Tepotowoa.

¹⁴ Asalakono ipesombaakono gagi pesomba ndi Ondae i Ue asa bimba lakino tinuwuno asa nta'u anu nahina tataano ta gagi pesomba tinunu ka asa bimba waino tinuwuno asa nta'u anu nahina tataano ta gagi pesomba po'onini hala, ka asa bimba lakino anu nahina tataano ta gagi pesomba tekaduduia,

¹⁵ asa baki mbo'u roti nahi peragi, onaemo roti bonggoli inso a ntarigu moiko ntu'u anu sinaloako lana, ka roti monipi nahi peragi anu hinahiako lana, saru pesomba kaanga ka luwuno pesomba tinawa.

¹⁶ Sando mpesomba asalakono wawao luwu i aro-Do i Ue ka iweweuo pesomba po'onini hala ka pesomba tinununo;

¹⁷ Bimba lakino atuu asalakono iweweuo gagi pesomba tekaduduia ndi Ondae i Ue, saru baki roti anu nahi peragi atuu. Sando mpesomba asalakono moweweu mbo'u pesomba kaanga ka pesomba tinawano.

¹⁸ Mia anu meweengakono tumuwuno ndi Ondae i Ue atuu asalakono kumeruo wuuno i arono Kema Tepotowoa, ka i'amba umalao wuuno atuu ka metadiakono a laro api anu i totono pesomba tekaduduia.

¹⁹ Sando mpesomba asalakono umalao pa'a i arono bimba lakino atuu umarino ninahu, ka asa roti bonggoli nahi peragi inso a laro baki, saru asa roti monipi nahi peragi, ka i'amba numaao a wawo pele ngkaeno mia anu meweengakono tumuwuno ndi Ondae i Ue atuu, mansano mia andio kumeruo wuuno.

²⁰ Ka i'amba sando mpesomba tumandeo luwuno atuu i aro-Do i Ue gagi pesomba tinande. Luwuno atuu gagi anu mempori a sando mpesomba, saru rada pesomba tinande ka pa'a pesomba pinesusua. Umarino atuu ka i'amba mia anu meweengakono tumuwuno ndi Ondae i Ue atuu moiko ipo'inu anggoro.”

²¹ Onaemo songka mongkona mia anu meweengakono tumuwuno ndi Ondae i Ue anu montangaako pesombano ndi Ondae i Ue me'empehiako tumuwuno anu ipeweengakonomo ndi Ondae i Ue, nahi tewinso hapa anu ipolio weweuo. Menunu saru unino pontanga anu dinandino, kanandiomo asalakono iweweuo me'empehiako songka mongkona tumuwuno anu ipeweengakonomo ndi Ondae i Ue.

Pau poronsono sando mpesomba

²² Mepau Ira i Ue ndi Musa,

²³ ”Pepaumo ndi Haruni ka a luwuno anano. Kanandiomo asalakono imeronso ira to Isaraeli. Pauako ira:

²⁴ Ondae i Ue rumonsokomiu ka kumongkomikomiu;

²⁵ Ondae i Ue wantahio rupa-Do ndi omiu ka moweeakomiu pompehohawa;

²⁶ Ondae i Ue mopo'aroo rupa-Do ndi omiu ka moweeakomiu rodoa.

²⁷ Kanandiomo asalakono domenaao nee-Ku a nto Isaraeli, ka Aku rumonso ira.”