Podoaa 5 - Wunta Mempori

Atora mongkona mia mokoburu

¹ Mepau Ira i Ue ndi Musa,

² ”Parenta iramo to Isaraeli kai luwuno mia anu mohawe haki ngkuli mesaki, luwuno mia anu moluarako nana ka luwuno mia anu mokoburu hangano wata ngkoroi, tinena bintao pekemaa.

³ Moiko tama maupo beine asalakono tena ira melako. Ondae asalakono tena ira melako mpeluarako inso a mpekemaa, kasi dompokomokoburuo pekemaa po'ianga-Ku i tonga-tongado.”

⁴ Domeweweuomo to Isaraeli kanatuu. Domentena ira mia atuudo mebintao pekemaa. Kana anu pinau-Do i Ue ndi Musa, kanandiomo domeweweuo to Isaraeli.

Atora mongkona pontolosia sala

⁵ Mepau Ira i Ue ndi Musa,

⁶ ”Pepaumo a nto Isaraeli: Tewala asa mia, tama ke beine moweweu hala a mpe'asa miano, ka hangano kanatuu moweweu nahi petenunu ndi Ondae i Ue, mia atuu pinokonsala.

⁷ Asalakono imangakuakono hala anu wineweuno atuu, umowahio luwu pontolosi saru tumiangio asa ntia olimano, ka i'amba meweengakono a mia ba ndi sema ipoweweu sala.

⁸ Sine, tewala mia atuu nahina pe'etuno, ndi sema ipoko'owahio pontolosi sala atuu, ka pontolosi sala anu asalakono i'owahio atuu gagi anu-Do i Ue, gagi tiado sando mpesomba, sangkadio bimba lakino pesintuwua anu pinake moweweu pesintuwuano mia atuu.

⁹ Sompo pesomba inso a luwuno pesomba mempori anu pinohawedo to Isaraeli a sando mpesomba, onaemo tiado sando mpesomba.

¹⁰ Sompo pesomba mempori lano mia atuu me'ueo, sine hapa anu ipeweengakono a sando mpesomba gagi tiano sando mpesomba.”

Songka mongkona kara-kara mosiria

¹¹ Mepau Ira i Ue ndi Musa,

¹² ”Pepaumo a nto Isaraeli ka pauako ira: Tewala kombiano asa mia moweweu molengku, moweweu nahi petenunu a ntamano,

¹³ ka tama susua mewowaliakono beine atuu, nahi to'orio tamano, hangano beine atuu mewuni-wuni sumosa'orio koroino, nahina sumakosiio ka nahina humawe ira,

¹⁴ sine lembuino mompemosiri pabawaio tamano atuu, ranta kai gagi mosiri a ngkombiano, ka beine atuu lano isosa'aiomo koroino; ke mompemosiri pabawaio tamano atuu, ranta kai gagi mosiri a ngkombiano, maupo beine atuu nahi sosa'orio koroino,

¹⁵ asalakono mia atuu wawao kombiano a sando mpesomba. Asalakono mia mbo'u atuu mowawa pesomba hangano beine atuu hadiono asa ntia hopulu efa tarigu jelai. Nahi moiko ipontawa lana i wawono maupo monaakono dupa, hangano pesomba atuu onaemo pesomba kaanga mosiria, asa pesomba pepopoto'ori anu mopoto'oriakono mia mongkona mosa'oa.

¹⁶ Sando mpesomba asalakono tumenao beine atuu umpeda ka mopo'aroo ndi Ondae i Ue.

¹⁷ Ka i'amba sando mpesomba asalakono mowawa uwoi mempori a laro asa kusi wita, mo'ala awu wita anu a horono Kema Mempori ka numaao a laro uwoi atuu.

¹⁸ Umarino sando mpesomba mopo'aroo beine atuu ndi Ondae i Ue, asalakono ikaleo wuuno beine atuu. Ka i'amba numaao pesomba pepopoto'ori, pesomba kaanga mosiria atuu a pele ngkaeno beine atuu, sekono a ngkaeno sando mpesomba asalakono hinao uwoi mopa'i anu mowawa totonaa.

¹⁹ Ka i'amba sando mpesomba asalakono sumumpao beine atuu saru motaeakono: Tewala nahi mentee hinao tama anu moturi saru omue ka nahi upoweweu molengku anu mompokomosa'o, kahinaano omue i totono pabawano tamamu, ka tolakomo inso a uwoi mopa'i anu mowawa totonaa andio.

²⁰ Sine, tewala omue anu i totono pabawano tamamu moweweu molengku ka sumosa'orio koroimu, hangano mewowaliakono mia anu komba tamamu.

²¹ I larono anu kanandio asalakono sando mpesomba sumumpaakono sumpa totonaa beine atuu ka motaeakono: po'ineeomo Ondae i Ue weweuko gagi sumpa totonaa i tonga-tongano tongkumu saru weweuo pu'u mpa'amu gagi kodei ka pe'anakaamu kamba.

²² Hangano uwoi anu mowawa totonaa andio ta mewinso a laro ngkoroimu mokokambao pe'anakaamu ka mokongkodeio pu'u mpa'amu. Ka i'amba beine atuu asalakono motae: Ami, ami.

²³ Sando mpesomba asalakono burio totonaa atuu a asa lewe wunta ka pahihiakono uwoi mopa'i atuu.

²⁴ Asalakono ipoweeakono beine atuu mo'inu uwoi mopa'i anu mowawa totonaa atuu ka uwoi atuu ta mewinso a laro ngkoroino ranta kai mopa'i tinuwuno.

²⁵ Sando mpesomba asalakono umalao pesomba kaanga mosiria inso a ngkaeno beine atuu, ka i'amba tumandeo i'aro-Do i Ue ka wawao a meda pontunua pesomba.

²⁶ Umarino atuu sando mpesomba asalakono mo'ala asa raku inso a mpesomba kaanga atuu gagi tia pepopoto'orino ka tumunuo a wawo meda pontunua pesomba, ka i'amba weeakono beine atuu uminuo uwoi atuu.

²⁷ Mansano iweeakono uwoi kai inuo beine atuu, ka ta gagi, tewala beine atuu lano isosa'aio koroino ka melelu nahi petenunu a ntamano, uwoi anu mowawa totonaa atuu ta mewinso a ngkoroino ka imopa'i tuwuno, ranta pe'anakaano kamba ka puu mpa'ano kodei, ka beine atuu ta gagi totonaa i olono tongkuno.

²⁸ Sine tewala beine atuu nahi sosa'orio koroino, tendeano onae mempori, onae ta pinokomengkaa nahi sala ka ta me'ana.”

²⁹ Onaemo songka mongkona mosiria, tewala asa beine moweweuomo molengku ka sumosa'orio koroino, kahinaano onae i totono pabawano tamano,

³⁰ ke pompemosiri pabawaio asa tama, ranta kai mosiri a ngkombiano; asalakono ipopo'aroo beine atuu ndi Ondae i Ue ka sando mpesomba asalakono weweuo luwuno songka andio a beine atuu.

³¹ Tama atuu ta tola inso a nsalano, sine beine atuu asalakono tumembio sala wineweuno.