Podoaa 4 - Wunta Mempori

Peburiado to Lewi anu sompoomo tinuwuno

¹ Mepau Ira i Ue ndi Musa ka ndi Haruni,

² ”Idoaomo porokono inuleno i Kehati inso i olono inuleno i Lewi montonda luwuno suku a laro pepe'etuado.

³ Idoaomo anu tinuwuno tolu pulu nta'u ka torea hawe lima pulu nta'u, luwuno anu temponomo ipo'angga, ka dome'anggao anggaa i Kema Tepotowoa.

⁴ Anggaado to Kehati i Kema Tepotowoa, onaemo mekakaakono luwuno sangka anu tedoa mempori.

⁵ Tempono ta melungka pekemaa, i Haruni ka luwuno anano asalakono mpewinso ira mpotiio sawu pelingo poborungi, ka meborungiakono burua po'iangano songka.

⁶ I wawono asalakono domenaao pontutuwi inso a ngkuli alusu ka i wawono mbo'u asalakono domewileo asa lewe sawu anu luwuno wungo motu'a, ka do'amba mpokonao luwuno keu selano burua atuu.

⁷ I wawono meda roti pesomba kaanga asalakono domewileo asa lewe sawu wungo motu'a, ka i wawono asalakono domenaao sempe, sangkiri, piala ka takea pesomba tinawa. Roti pesomba kaanga asalakono hinao mpiha i wawono.

⁸ I wawono luwuno atuu asalakono domewileo asa lewe sawu motaha motu'a, ka do'amba meborungiakono boru inso a ngkuli alusu ka mempokonao luwuno keu ponselano meda atuu.

⁹ Ka i'amba asalakono dome'alao asa lewe sawu wungo motu'a ka domeborungiakono hulu mekaru pompokomewanta saru luwuno huluno, sipino ka pontineino, saru luwuno parewa lanano anu pinake a hulu mekaru atuu.

¹⁰ Asalakono domenaao meronga saru luwuno parewano a laro boru inso a ngkuli alusu ka domenaao i wawono sinela.

¹¹ I wawono meda pontunua pesomba inso a wulaa atuu asalakono domewileo asa lewe sawu wungo motu'a ka domeborungiakono boru inso a ngkuli alusu, ka i'amba pinokona luwuno keu ponselano meda pontunua pesomba atuu.

¹² Umarino atuu asalakono dome'alao luwuno parewa anu pinake a mpoweweua pesomba a mpo'ianga mempori, mentongoakono asa lewe sawu wungo motu'a ka meborungiakono boru inso a ngkuli alusu, ka i'amba ninaa i wawono anu sinela.

¹³ Asalakono dompokomorinao meda pontunua pesomba atuu inso a awu, umarino atuu mewileo asa lewe sawu wungo mongura i wawono.

¹⁴ Umarino atuu domenaao i wawono luwuno parewa anu pinake kana pontunua halo, sarampa, ponsodoli, loea kodei ponsiwui ka luwuno parewano meda pontunua pesomba atuu. I wawono asalakono domewileo pontutuwi inso a ngkuli alusu, umarino atuu pinokona luwuno keu ponselano meda pontunua pesomba atuu.

¹⁵ Mansano i Haruni ka luwuno anano borungio luwuno sangka mempori ka luwuno parewano po'ianga mempori, i tempono pekemaa ta melungka, ka i'amba to Kehati moikoomo dompewinso i larono mentandeo luwuno sangka atuu. Sine, si dontepodanggi saru luwuno sangka mempori atuu, memate ira te'ingka. Gagi onaemo atuu luwuno sangka a Ngkema Tepotowoa anu asalakono domentandeo inuleno i Kehati.

¹⁶ Sine i Eleasari, anano Sando mpesomba Haruni to'oriano lana pompokomewanta, dupa inso a luwuno anu mo'ahi woono, pesomba kaanga anu hinao mpiha ka lana po'urapi. Onae luwu tumembio anggaa mongkona Kema mempori ka luwuno ihino, moiko luwuno sangka mempori maupo parewano.”

¹⁷ Mepau Ira i Ue ndi Musa ka ndi Haruni,

¹⁸ ”Ipekokoongakono koa suku Kehati ka luwuno pepe'etuado kasi domentampula inso i tonga-tongado to Lewi.

¹⁹ Ndiomo anu asalakono iweweuako ira ka dokongko mentuwu ka nahi domemate tempono dome'umpeda a luwuno sangka tedoa mempori: i Haruni ka luwuno anano asalakono mpewinso i larono ka numaa ira singge mia a mpo'iangano anggaano umpeda a sangka anu asalakono ta tinande.

²⁰ Sine siimo dompewinso i larono ira mengkitao luwuno sangka mempori atuu maupo butu sarai, memate ira te'ingka.”

²¹ Mepau Ira i Ue ndi Musa,

²² ”Doaomo mbo'u porokono inuleno i Geresoni montonda pepe'etua ka luwuno sukudo.

²³ Buri iramo anu tinuwuno tolu pulu nta'u ka torea hawe lima pulu nta'u, sompo mia anu temponomo ipo'angga, ka dome'anggao anggaa a Ngkema Tepotowoa.

²⁴ Ndiomo anggaado luwuno sukuno i Geresoni mongkona anggaa ka pontandea sangka atuu:

²⁵ Ondae asalakono mentandeo luwuno tendano Kema Mempori, Kema Tepotowoa saru boruno ka boru inso a ngkuli alusu anu i wawono, sawu pelingo a mpewowano Kema Tepotowoa,

²⁶ luwuno sawu pelingo olotino kintala ka sawu pelingo a mpewowa langkaino kintala anu lumimbuo Kema Mempori ka meda pontunua pesomba, saru kolorono ka luwuno parewano anggaado. Ondae asalakono me'anggao luwuno anggaa anu tekona menggoe saru luwuno atuu.

²⁷ Luwuno anggaado inuleno i Geresoni asalakono wineweu menunu saru parentano i Haruni ka luwuno anano, moiko luwuno anggaa pontandea sangka maupo anggaa atuu. Asalakono iweweu ira ka domentembio luwuno anggaa anu asalakono domentandeo.

²⁸ Onaemo anggaado luwuno suku inuleno i Geresoni a Ngkema Tepotowoa. Asalakono dome'anggao a mpetewawano i Itamari, anano Sando mpesomba Haruni.

²⁹ Inuleno i Merari asalakono uburio montonda luwuno suku a laro mpepe'etuado.

³⁰ Buri iramo anu tinuwuno tolu pulu nta'u ka torea hawe lima pulu nta'u, sompo mia anu temponomo ipo'angga, ka dome'anggao anggaa a Ngkema Tepotowoa.

³¹ Ndiomo anu asalakono domentandeo menggoe saru luwuno anggaado a Ngkema Tepotowoa: luwuno dopino Kema Mempori, luwuno keu montoweano, luwuno karuno, luwuno empehino,

³² luwuno karuno a kintala lumimbuo, luwuno empehino, luwuno pandorano, ka luwuno kolorono, saru luwuno parewano ka luwuno anu tewinso anggaado. Asalakono itisoako ira nte'o'asa parewa anu asalakono domentandeo.

³³ Onaemo anggaado luwuno suku inuleno i Merari, luwuno anggaado a Ngkema Tepotowoa anu asalakono inangga a mpetewawano i Itamari, anano Sando mpesomba Haruni.”

³⁴ I Musa ka i Haruni saru luwuno petewawado bawaa Isaraeli burio inuleno i Kehati montonda luwuno suku a mpepe'etuado,

³⁵ inso anu tinuwuno tolu pulu nta'u ka torea hawe lima pulu nta'u, sompo mia anu temponomo mo'angga a anggaa a Ngkema Tepotowoa.

³⁶ Ondae anu binuri montonda luwuno sukuno, porokono rua nsowu ka pitu etu lima pulu mia.

³⁷ Onaemo atuu luwuno mia anu binuri inso a luwuno sukuno i Kehati, luwuno mia anu me'anggao anggaa a Ngkema Tepotowoa. Ondae doburi ira i Musa ka i Haruni menunu kana petena-Do i Ue telalo ndi Musa.

³⁸ Luwuno mia inuleno i Geresoni anu binuri montonda luwuno suku a laro mpepe'etuado,

³⁹ onaemo anu tinuwuno tolu pulu nta'u ka torea hawe lima pulu nta'u, sompo mia anu temponomo mo'angga a anggaa a Ngkema Tepotowoa.

⁴⁰ Ondae anu binuri montonda luwuno suku a laro mpepe'etuado, porokono rua nsowu ka nomo etu tolu pulu mia.

⁴¹ Onaemo porokono anu binuri inso a luwuno suku inuleno i Geresoni, luwuno mia anu umanggao anggaa a Ngkema Tepotowoa. Ondae doburi ira i Musa ka i Haruni menunu kana petena-Do i Ue.

⁴² Luwuno mia inuleno i Merari anu binuri montonda luwuno suku a laro mpepe'etuado,

⁴³ onaemo anu tinuwuno tolu pulu nta'u ka torea hawe lima pulu nta'u, sompo mia anu temponomo mo'angga a anggaa a Ngkema Tepotowoa.

⁴⁴ Ondae anu binuri montonda luwuno sukudo, porokono tolu nsowu ka rua etu mia.

⁴⁵ Onaemo atuu porokono anu binuri inso a luwuno suku inuleno i Merari. Ondae doburi ira i Musa ka i Haruni, menunu kana petena-Do i Ue telalo ndi Musa.

⁴⁶ Luwuno to Lewi anu binurido i Musa ka i Haruni saru luwuno petewawado to Isaraeli montonda luwuno suku anu a laro mpepe'etuado,

⁴⁷ onaemo luwuno mia anu tinuwuno tolu pulu nta'u ka torea hawe lima pulu nta'u, sompo mia anu asalakono umanggao anggaa mpompekakaakoa ka pontandea sangka a Ngkema Tepotowoa.

⁴⁸ Ondae anu binuri porokono halo nsowu ka lima etu halo pulu mia.

⁴⁹ Menunu kana petena-Do i Ue telalo ndi Musa, singge mia pinoweeako tembiano anggaa a mpompekakaakoa ka pontandea luwuno sangka. Kanandiomo domebinuri kana petena-Do i Ue ndi Musa.