Podoaa 36 - Wunta Mempori

Atora pekombiaado beine anu hinao tia pusaka

¹ Luwuno petewawado anu mpepe'etu inso a nsuku inuleno i Gileadi anano i Makiri anano i Manase, asa inso a luwuno suku inuleno i Yusupu, merangkuhako ka i'amba mepau i arono i Musa, a luwuno petewawa, ka a luwuno petewawa sukudo to Isaraeli,

² dompotae, ”Ondae i Ue parenta komiumo ueku kai weeako ira to Isaraeli wita atuu gagi tia pusaka saru montende undi. Ondae i Ue meparenta Iramo ndi omiu ueku kai peweengakono tia pusakano i Selapehadi, pepaekompomami a luwuno anano anu beine.

³ Sine tewala megagi ira kombiado asa ana ntama inso a nsuku susua i olodo to Isaraeli, asalakono tia pusakano beine atuu ta inala inso a ntia pusakado ama mami ka ta tiniangiako a ntia pusakano suku anu ta pinewinsokino, gagi ta inala inso a ntia pusaka anu inundi ndi omami.

⁴ Tewala hawe ta'u Yobelido to Isaraeli, tia pusakano beine atuu ta tiniangiako a ntia pusakano suku anu ta pinewinsokino ka ta inala inso a ntia pusakano sukudo uempu'umami.”

⁵ Ka i'amba i Musa parenta ira to Isaraeli menunu saru petena-Do i Ue. ”Paudo suku inuleno i Yusupu atuu mentee.

⁶ Ndiomo pau anu peparenta-Do i Ue mongkona luwuno ana beineno i Selapehadi: Moiko domegagi kombiano isemamokoa anu moiko a pongkitado, polo ka domegagi kombia a laro mpepe'etua sukuno amado.

⁷ Tia pusakado to Isaraeli nahi moiko ilinimba inso a nsuku melimba a nsuku susua, hangano singge mia to Isaraeli asalakono uminio tia pusakano sukudo uempu'uno.

⁸ Sompo ana beine i olono luwuno sukudo to Isaraeli anu mohaweomo tia pusaka, asalakono gagi kombiano asa mia inso i olono pe'etu sukuno amano, kai sompo to Isaraeli mohawe tia pusakado uempu'uno.

⁹ Tia pusaka atuu nahi moiko ilinimba inso a nsuku melimba a nsuku susua, hangano singge sukudo to Isaraeli asalakono uminio tia pusakano onaeno.”

¹⁰ Kana anu peparenta-Do i Ue ndi Musa, kanandiomo domeweweuo luwuno ana beineno i Selapehadi.

¹¹ I Mahala, i Tiresa, i Hogela, i Milika ka i Noa, luwuno ana beineno i Selapehadi, gagi kombiado luwuno ana ntama inso a luwuno pepaekompono amado;

¹² ondae megagi kombiado tama inso a luwuno suku inuleno i Manase anano i Yusupu, ranta tia pusakado mo'ia mpiha a nsukudo pe'etuno amado.

¹³ Onaemo atuu parenta ka atora peparenta-Do i Ue a nto Isaraeli molalo i Musa i lembono Moabi i wiwi ngkoro Yarade umpeda i Yeriko.