Podoaa 35 - Wunta Mempori

Luwuno kota tiado to Lewi

¹ Mepau Ira i Ue ndi Musa i lembono Moabi i wiwi ngkoro Yarade umpeda i Yeriko,

² ”Parenta iramo to Isaraeli ka dompeweengakono inso a ntia pusakado a nto Lewi ka dompo'iangario. Luwuno wita pompakambia anu lumimbuo luwuno kota atuu, asalakono impoweeako ira mbo'u to Lewi.

³ Luwuno kota atuu gagi tiado ka dompo'iangario ka luwuno wita pakambiano pinotuwudo ka luwuno pinotuwudo anu susua.

⁴ Wita pompakambia a luwuno kota anu asalakono komiu meweeako ira to Lewi atuu onaemo asa nsowu hiku inso a benteno kota meluarako lumimbuo.

⁵ I bungkuno kota atuu asalakono imesongkao rua nsowu hiku apano i sabaano oleo ka rua nsowu hiku apano i selata ka rua nsowu hiku apano i sumooano oleo saru rua nsowu hiku apano i utara, ranta kota atuu mo'ia i tongano. Onaemo atuu tiado wita pompakambia a luwuno kota.

⁶ Luwuno kota anu asalakono komiu weeako ira to Lewi atuu, onaemo onoo kota pekaduduia anu asalakono impeweengakono, kai anu mompepate mokompolai i ra'ai. Umarino mbo'u atuu asalakono komiu mpeweengakono pato pulu ka orua kota.

⁷ Luwuno kota anu asalakono iweeako ira to Lewi atuu porokono pato pulu ka oalu kota, luwuno saru wita pompakambiano.

⁸ Mongkona luwuno kota anu komiu mpeweengakono inso a wita tiado to Isaraeli: inso a nsuku anu mehadio ira, asalakono impo'ala tehadio, ka anu tedei ira asalakono impo'ala tedei. Sompo suku asalakono mompeweengako a nto Lewi ba te'opia kota montonda hadiono tia pusakano anu tiniaako ndi onae.”

Luwuno kota pekaduduia

⁹ Mepau Ira i Ue ndi Musa,

¹⁰ ”Pepaumo a nto Isaraeli ka potaeako ira: Tewala imensakio koro Yarade te'aro i wita Kana'a

¹¹ asalakono impobiniki ba te'opia kota anu gagi luwuno kota pekaduduiamiu, ka mia mompepate anu mepateo asa mia nahi pe'inungakono mokompolai i ra'ai.

¹² Luwuno kota atuu gagi po'ianga pekaduduiamiu inso a mia anu ta mombalo, kasi mate anu mompepate, se'eluno napi pino'aro a bawaa kai pinaresa.

¹³ Luwuno kota anu pinakosimiu atuu asalakono onoo kota pekaduduiamiu.

¹⁴ Otolu kota asalakono imempakosio i asatowano koro Yarade ka otolu kota asalakono imempakosio i wita Kana'a; luwuno kota pekaduduia.

¹⁵ Onoo kota atuu asalakono gagi po'ianga pekaduduiado to isaraeli, mia hawe ka mia mehawe i olomiu, ka sompo mia anu mompepate asa mia nahi pe'inungako mokompolai i ra'ai.

¹⁶ Sine tewala mia atuu itunduhiakono labu, ranta kai mate mia atuu, onae asa mia puu mpopepate, puu mpopepate atuu manasa hinuku mate.

¹⁷ Tewala mia atuu itunduhiakono watu anu a ngkaeno ka imateakono, onae asa mia puu mpopepate. Puu mpopepate atuu manasa hinuku mate.

¹⁸ Ke tewala itunduhiakono keu a ngkaeno, mia atuu ranta kai mateakono, onae asa mia puu mpopepate. Puu mpopepate atuu manasa hinuku mate.

¹⁹ Mia motuntu pasua rea onaemo anu asalakono mepateo puu mpopepate atuu; asalakono ipepateo tempono itepotowoakono.

²⁰ Tewala mbo'u itunduhio mia atuu hangano i'o'aliaakono ke me'inungako wunoo, ranta kai mate mia atuu,

²¹ ke tewala mia atuu itunduhiakono kaeno hangano teposisalaa, ranta ka imate mia atuu, ka puu mpotunduhi atuu manasa hinuku mate; onae asa mia puu mpopepate; mia anu motuntu pasua rea asalakono mepateo puu mpopepate atuu tempono itepotowoakono.

²² Sine tewala mansa itunduhio mia atuu nahina teposisalaa, ke nahi pe'inungako wunoakono hapamokoa,

²³ ke nahi kitao ipodontai watu anu imateakono mia atuu, ranta ka imate mia atuu, ka hinaano onae nahi teposisalaakono mia atuu ka nahina mbo'u tinoono sumolangio,

²⁴ asalakono bawaa paresao mia mompepate atuu, ka anu motuntu pasua rea, tumondao luwuno songka andio.

²⁵ Bawaa asalakono motolao anu mompepate inso a ngkaeno anu motuntu pasua rea, ka i'amba pinokule i kota pekaduduia, a mpo'ianga polaiano. I tu'aimo asalakono ipo'ia ranta mateano sando mpesomba langkai anu inurapiakoomo lana anu mempori.

²⁶ Sine tewala anu mompepate atuu meluarako inso a ntidano kota pekaduduia a mpolaiano,

²⁷ ka ihaweo anu motuntu pasua rea i bungkuno tidano kota pekaduduiano, ka i'amba anu motuntu pasua rea mepateo mia mompepate atuu, onae nahi pepasua rea,

²⁸ hangano mia mompepate atuu asalakono mo'ia i kota pekaduduia hawe mateano Sando Mpesomba Langkai. Umarino mate Sando Mpesomba Langkai mia mompepate atuu moikoomo ipekule a wita tiano.

²⁹ Luwuno atuu asalakono gagi pompakosi songka ndi omiu ranta hawe a inulemiu a luwuno po'iangamiu.

³⁰ Sompo mia anu mompepate mia, asalakono pinepate kana puu mpopepate montonda pompaudo luwuno sakosii. Butu asa mia sakosii nahi sompo a laro ngkara-kara pohuku mate.

³¹ Siimo mpotarima doi pontolosi hangano penaano asa mia mompepate anu salano menunu saru pohuku mate, sine manasaomo onae hinuku mate.

³² Kasi mpotarima mbo'u doi pontolosi inso a mia anu molaiomo a ngkota pekaduduiano, kai pekule koa mo'ia i witano napi mate Sando Mpesomba Langkai.

³³ Si mensosa'orio wita po'iangamiu, hanganomo rea anu sumosa'orio wita atuu. A wita atuu nahi pinokompoweweuako pesintuwua, hangano rea anu te'uwu i ra'ai, sangkadio saru reano mia anu umuwuomo.

³⁴ Si mpokomokoburuo wita po'iangamiu, anu i tonga-tongano Kupo'ia, hangano Ongkue, Ue, mo'ia i tonga-tongado to Isaraeli.”