Podoaa 34 - Wunta Mempori

Luwuno tida wita Kana'a

¹ Mepau Ira i Ue ndi Musa,

² ”Parenta iramo to isaraeli ka potaeako iramo: Tewala mpewinso komiu i wita Kana'a, ndiomo wita anu ta gagi tia pusakamiu, wita Kana'a montonda luwuno tidano.

³ Apano i selatamiu onaemo inso i pada one Sini mewiwino i Edomi. Gagi tida i selatamiu mompu'u inso i untuno Tahi me'ohia i sabaano oleo.

⁴ Ka i'amba melengkuako i selatano porakea Akarabi, motilalo i Sini ka metompaako i selatano Kadesi-Baranea. Umarino humaweo Hasari-Adari, tida atuu motilalo i Asimoni.

⁵ Ka i'amba tida atuu melengkuako inso i Asimoni a ngkoro Masiri ka metompaako i tahi.

⁶ Tidamiu i sumooano oleo: Tahi Langkai ka wiwino; onaemo atuu tidamiu i sumooano oleo.

⁷ Ndiomo tidamiu i utara: mompu'u inso i Tahi Langkai asalakono impoweweu tondonino tida hawe a ntorukuno Hore,

⁸ inso a ntorukuno Hore asalakono impoweweu tondonino tida a nsala te'aro i Hamati, ka i'amba tida atuu metompaako i Sedadi.

⁹ Ka i'amba tida atuu ihaweo Sipiruni ka metompaako i Hasara-Enani; onaemo tidamiu i utara.

¹⁰ Asalakono impoweweu tondonino tida i sabaano oleo inso i Hasari-Enani te'aro i Sepami.

¹¹ Inso i Sepami tida atuu metii i Ribela, i sabaano oleo Aini; ka i'amba tida atuu metii mbo'u ka ihaweo wingke rano Kinereti i sabaano oleo.

¹² Ka i'amba tida atuu metii a ngkoro Yarade ka metompaako i Tahi me'ohia. Onaemo witamiu saru luwuno tida lumimbuo.”

Luwuno petewawa anu tumiao wita Kana'a

¹³ I Musa parenta ira to Isaraeli, ”Naemo atuu wita anu komiu mentiao gagi tia pusaka saru montende undi anu pinarenta-Do i Ue ka domewineeako osio ka entonga suku.

¹⁴ Hangano suku inuleno i Rube montonda pepe'etuado ka suku inuleno i Gadi montonda pepe'etuado, suku Manase mbo'u anu entonga atuu mpotarima iramo tia pusakado.

¹⁵ Orua ka entonga suku atuu mpontarima iramo tia pusakado i asatowano koro Yarade umpeda i Yeriko, i sabaano oleo.”

¹⁶ Mepau Ira i Ue ndi Musa,

¹⁷ ”Ndiomo needo luwuno mia anu asalakono tumiao wita atuu ndi omiu gagi tia pusaka: sando mpesomba Eleasa ka i Yosua anano i Nuni.

¹⁸ Asalakono impo'ala mbo'u asa petewawa inso a sompo suku ka domentiao wita atuu gagi tia pusaka.

¹⁹ Ndiomo needo luwuno mia atuu: i Kalebi anano i Yepune inso a nsuku Yehuda;

²⁰ i Samueli anano i Amihudi inso a nsuku inuleno i Simeo;

²¹ i Elidadi anano i Kisiloni inso a nsuku Benami;

²² i Buki anano i Yogili, asa petewawa inso a nsuku inuleno i Dani,

²³ inso a luwuno anano i Yusupu, i Hanieli anano i Epodi asa petewawa inso a nsuku inuleno i Manase,

²⁴ ka i Kemueli anano i Sipatani, asa petewawa inso a nsuku inuleno i Eparai;

²⁵ i Elisapani anano i Paranahi asa petewawa inso a nsuku inuleno i Sebulo;

²⁶ i Palitieli anano i Asani, asa petewawa inso a nsuku inuleno i Isakari;

²⁷ i Ahihudi anano i Selomi, asa petewawa inso a nsuku inuleno i Asere;

²⁸ i Pedaeli anano i Amihudi, asa petewawa inso a nsuku inuleno i Napatali.

²⁹ Onaemo atuu luwuno mia anu pinarenta-Do i Ue ka domentiao tia pusaka a nto Isaraeli i wita Kana'a.”