Podoaa 32 - Wunta Mempori

Wita i sabaano oleo koro Yarade pineweengako

¹ Inuleno i Rube ka inuleno i Gadi hadio pinotuwudo, nahi pinokopau hadiono. Mansado kumitao wita Yaeseri ka wita Gileadi, tengkitaomo po'ianga atuu moiko ntu'u pompekariaa pinotuwu.

² Ka i'amba inuleno i Gadi ka inuleno i Rube aiwa ndi Musa, sando mpesomba Eleasa ka a luwuno petewawado bawaa, dompotae,

³ ”I Ataroti, i Diboni, i Yaeseri, i Nimira, i Hesiboni, i Eleale, i Sebami, i Nebo ka i Beoni,

⁴ wita anu Donangiomo i Ue tiado bawaa Isaraeli, moiko ntu'u pompekariaa pinotuwu ka luwuno atamiu andio hinao pinotuwu.”

⁵ Dompotae mbo'u, ”Tewala ipehohawa kami, po'ineeomo wita andio i wineeako a luwuno atamiu andio gagi tiamami. Siimo itena kami mpelimba i asa towano koro Yarade.”

⁶ Isangki ira i Musa a inuleno i Gadi ka a inuleno i Rube, ”Kana'umpe luwudo pepaekompomiu melako mpetea ka omiu mpo'ia i ndi'ai?

⁷ Tembio ka impokomoteweo aroado to Isaraeli mensaki lumako a wita anu Doweeako ira i Ue?

⁸ Kanandio koa mbo'u anu wineweudo amamiu, tempono kutena ira inso i Kadesi-Baranea ka domempadasoo wita atuu.

⁹ Mpelempa ira hawe i lembono Esikoli, mempadasoo wita ka mokomoteweo aroado to Isaraeli, ranta nahi domebehe melako a wita anu Doweeako ira i Ue.

¹⁰ Tesingkaomo tekuda-Do i Ue i tempo atuu ka Dopesumpa:

¹¹ Menteeano luwuno mia anu mpelempa inso i Masiri, anu tinuwuno rua pulu nta'u ka torea, nahi ta kumitao wita anu Kudandiakono sumpa ndi Burahima, ndi Saki ka ndi Yako, hangano nahi domentonda Aku tompaano aroado,

¹² sangkadio i Kalebi anano i Yepune to Kenasi ka i Yosua anano i Nuni, hangano dotonda Ira i Ue tompaano aroado.

¹³ Tekuda-Do i Ue tensilaomo a nto Isaraeli, onaemo ka Doweweu ira mpetanggolili i pada one pato pulu nta'u tehineno, ranta ka ipingko luwuno mia anu mpoweweu mosa'o a pongkita-Do i Ue.

¹⁴ Kitaomo, kanandio-andio mpentade komiu umeu ira amamiu, tepumpuado mia mentehala, tumiangio mbo'u tekuda-Do i Ue anu tensila a nto Isaraeli atuu.

¹⁵ Tewala mpewolili komiu mebungkui Ira, Ira mo'inee komiu ta tehine mbo'u i pada one, ka komiu mpowawa ropuano luwuno tongku andio.”

¹⁶ Ka do'amba mperangkuhako ndi onae ka dompotae, ”Kami mpowangu rahado bawaa bembe bimba i ndi'ai po'iangado pinotuwu mami ka luwuno kota po'iangado ana mami anu da kodei.

¹⁷ Sine, omami kami mpesangka mpetea ka ronga mpelempa i arodo to Isaraeli, ranta kami wawa ira a mpo'iangado. Kontongaano atuu luwuno ana kodei mami ira mpo'ia i larono luwuno kota mebente tekadudui inso a mpalilino wita andio.

¹⁸ Nahi kami mpekule i rahamami, kai sompo to Isaraeli mohawe tia pusakado;

¹⁹ hangano nahi kami mebehe mpontarima tia pusaka i asatowano koro Yarade i ra'ai ka iraane, tewala mpohawe kami tia pusaka i asatowano koro Yarade i ndi'ai, i sabaano oleo.”

²⁰ Ka i'amba motaeomo i Musa ndi ondae, ”Tewala komiu mpoweweu kanatuu, tewala komiu mpesangka mpetea ka impetea i aro-Do i Ue,

²¹ ka sompo mia inso ndi omiu anu mpesangka mpetea ta sumakio koro Yarade i aro-Do i Ue, ranta ka Dosaari ira iwali-Do inso i aro-Do,

²² ranta wita atuu metenunu i aro-Do i Ue, ka tewala lembuino mpekule komiu, asalakono bebasi komiumo inso a parenta-Do i Ue ka a nto Isaraeli, ka wita mbo'u andio ta gagi tiamiu i aro-Do i Ue.

²³ Sine tewala nahi mpoweweu kanatuu, mentee ntu'u ntehala komiu ndi Ondae i Ue, ka komiu mpopembasai, nine halamiu atuu ta umalukomiu.

²⁴ Imewangu iramo kota tiado anamiu ka rahado bawaa bembe bimbamiu, ka imeweweuomo hapa anu pinaumiu.”

²⁵ Onaemo ka dompotae inuleno i Gadi ka inuleno i Rube atuu ndi Musa, ”Luwuno atamiu andio ira meweweuo kana parentamiu ueku.

²⁶ Luwuno ana ka beine mami, pinotuwu mami ira mpo'ia i ndi'ai a luwuno kota Gileadi,

²⁷ sine, luwuno atamiu anu mesangka mpetea ta metea, ira mensaki i aro-Do i Ue ka mpetea, kana anu pinaudo ueku.”

²⁸ Ka i'amba i Musa mompowee parenta mongkona ondae ndi sando mpesomba Eleasa ka ndi Yosua anano i Nuni ka a luwuno petewawado anu mpepe'etu inso a luwuno suku Isaraeli.

²⁹ Motae i Musa ndi ondae, ”Tewala inuleno i Gadi ka inuleno i Rube, luwuno mia anu mesangka mpetea ta metea, domensakiomo koro Yarade meronga omiu ka impetea i aro-Do i Ue, ka tewala wita atuu metenunuomo ndi omiu, ka asalakono imeweeako ira wita Gileadi gagi tiado.

³⁰ Sine, tewala nahi dompesakiako saru mpesangka mpetea meronga omiu, asalakono ira mpotarima wita tiado i tonga-tongamiu i wita Kana'a.”

³¹ Ka do'amba mesangki inuleno i Gadi ka inuleno i Rube, ”Hapa anu pinau-Do i Ue a luwuno atamiu andio kami koa meweweuo.

³² Kami koa mpesakiako saru mpesangka mpetea i aro-Do i Ue melako i wita Kana'a, sine ndi omami tepakosiomo wita tia pusakamami i asatowano i ndi'ai koro Yarade.”

³³ Ka i'amba a inuleno i Gadi, a inuleno i Rube ka a entongano suku Manase inuleno i Yusupu iweeako iramo i Musa poparentaano i Sihoni, mokoledo to Amori ka poparentaano i Ogo, mokole i Basani, moiko witado maupo luwuno kotano i asa wawo wita atuu, tewinso luwuno wita petengi-tengino kota atuu.

³⁴ Domewanguomo inuleno i Gadi: Diboni, Ataroti, Aroeri,

³⁵ Ataroti-Sopani, Yaeseri, Yogobeha,

³⁶ Beti-Nimara, Beti Harani, luwuno kota mebente ka po'iangano luwuno raha mpinotuwu bawaa bembe bimba.

³⁷ Inuleno i Rube wanguo Hesiboni, Eleale, Kiriataimi,

³⁸ Nebo mbo'u, Ba'ala-Meoni, anu ineu neeno, saru Sibima. Dompoponeeo susua luwuno kota winangudo.

³⁹ Inuleno i Makiri anano i Manase lumako i Gileadi; dompoko'alao ka dosaari ira to Amori anu mekongko i ra'ai.

⁴⁰ Ka i'amba i Musa meweengakono Gileadi ndi Makiri anano i Manase anu lembuino mpo'ia i ra'ai.

⁴¹ I Yairi anano i Manase, lumako mongko'alao luwuno inia kodeino ka ineeakono Hawoti-Yairi.

⁴² I Nobahi lumako mongko'alao Kenati saru luwuno ana kotano ka ineeakono Nobahi montonda neeno onaeno.