Podoaa 31 - Wunta Mempori

Pombaloa a nto Midia

¹ Mepau Ira i Ue ndi Musa,

² ”Weweuomo pombaloado to Isaraeli a nto Midia; ka u'amba pinumpu saru uempu'umu.”

³ Ka i'amba mepauomo i Musa a tongku atuu, ”Moikoomo bate'opia mia inso i olomiu mompatinda sangka peteano ta metea, ka dome'ewaio Midia ka mpeleluakono pombalo-Do i Ue a nto Midia.

⁴ Inso a sompo suku i olodo luwuno suku Isaraeli, asalakono impontena asa nsowu mia anu ta metea.”

⁵ Ka i'amba inso a luwuno sukudo to Isaraeli pineweengako asa nsowu mia inso a sompo suku, luwuno hopulu ka orua nsowu mia mesangka petea anu ta metea.

⁶ Ka i'amba i Musa tumena ira ka dompetea, asa nsowu mia inso a sompo-sompo suku, meronga saru i Pineha, anano sando mpesomba Eleasa anu mowawa parewano po'ianga mempori ka luwuno napiri pompowee uni pepopoto'ori.

⁷ Ka do'amba mpetea umewaio Midia kana peparenta-Do i Ue ndi Musa, ka mepate ira luwu tamado.

⁸ Sangkadio luwuno mia anu mempinepate atuu, dompepateo mbo'u Mokole Ewi, i Rekemi, i Suri, i Huri ka i Reba, olima mokoledo to Midia. Ondae mbo'u mpepateakono ponai i Bilea anano i Beori.

⁹ Ka do'amba to Isaraeli mentawa ira beinedo to Midia ka luwuno anado saru mempomuruo luwuno pinotuwu ka pompolido.

¹⁰ Luwuno kota po'ianga saru luwuno pekemaado tinunu.

¹¹ Dome'alao luwu pinomuru ka rinontu onaemo mia ka pinotuwu,

¹² saru wawa ira tinawa, rinontu ka pinomuru atuu ndi Musa, sando mpesomba Eleasa ka a bawaa Isaraeli, a mpekemaa i lembono Moabi, i wiwino koro Yarade umpeda i Yeriko.

¹³ I Musa, sando mpesomba Eleasa, ka luwuno petewawado bawaa atuu melako mbo'u tumotowo ira hawe i bungkuno pekemaa.

¹⁴ Ka i'amba tekudaomo i Musa a luwuno petewawado sorodadu atuu, a luwuno petewawado asa nsowu sorodadu ka a mpetewawado asa etu sorodadu anu mpekule inso a mpeteaa,

¹⁵ ka ipotaeako ira, ”Tembio kai mpo'inee ira luwu beine andio mentuwu?

¹⁶ Komba luwuno beine andio ke, a mpatuduno i Bilea gagi pompu'uano to Isaraeli nahi dompetenunu ndi Ondae i Ue anu gagi ndi Peori, ranta kai petii pohuku umalu ira bawaa-Do i Ue.

¹⁷ Kanandio-andio pepate iramo luwu ana ntama anu da kodei. Luwuno beine anu horiomo mewowaliako tama, asalakono impepate ira mbo'u.

¹⁸ Sine, luwuno ana beine anu da kodei anu napi hori mewowaliako tama, asalakono impo'inee ira mentuwu tiamiu.

¹⁹ Ka omiu impekemamo i larono opitu oleo i bungkuno pekemaa; sompo mia anu mompepateomo mia ke anu modanggi mia anu pinepate asalakono i'oninio halano inso a ngkoroino ia oleo ko'otolu ka ko'opitu, moiko omiu maupo tinawamiu.

²⁰ Kanatuu koa mbo'u sompo sangka ka sompo sangka kuli, sompo sangka anu wineweu inso a wulu bembe ka sompo sangka keu asalakono pinokomempori.”

²¹ Ka i'amba sando mpesomba Eleasa motaeako ira sorodadu anu melako iramo mpetea atuu, ”Ndiomo pompakosi songka peparenta-Do i Ue ndi Musa.

²² Butu wulaa, salaka, mala, labu, tima mopute ka tima mo'ito,

²³ luwuno anu nahi kaano api, asalakono imewinsoo a laro api, kai gagi morina; sine luwuno atuu asalakono pinokomemporiako mbo'u uwoi pompokomorina; ka luwuno anu ipokokaano api asalakono ime'emoo a laro uwoi.

²⁴ Asalakono imelomboo mbo'u sangkamiu ia oleo ko'opitu, kai memorina ka umarino atuu moikoomo impewinso a mpekemaa.”

Atora mongkona pinomuru

²⁵ Mepau Ira i Ue ndi Musa,

²⁶ ”Omue, sando mpesomba Eleasa ka luwuno petewawado pepe'etuado bawaa, imedoaomo hadiono rinontu anu winawaomo, moiko mia maupo pinotuwu.

²⁷ Umarino atuu asalakono imentiao rinontu atuu gagi orua, tiado sorodadu mpesangka petea anu mpeluarako iramo mpetea, ka tiado luwuno bawaa.

²⁸ Inso a luwuno sorodadu anu mpeluarako mpetea atuu, asalakono pompesusuaako ira peki'ue ndi Ondae i Ue, asa inso a sompo lima etu mia, sapi, kalide maupo asa bawaa bembe bimba.

²⁹ Asalakono alao inso a ntia anu entonga atuu anu pinoko'alado, ka i'amba meweengakono ndi sando mpesomba Eleasa, gagi pesomba pinesusua ndi Ondae i Ue.

³⁰ Sine inso a ntia anu entonga mbo'u tiado to Isaraeli, asalakono alao asa inso a sompo lima pulu mia, sapi, kalide, asa bawaa bembe bimba, maupo luwuno pinotuwu susua, ka i'amba meweengakono luwuno a nto Lewi anu mpo'angga i Kema Mempori-Do i Ue.”

³¹ Ka i'amba i Musa ka sando mpesomba Eleasa weweuo kana parenta-Do i Ue ndi Musa.

³² Ka rinontu anu torea inso a hapa anu dompomuruomo sorodadu atuu porokono nomo etu ka pitu pulu ka olima nsowu bembe bimba,

³³ pitu pulu ka orua nsowu sapi,

³⁴ ka nomo pulu ka asa nsowu kalide,

³⁵ saru luwuno beine anu napi hori mewowaliako tama, luwuno tolu pulu ka orua nsowu mia.

³⁶ Tia anu entongano tiado anu mpeluarako iramo mpetea atuu porokono, tolu etu ka tolu pulu ka opitu nsowu ka lima etu bembe bimba.

³⁷ Gagi, peki'ue ndi Ondae i Ue inso a asa bawaa bembe bimba atuu nomo etu ka pitu pulu ka olima;

³⁸ sapi tolu pulu ka onoo nsowu, gagi peki'ue ndi Ondae i Ue, pitu pulu ka orua sapi;

³⁹ kalide tolu pulu nsowu ka lima etu, gagi peki'ue ndi Ondae i Ue, nomo pulu ka asa kalide;

⁴⁰ ka mia hopulu ka onoo nsowu mia, gagi peki'ue ndi Ondae i Ue, tolu pulu ka orua mia.

⁴¹ Ka i'amba i Musa meweengakono peki'ue anu pinesusua tia-Do i Ue ndi sando mpesomba Eleasa, kana parenta-Do i Ue ndi Musa.

⁴² Tia anu entongano, tiado to Isaraeli iponsiao i Musa inso a ntiado mia anu mpetea iramo atuu.

⁴³ Tia anu entongano tiado bawaa atuu: asa bawaa bembe bimba tolu etu ka tolu pulu ka opitu nsowu ka lima etu,

⁴⁴ sapi tolu pulu ka onoo nsowu,

⁴⁵ kalide tolu pulu nsowu ka lima etu,

⁴⁶ ka mia hopulu ka onoo nsowu.

⁴⁷ Ka i'amba i Musa umalao inso a ntia anu entongano tiado to Isaraeli atuu asa inso a sompo lima pulu, moiko mia maupo pinotuwu, ka i'amba meweengakono luwuno a nto Lewi anu mpo'angga i Kema Mempori, kana parenta-Do i Ue ndi Musa.

⁴⁸ Ka i'amba luwuno petewawado sorodadu asa nsowu ka sorodadu asa etu, luwuno petewawado sorodadu atuu, me'umpeda ndi Musa

⁴⁹ ka dompotaeakono, ”Luwuno atamiu andio umariomo medoao hadiono sorodadu anu i totono pabawa mami ka nahina maupo te'asa mia inso ndi ondae anu linalo.

⁵⁰ Onaemo pu'uno kimpesombaakono gagi pesomba ndi Ondae i Ue, hapa anu singge hinawe mami, onaemo luwuno sangka wulaa, mala-mala ngkaru, mala-mala ngkae, sinsi pontondoni, tole-tole ka enu-enu poweweu pesintuwua tiano koroimami ndi Ondae i Ue.”

⁵¹ I Musa ka sando mpesomba Eleasa tumarimao wulaa atuu inso ndi ondae, luwuno sangka wineweuno kae.

⁵² Ka do'amba wawao i aro-Do i Ue luwuno wulaa pesomba pinesusua inso a luwuno petewawado sorodadu asa nsowu ka sorodadu asa etu, mobeano hopulu ka onoo nsowu pitu etu ka lima pulu sikala.

⁵³ Sine luwuno sorodadu atuu singge iramo mpo'ala pinomuru tiado ondaedo.

⁵⁴ Mansado tumarimao i Musa ka sando mpesomba Eleasa wulaa inso a luwuno petewawado sorodadu asa nsowu ka sorodadu asa etu, dowawao i larono Kema Tepotowoa gagi pepopoto'ori rumambe ira to Isaraeli i aro-Do i Ue.