Podoaa 3 - Wunta Mempori

Peburiado luwuno to Lewi

¹ Ndiomo inuleno i Haruni ka i Musa i tempono Dopepau i Ue ndi Musa i torukuno Sinai.

² Needo luwuno anano i Haruni, onaemo i Nadabi anu aka, ka i'amba i Abihu, i Eleasari, ka i Itamari.

³ Onaemo atuu needo luwuno anano i Haruni, luwuno sando mpesomba anu inurapi, anu umariomo rinonso ka domegagi sando mpesomba.

⁴ Sine i Nadabi ka i Abihu mate iramo i aro-Do i Ue i pada one Sinai, tempono dompompesombaako api anu susua i aro-Do i Ue. Ondae nahi dope'ana. Gagi asa ntinuwuno i Haruni, amado, i Eleasari ka i Itamari anu uminio potoro sando mpesomba.

⁵ Mepau Ira i Ue ndi Musa,

⁶ ”Tena iramo suku Lewi me'aiwa i arono sando mpesomba Haruni, ka dompekakaakono.

⁷ Asalakono dome'anggao luwuno anggaa ndi Haruni ka a luwuno bawaa i arono Kema Tepotowoa saru me'anggao anggaa a Ngkema Mempori.

⁸ Ondae asalakono mpekakaakono luwuno parewano Kema Tepotowoa, ka me'anggao luwuno anggaa a nto Isaraeli saru mpo'angga a Ngkema Mempori.

⁹ To Lewi asalakono peweengakono ndi Haruni ka luwuno anano. Inso i olodo to Isaraeli, ondaemo luwu anu pineweengako ndi ondae.

¹⁰ I Haruni ka luwuno anano asalakono tena ira ka dome'inio anggaa sando mpesomba, sekono mia biasa anu merangkuhako, asalakono hinuku mate.”

¹¹ Mepau Ira i Ue ndi Musa,

¹² ”Menteeano Ku'ala ira to Lewi inso i olodo to Isaraeli gagi euno luwuno anado anu aka, anu hina amba-ambano inso a pe'anakaa, ka to Lewi gagi mia-Ku.

¹³ Hangano Ongkuemo anu me'ueo luwuno ana amba-ambano. I tempono Kupepate ira luwu ana amba-ambano i wita Masiri, Kupokomemporio tia-Ku luwuno ana amba-ambano i Isaraeli, moiko inso a mia maupo inso a mpinotuwu. Luwuno atuu tia-Ku. Ongkuemo Ue.”

¹⁴ Mepau Ira i Ue ndi Musa i Pada one Sinai,

¹⁵ ”Buriomo inuleno i Lewi montonda pepe'etuno ka luwuno susudo. Luwuno tama anu tinuwuno asa wula ka torea asalakono burio.”

¹⁶ Onaemo kai buri ira i Musa menunu saru petena-Do i Ue, kana parenta-Do ndi onae.

¹⁷ Ndiomo needo luwuno anano i Lewi: i Geresoni, i Kehati, ka i Merari.

¹⁸ Ndiomo needo luwuno anano i Geresoni ka luwuno sukudo, onaemo i Libina ka i Simei.

¹⁹ Luwuno anano i Kehati ka luwuno sukudo, onaemo i Amarami, i Yisihari, i Heberoni ka i Usieli.

²⁰ Luwuno anano i Merari ka luwuno sukudo, onaemo i Mahali ka i Musi. Ndiomo luwuno sukudo to Lewi anu kongko a laro pepe'etuado.

²¹ Inuleno i Geresoni onaemo inso a nsuku Libina ka suku Simei; Onaemo atuu luwuno sukuno i Geresoni.

²² Porokono luwuno tama anu tinuwuno asa wula ka torea tempono binuri, hinao pitu nsowu ka lima etu mia.

²³ Luwuno sukuno i Geresoni andio mpekema i bungkuno Kema Mempori, i sumooano oleo.

²⁴ Petewawado inuleno i Geresoni, onaemo i Eliasapi anano i Laeli.

²⁵ Anu asalakono dompekakaakono inuleno i Geresoni i larono Kema Tepotowoa, onaemo Kema Mempori, kema saru boruno, sawu pelingo pewowano Kema Tepotowoa,

²⁶ luwuno sawu pelingo po'oloti kintala ka sawu pelingo pewowano kintala anu lumimbuo Kema Mempori ka meda pontunua pesomba ka kolorono, tewinso luwuno anggaa anu hinao penggoeno saru luwuno atuu.

²⁷ Inuleno i Kehati onaemo inso a nsuku Amarami, suku Yisihari, suku Heberoni ka suku Usieli; onaemo luwuno suku Kehati.

²⁸ Porokono luwuno tama anu tinuwuno asa wula ka torea tempono binuri hinao halo nsowu ka nomo etu mia. Ondae anu mpopekakaako luwuno sangka mempori.

²⁹ Luwuno suku inuleno i Kehati andio mpekema i horino Kema Mempori, te'alaako i selata.

³⁰ Petewawado inuleno i Kehati ka luwuno sukuno, onaemo i Elisapani anano i Usieli.

³¹ Anu asalakono dompekakaakono, onaemo burua pedandia, meda, hulu mekaru, luwuno meda pontunua pesomba, parewano po'ianga mempori anu pinake a mpoweweua pesomba, tewinso sawu pelingo ka luwuno anggaa anu hinao penggoeno saru luwuno atuu.

³² Anu gagi petewawado to Lewi anu lalu i wawono, onaemo i Eleasa, anano sando mpesomba Haruni. Onae dumagai ira anu mpompekakaako luwuno sangka mempori.

³³ Inuleno i Merari, onaemo inso a nsuku Mahali ka suku Musi; onaemo atuu luwuno suku Merari.

³⁴ Porokono luwuno tama anu tinuwuno asa wula ka torea tempono binuri, hinao nomo nsowu ka rua etu mia.

³⁵ Petewawado inule a luwuno suku Merari, onaemo i Surieli anano i Abihaili. Ondae mpekema i horino Kema Mempori te'alaako i utara.

³⁶ Inuleno i Merari tinena mpompekakaako dopino Kema Mempori, keu montoweano, luwuno karuno, empehino, luwuno parewano, tewinso luwuno anggaa anu menggoe saru luwuno atuu,

³⁷ karuno limbu kintala, empehino, pandora ka kolorono.

³⁸ Anu mpekema i arono Kema Mempori i sabaano oleo, i arono Kema Tepotowoa, te'alaako a mpesabaakoano oleo, onaemo i Musa ka i Haruni saru luwuno anano. Ondae me'anggao anggaa pekakaakoano po'ianga memporido to Isaraeli. Mia biasa anu merangkuhako, asalakono hinuku mate.

³⁹ Luwuno to lewi, luwuno tama anu tinuwuno asa wula ka torea anu binurido i Musa ka i Haruni menunu saru petena-Do i Ue, montonda luwuno sukudo, porokono luwuno rua pulu ka orua nsowu mia.

⁴⁰ Mepau Iramo i Ue ndi Musa, ”Buriomo luwuno ana akado tama to Isaraeli anu tinuwuno asa wula ka torea, ka u'amba dumoao luwuno needo.

⁴¹ Ala iramo to Lewi tia-Ku gagi euno luwuno ana aka i olodo to Isaraeli, ka mbo'u pinotuwudo to Lewi euno luwuno ana aka i olono pinotuwudo to Isaraeli. Ongkuemo Ue.”

⁴² Iburi iramo i Musa luwuno ana aka i olodo to Isaraeli, kana parenta-Do i Ue ndi onae.

⁴³ Luwuno ana aka tama tinuwuno asa wula ka torea, anu binuri neeno, porokono rua pulu ka orua nsowu ka rua etu pitu pulu ka otolu mia.

⁴⁴ Mepau Ira i Ue ndi Musa,

⁴⁵ ”Ala iramo to Lewi gagi euno luwuno ana amba-ambano i olodo to Isaraeli, pinotuwudo mbo'u to Lewi gagi euno pinotuwudo, ka to Lewi atuudo gagi mia-Ku. Ongkuemo Ue.

⁴⁶ Gagi tolosino rua etu ka pitu pulu ka otolu ana akado to Isaraeli anu lumaloio porokono to Lewi atuu,

⁴⁷ omue asalakono mo'ala a sompo mia olima sikala. Omue asalakono umalao montonda sikala a po'ianga mempori anu mobeano rua pulu gera.

⁴⁸ Salaka atuu weeakono i Haruni ka luwuno anano gagi tolosino polaluano porokono mia atuudo.”

⁴⁹ Ka i'amba i Musa umalao doi pontolosi inso a luwuno mia anu porokono lumaloi ira anu domentolosiomo to Lewi.

⁵⁰ Inso a luwuno anado anu aka to Isaraeli i'alao salaka atuu hadiono asa nsowu ka tolu etu nomo pulu ka olima sikala, kinati montonda sikala a po'ianga mempori.

⁵¹ I Musa meweengakono doi atuu ndi Haruni ka a luwuno anano menunu saru petena-Do i Ue, kana parenta-Do i Ue ndi Musa.