Podoaa 27 - Wunta Mempori

Tia pusakado ana beine

¹ Luwuno ana beineno i Selapehadi anano i Heperi anano i Gileadi anano i Makiri anano i Manase te'inso a nsuku Manase anano i Yusupu. Needo luwuno anano atuu: i Mahala, i Noa, i Hogia, i Milika ka i Tiresa. Mperangkuhako ira

² ka do'amba mpentade i arono i Musa ka sando mpesomba Eleasa, i arodo luwuno petewawa ka luwuno bawaa umpeda a mpewowano Kema Tepotowoa, ka dompotae,

³ ”Ondae ama mami mate iramo i pada one, maupo nahi dotewinso a laro bawaa anu ntepo'asa umewai Ira i Ue, a laro bawaa mpetonda ndi Kora. Menteeano mate iramo hangano halado ondaedo ka nahi dope'ana ntama.

⁴ Tembio needo ama mami kai tetadi inso a ntonga-tongano sukudo, butu hangano nahi dope'ana ntama? Ipowee kamimo wita tiamami i olodo pepaekompodo ama mami.”

⁵ Ka i'amba i Musa mohaweo teweweudo atuu i aro-Do i Ue.

⁶ Mepau Iramo i Ue ndi Musa,

⁷ ”Paudo ana beineno i Selapehadi atuu mentee. Omue lano asalakono moweeako ira wita pusaka i olodo pepaekompono amado. Asalakono ka upolimbao ndi ondae tia pusakano amado.

⁸ A nto Isaraeli asalakono potaeako ira: Tewala asa mia mate nahina anano tama, asalakono impolimbao tia pusakano a anano beine.

⁹ Tewala nahina anano beine, asalakono tia pusakano imeweeako ira pepaekompono anu tama.

¹⁰ Tewala nahina tama pepaekompono, asalakono tia pusakano atuu impeweengakono a mpepaekompono amano anu tama.

¹¹ Tewala amano nahina tama pepaekompono, asalakono tia pusakano atuu impeweengakono a mpe'etuno anu lalu umpeda inso i olodo anu mpepe'etu, ka ipe'ueo.” Onaemo anu asalakono gagi pompakosi songka a nto Isaraeli, kana anu parenta-Do i Ue ndi Musa.

I Yosua pinotoro

¹² Mepau Ira i Ue ndi Musa, ”Pewuatakomo a ntorukuno Abarimi andio, ka kitaomo wita anu Kuweeako ira to Isaraeli.

¹³ Umarimu kumitao, komopinumpu saru uempu'umu, mengkena kana i Haruni, akamu.

¹⁴ Hangano i tempono pe'u'uado bawaa i pada one Sini, orua komiu i'ewaiomo petena-Ku mokomengkaao mempori-Ku mongkona uwoi atuu i arodo.” Onaemo mata uwoi Meriba umpeda i Kadesi i pada one Sini.

¹⁵ Ka i'amba i Musa mepau ndi Ondae i Ue,

¹⁶ ”Po'ineeomo Ondae iUe, Ue Alano penaa a luwuno anu tuwu, Ipompotoromo te'asa mia a bawaa andio

¹⁷ anu mo'ia i arodo tempono dompelungka mpetea ka mpekule, anu mokompelungka ira ka mokule ira, bawaa-Do i Ue kasi kana bimba anu nahina puu mpopakambi.”

¹⁸ Ka Do'amba mepau i Ue ndi Musa, ”Alaomo i Yosua anano i Nuni, asa mia anu bukeako penaa, naaomo kaemu i wawono.

¹⁹ Tenaomo ka ipentade i arono sando mpesomba Eleasa ka luwuno bawaa, ka potoroomo i arodo.

²⁰ Weeakonomo asa ntia inso a mpabawamu, ka domperorongeakono luwuno bawaa Isaraeli

²¹ Asalakono ka ipentade i arono sando mpesomba Eleasa, ka ipesikenoakono i Eleasa pomputusi molalo Urimi i aro-Do i Ue. A mpetenano i Yosua saru luwudo to Isaraeli, luwuno bawaa atuu, ira mpelungka ka a mpetenano ira mpekule.”

²² Ka i'amba weweuo i Musa kana peparenta-Do i Ue ndi onae. Ipoboio i Yosua ka itenao mentade i arono sando mpesomba Eleasa ka luwuno bawaa atuu.

²³ Inaao kaeno i wawono i Yosua ka ipotoroo, kana anu pinau-Do i Ue telalo ndi Musa.