Podoaa 25 - Wunta Mempori

To Isaraeli mpopesombai Baala-Peori

¹ Kontongaado to Isaraeli mpo'ia i Sitimi, mpopu'u iramo tongku atuu mponsosabo saru beinedo to Moabi.

² Do'oluako ira tongku atuu metondao gau mpesomba a mpinesombaido ka tongku mbo'u atuu mpetonda ira mpongkaa saru mpesombaio pinesombaido.

³ Mansado to Isaraeli mpe'ini moroso ndi Baala-Peori, tesingkaomo tekuda-Do i Ue a nto Isaraeli.

⁴ Ka i'amba mepau Ira i Ue ndi Musa, ”Rako iramo luwuno petewawado tongku atuu ka ndoe ira i aro-Do i Ue a maluaano, ka itepomule tekuda-Do i Ue anu tensila atuu inso i Isaraeli.”

⁵ Mepauomo i Musa a luwuno puu mpobitarado to Isaraeli, ”Omiu asalakono singge mia mepate ira miano anu me'iniomo moroso ndi Baala-Peori.”

⁶ Tempo atuu asa to Isaraeli hawe mowawa asa mia beine Midia a mpe'etuno i arono i Musa ka luwuno bawaa Isaraeli anu kontongaado mpengese i arono pewowa Kema Tepotowoa.

⁷ Kumitao mongkona atuu, i Pineha anano i Eleasa, anano sando mpesomba Haruni mentade inso i tonga-tongano bawaa atuu ka mo'ala asa kansai a ngkaeno.

⁸ Iluluo to Isaraeli atuu hawe a bolongko i tongano ka itobo ira a kompodo orua ira, to Isaraeli ka beine atuu. Ka i'amba pohuku atuu menaa-naa umalu ira to Isaraeli.

⁹ Mia anu mate hangano pohuku atuu porokono rua pulu ka opaa nsowu mia.

¹⁰ Mepau Ira i Ue ndi Musa,

¹¹ ”I Pineha anano i Eleasa, anano sando mpesomba Haruni momulea-Kunemo tekuda-Ku inso a nto Isaraeli, hangano mosia tumeahakono popelangkai ndi Ongkue i tonga-tongado, ranta nahi Kupingko ira to Isaraeli a laro mosiri-Ku.

¹² Onaemo pu'uno pauakonomo: Mentee ntu'u Aku moweeakono pedandia mawongko-Ku

¹³ anu gagi pedandoado Imama ndi onae ka inuleno ranta nahina tampulaano, hangano mosiano tumeahakono Ue Alano ka iweweuomo pesintuwua tiado to Isaraeli.”

¹⁴ To Isaraeli anu mate pinepate meronga beine Midia atuu meneeako i Simiri anano i Salu, petewawado asa pepe'etua a nto Simeoni.

¹⁵ Beine Midia anu mate pinepate meneeako i Kosibi ana beineno i Suri. I Suri onaemo petewawado anu mpepe'etu inso a nsuku Midia.

¹⁶ Ka i'amba mepau Iramo i Ue ndi Musa,

¹⁷ ”Sapoi iramo to Midia atuu, ka pepate iramo,

¹⁸ hangano domensapoiakomiu pe'akala anu pinatindado ndi omiu a nteweweuno i Peori ka i Kosibi, pepaekompodo, ana beineno asa mia petewawado to Midia. Beine atuu mate pinepate i tempono petiino pohuku hangano i Peori atuu.”