Podoaa 24 - Wunta Mempori

¹ Mansano kumitao i Bilea nine moiko a pongkita-Do i Ue rumonso ira to Isaraeli, nami lako mbo'u mo'ungke petondoni kana anu se'eluno, sine ipo'aroo rupano te'aro i pada one.

² Mansano i Bilea mengkita ngkoraane ka ikita ira to Isaraeli mpekema montonda sukudo, Penaa-Do Ue Ala mewinso ndi onae.

³ Ka i'amba pauo powadino, ipotae, ”Pepauno i Bilea anano i Beori, pepauno mia anu te'ungkahi pongkitano,

⁴ pepauno mia anu rumongeo pau-Do Ue Ala, anu kumitao pongkita inso Anu Tedoa Pabawa anu mepombole, sine saru mata tewile.

⁵ Tedoa tekosi luwuno kemamiu, hei Yako, ka luwuno po'iangamiu, hei Isaraeli!

⁶ Kana lembono anu tewile molue, kana lere a wiwi ngkorono, kana keu gaharu anu pinaho-Do i Ue, kana keu arasi a wiwi ngkorono.

⁷ Uwoi waa inso a pontambuno, ka wuku mpinopahono mohawe uwoi tedoa hadio ntu'u. Mokoleno ta lalu maramba sekonopo i Aga ka poparentaano ta pinelangkai.

⁸ Ondae Ue Ala anu wawa ira mpeluarako inso i Masiri, kana tanduno onua ndi ondae. Ira mengkaano luwuno tongku anu gagi iwalido ka puroo luwuno wukudo saru mepateako ira panado.

⁹ Onae me'opo ka mepombole kana singa lakino, ka kana singa waino; isemake anu sapa wanguo? Rinonsoomo mia anu rumonsoko, ka tetotonaaomo mia anu tumotonaako!”

Pinauno i Bilea

¹⁰ Ka i'amba tesingkaomo tekudano i Bala ndi Bilea ka saru metundu-tunduhiakono kaeno ipotaeakono i Bilea, ”Kupoboiko aiwa tumotonaakune iwaliku, sine tendeano uronso ira hawe pentolu.

¹¹ Kanandio-andio pekulemo a mpo'iangamu! Hieno kupotaeakomu nine aku tedoa melangkaiko, sine Do'onto komo i Ue humaweo.”

¹² Sine i Bilea motaeakono i Bala, ”Kombake umariomo kupauako ira mia tinenamiu ndi ongkue:

¹³ Maupo ipoweeakune i Bala wulaa ka salaka buke asa langkanae, nahi aku polio umewaio petena-Do i Ue, moweweu moiko ke mosa'o a mpo'eheku ongkueku. Hapa anu ta pinau-Do i Ue, onaemo anu aku pauo.

¹⁴ Kanandio-andio aku lumako a tongkuku. Moikoomo kupauakomu hapa anu ta wineweudo tongku atuu a tongkumu lembuino.”

¹⁵ Ka i'amba pauo powadino, ipotae, ”Pepauno i Bilea anano i Beori, pepauno mia anu te'ungkahi pongkitano,

¹⁶ pepauno mia anu rumongeo pau-Do Ue Ala, ka tumo'orio ponto'ori-Do Ue Ala Anu Tedoa Mantande, anu kumitao pongkita inso Anu Tedoa Pabawa, anu mepombole sine mata tewile.

¹⁷ Kukitao, sine komba kanandio-andio, kukitao, sine napi umpeda. Anano wula mesabaako inso ndi Yako, tuko poparentaa me'umbaako inso i Isaraeli, ka puro ira nipi-nipido to Moabi, ka mokotampulao luwu anano i Seti.

¹⁸ Edomi tamo gagi wita po'ianga ka Seiri ta gagi wita po'iangado iwalino atuu. Sine Isaraeli ta moweweu wineweu anu moroso ka mosia,

¹⁹ ka inso ndi Yako ta me'umbaako asa mia anu pabawa. Onae ta mepate ira luwu mia anu mpolai inso a ngkota.”

²⁰ Mansano kumita ira i Bilea to Amale, ipauo powadino, ipotae, ”Amale onaemo anu lalu pinelangkai i olono luwuno tongku, sine poko'ariano onaemo matae anu nahina tampulaano.”

²¹ Mansano kumita ira to Keni, ipauo powadino, ipotae, ”Moroso po'iangamiu, ninaa i wawono pongku watu senomiu,

²² sine to Keni ta gagi pompaani api, hawe mbo'u te'ipia ta tumawa komiu to Asuri?”

²³ Ka i'amba pauo mbo'u powadino, ipotae, ”Masola ntu'u! isemake anu ta tuwu, tewala mongkona atuu Doweweuo Ue Ala?

²⁴ Luwuno kapala ira me'aiwa inso a wiwi ntahido to Kitimi. Ira medadoo to Asuri ka to Heberi, sine onae mbo'u ta mate anu nahina tampulaano.”

²⁵ Mepatindaomo i Bilea ka ipekule a mpo'iangano ka i Bala mbo'u lumako inso a mpo'ianga atuu.