Podoaa 23 - Wunta Mempori

¹ Ka i'amba motaeomo i Bilea ndi Bala, ”Wanguakunemo i ndi'ai opitu meda pontunua pesomba ka patindaakunemo i ndi'ai opitu sapi lakino ka opitu bimba lakino.”

² Iweweuo i Bala kana anu pinauno i Bilea. Ka i'amba i Bala ka i Bilea mesombaakono asa sapi lakino ka asa bimba lakino i wawono sompo meda pontunua pesomba atuu.

³ Motae i Bilea ndi Bala, ”Pentademo i horino pesomba tinunumu. Ongkue aku lumako, bara'ura Ondae i Ue Ira hawe tepohaweakune, ka maupo hapa anu pinokomengkaa-Do ndi ongkue aku pauakomu.” Ka i'amba lumako i wawono asa pongku wita anu londa.

I Bilea rumonsoo Isaraeli

⁴ Ondae i Ue Ala tepohaweakono i Bilea, ka i'amba i Bilea mepau ndi Ondae, ”Opitu meda pontunua pesomba atuu ku'atoraomo, ka kupesombaakono asa sapi lakino ka asa bimba lakino i wawono sompo meda pontunua pesomba.”

⁵ Ka Do'amba i Ue numaao pau a laro ngangano i Bilea ka mepau, ”Pekulemo ndi Bala ka pauomo kanandio.”

⁶ Mansano mekule, i Bala da mentade i tu'ai i horino pesomba tinununo, saru luwuno mia memota'u i Moabi.

⁷ Ka i'amba i Bilea pauo powadino, ipotae, ”Inso i Arami itena aku i Bala, mokole i Moabi, inso a luwuno torukuno i sabaano oleo: Aiwamo, ipotae, totonaakunemo i Yako, ka aiwamo, totonaaomo i Isaraeli.

⁸ Kana'umpe ke aku tumotonaao anu nahi Dototonaao Ue Ala? Kana'umpe ke aku tumotonaao anu nahi Dototonaao i Ue?

⁹ Hangano inso a punsuno luwuno torukuno watu kupensiroi ira, inso a luwuno pongku wita kukita ira. Kitao, asa tongku anu tuwu asa-asano ka nahi behe dinoa i olono luwuno tongku mpelahumoa.

¹⁰ Isemake anu hori dumoao awuno i Yako ka isema anu hori momporoko tepumpuno awuno i Isaraeli? Bakanaano aku mate kana mateno mia moleo bakanaano mateaku kana mateado.”

¹¹ Ka i'amba motae i Bala ndi Bilea, ”Hapake anu wineweumu ndi ongkue? Ku'aiwa umalako, ka utotonaa iramo iwaliku, sine posuleno uronso ira.”

¹² Sine isangkio, ”Kombake asalakono ka ipinetu'ui kupohaweo hapa anu ninaa-Do i Ue a laro ngangaku?”

¹³ Ka i'amba motae i Bala ndi onae, ”Aiwamo ka tolako a mpo'ianga susua ka inso i ra'ai komokokita ira tongku atuu. Butu anu i wiwino ntu'u kokumitao, sine luwuno nahi kokumitao. Totonaakune iramo inso i tu'ai.”

¹⁴ Ka i'amba i Bala wawao a Mpada Pompadaso, a punsuno torukuno Pisiga. Iwanguo opitu meda pontunua pesomba ka ipesombaakono asa sapi lakino ka asa bimba lakino i wawono sompo meda pontunua pesomba atuu.

¹⁵ Ka i'amba motaeakono i Bala, ”Pentademo i ndi'ai i horino pesomba tinunumu, tekonai aku tepohaweako Ira i Ue i ra'ai.”

¹⁶ Ka i'amba Ondae i Ue tepohaweakono i Bilea ka numaao pau a laro ngangano ka mepau, ”Pekulemo ndi Bala ka pauomo kanandio.”

¹⁷ Mansano hawe i Bilea ndi onae, i Bala da mentade i horino pesomba tinununo saru luwuno mia pinemota'u i Moabi. Motae i Bala ndi onae, ”Hapake anu pinau-Do i Ue?”

¹⁸ Ka i'amba i Bilea pauo powadino, ipotae, ”Pewangumo hei Bala ka rongeomo; ta'oomo birimu rumonge aku, oo ana ntamano i Sipora.

¹⁹ Ondae Ue Ala komba mia, ranta ka Dopegaupi ka komba anano mia, ranta ka Dope'o'ole. Nde Ira mepau ke ka nahi Doweweuo ke mepau ka nahi Do'ihiio?

²⁰ To'oriomo, mohawe aku parenta ka kuporonso ka tewala Ondae moronso, nahi aku polio mosuleo.

²¹ Nahi tengkita masolaa ndi Yako, ka nahi tengkita urasa'o i Isaraeli. Ondae i Ue, Ue Alado kumongkomi ira ka po'undedo ndi Ondae, Mokoledo.

²² Ondae Ue Ala, anu wawa ira mpeluarako inso i Masiri, kana tanduno onua ndi ondae,

²³ hangano nahina binasa-basa umewaio i Yako ke maupo doti umewaio Isaraeli. Ia tempono ta pinau ndi Yako ka a to Isaraeli mbo'u. Hangano Doweweuomo Ue Ala.

²⁴ Kitao, asa tongku anu mentade kana singa waino, ka mentade moleo kana singa lakino anu nahi pomboleo koroino, ba napi kaano rinakono ka mo'inu reano pinongko'alano anu pinepateno.”

²⁵ Ka i'amba motae i Bala ndi Bilea, ”Tewala nahi ubehe ntu'u tumotonaa ira, osi'i ntu'u ronso ira.”

²⁶ Sine sumangki i Bilea ndi Bala, ”Kombake umariomo kupauakomu: Luwuno anu ta pinau-Do i Ue, onaemo anu aku weweuo.”

²⁷ Ka i'amba motaeomo i Bala ndi Bilea, ”Aiwamo aku wawako a mpo'ianga susua. Bara'ura mentee a pongkita-Do Ue Ala tewala ondae utotonaakune inso a mpo'ianga atuu.”

²⁸ Ka i'amba i Bala wawao i Bilea a punsuno torukuno Peori anu me'aro a Mpada Molue.

²⁹ Motae i Bilea ndi Bala, ”Wanguakunemo i ndi'ai opitu meda pontunua pesomba ka patindaakunemo i ndi'ai opitu sapi lakino ka opitu bimba lakino.”

³⁰ Ka i'amba weweuo i Bala kana anu pinauno i Bilea ka mompesombaako asa sapi lakino ka asa bimba lakino i wawono sompo meda pontunua pesomba atuu.