Podoaa 22 - Wunta Mempori

¹ Inso i ra'ai mpelungka iramo to Isaraeli ka mpekema i lembono Moabi, i asatowano Koro Yarade umpeda i Yeriko.

I Bala moboio i Bilea

² I Bala anano i Sipori kumitao luwuno anu wineweudo to Isaraeli a nto Amori.

³ To Moabi tedoa ira mpondende umaropi ira tongku atuu hangano mehadio ira. Nte'osa iramo to Moabi ka medoito a nto Isaraeli.

⁴ Mpotae iramo to Moabi a luwuno mia memota'udo to Midiani, ”Manasa sorodadu hadio atuu ira mepingkoo luwuakoano anu ihorito, kana sapi kumaano luwu ka ipingko anu tuwu molowulu i tonga mpada.” I tempo atuu i Bala anano i Sipori, onae mokole i Moabi.

⁵ Onae montena mia lumako ndi Bilea anano i Beori, i Petori anu i wiwino koro Eparata, i witado wali-walino pe'asa tongkuno, ka ipoboio, saru pe'oliwi, ”Ka ito'oriomo, hinao asa tongku meluarako inso i wita Masiri. Mentee ntu'u, wawo wita tetutuwiako ondae. Kontongaado mpekema i aroku.

⁶ Kanandio-andio aiwamo ka totonaakunemo tongku atuu, hangano moroso irapo sekono ongkue. Bara'ura aku polio numangio ka sumaario inso i wita andio, hangano kuto'orio: Isema anu rinonsomiu ta mohawe poronso ka isema anu tinotonaamiu ta tetotonaa.”

⁷ Mpelungka iramo mia memota'u i Moabi ka mia memota'u i Midia saru mpowawa pontambo mia mponto'ori. Mansado mehawe ndi Bilea, dompohaweakono pe'oliwino i Bala.

⁸ Ka i'amba motae i Bilea ndi ondae, ”Imperatomo i ndi'ai wongi andio. Te'ingkapo kupoweeakomiu sangkino, menunu saru hapa anu pinau-Do i Ue ndi ongkue.” Ka mpo'ia iramo mia memota'udo to Moabi atuu ndi Bilea.

⁹ Ka i'amba hawe Iramo Ue Ala ndi Bilea ka Dopepau, ”isemake ondae mia anu saru omue atuu?”

¹⁰ Motae i Bilea ndi Ondae Ue Ala, ”I Bala anano i Sipori, mokole i Moabi montena mia ndi ongkue saru pe'oliwi:

¹¹ To'oriomo, hinao asa tongku meluarako inso i wita Masiri. Mentee ntu'u, wawo wita tetutuwiako ondae. Kanandio-andio aiwamo, totonaa iramo, bara'ura aku koa polio metea umewai ira ka sumaari ira.”

¹² Mepau Iramo Ue Ala ndi Bilea, ”Siimo lako perongaako ira, si totonaao tongku atuu, hangano merinonso iramo.”

¹³ Tisomono mo'oru mewanguomo i Bilea, ka i'amba motaeako ira mia memota'uno i Bala, ”Impekulemo i witamiu, hangano nahi Do'ehe aku i Ue lumako merongaakomiu.”

¹⁴ Luwuno mia memota'u i Moabi atuu mpelungka iramo ka mansado mehawe ndi Bala, dompotae, ”I Biliea nahi behe aiwa merongaa kami.”

¹⁵ Sine, i Bala montena mbo'u lalu hadio mia memota'u anu lalu pinelangkai sekonopo anu amba-ambano.

¹⁶ Mansado mehawe ndi Bilea, mpotae iramo ndi onae, ”Kanandiomo pauno i Bala anano i Sipori: Si po'ineeo maupo hapa anu umonsoiko aiwa ndi ongkue,

¹⁷ hangano aku melangkaiko ntu'u gagi maupo hapa anu inemamu inso ndi ongkue aku uminduo. Aiwamo ka totonaakune tongku atuu.”

¹⁸ Sine, i Bilea sumangki ira pegawaino i Bala, ”Maupo ipowee aku i Bala wulaa ka salaka buke asa langkanae, nahi aku polio moweweu maupo hapa, kodei ke langkai anu umewaio petena-Do i Ue, Ue Alaku.

¹⁹ Gagi kanandio-andio, laluopo impo'ia i ndi'ai wongi andio, ka kuto'orio hapa mbo'u anu Ira pauo i Ue ndi ongkue.”

²⁰ I tempono wongi hawe Iramo i Ue ndi Bilea ka mepau ndi onae, ”Tewala mehawe iramo mia atuudo mpoboiko, pentademo, lakomo perongaako ira. Sine butu hapa anu Aku pauo ndi omue asalakono uweweuo.”

Kalideno i Bilea ka Mala'eka-Do i Ue

²¹ Tisomono mo'oru mewanguomo i Bilea, ka i'amba lumampio kalide waino ka ilako merongaako ira mia memota'udo to Moabi.

²² Sine mansano lumako, tesingkaomo tekuda-Do Ue Ala ka Mala'eka-Do i Ue mentade a nsala gagi ewaino. I Bilea mesawi a ngkalide waino ka orua ira atano tumondao.

²³ Mansano kumitao Mala'eka-Do i Ue mentade a nsala saru ponai binuta a ngkae-No, pansiaomo kalide atuu inso a nsala ka mewinso a mpada. I Bilea sumepio kalide atuu kai pelengkuako mepokule a nsala.

²⁴ Ka i'amba Mala'eka-Do i Ue mentade a nsala anu ma'iso i olodo lere anggoro saru rere watu mompombali.

²⁵ Mansano kumitao kalide atuu Mala'eka-Do i Ue, ipedandaakono koroino a rere watu, ranta kai te'asi karuno i Bilea a rere watu. Ka i'amba i Bilea sumepio mbo'u.

²⁶ Mala'eka-Do i Ue melempa mpiha ka mentade i asa po'ianga anu ma'iso nahina sala pansia i koana ke i manggali.

²⁷ Kumitao Mala'eka-Do i Ue, kalide atuu me'opo, i Bilea da kontongaano i wawono. Ka i'amba tesingkaomo tekudano i Bilea ka itunduhiako tuko kalide atuu.

²⁸ Do'ungkahio i Ue ngangano kalide atuu, ranta kai pepau ndi Bilea, ”Hapake anu wineweuku ndi omue, ranta ka usepi aku pentolu?”

²⁹ Sumangki i Bilea a ngkalide atuu, ”Hangano upemae-maekune, ande-andeno hinao ponai a ngkaeku, kanandio-andio kupepatekomo.”

³⁰ Sine, kalide atuu motaeakono i Bilea, ”Kombake ongkue andio kalidemu anu pinesawikimu asa ntinuwumu hawe kanandio-andio? Hori aku ke moweweu kanandio ndi omue?” Sumangki i Bilea, ”Naahi.”

³¹ Ka Do'amba i Ue wileakono matano i Bilea. Ikitao Mala'eka-Do i Ue saru ponai binuta a ngkaeno mentade a nsala. Onaemo i Bilea ka ipenggolontu mesomba.

³² Mepeu Iramo Mala'eka-Do i Ue ndi onae, ”Tembio kausepio kalidemu hawe pentolu? Kitao, Ongkue meluarako gagi ewaimu, hangano a pongkita-Ku sala andio te'aro a masolaa.

³³ Mansano kumita Aku kalide andio, pentolu ipansia inso i aro-Ku. Bakanaano nahi pansia inso i aro-Ku, manasa tempo koa mbo'u atuu Kupepatekomo, sine onae Kupo'ineeo tuwu.”

³⁴ Ka i'amba motaeomo i Bilea a Mala'eka-Do i Ue, ”Tehala akumo hangano nahi kuto'orio nine Omiu mentade a nsala umaropi aku. Gagi kanandio-andio, tewala mongkona atuu mosa'o a pongkita-Miu, aku mekule.”

³⁵ Sine, mepau Mala'eka-Do i Ue ndi Bilea, ”Lakomo perongaako ira mia atuudo. Sine, butu hapa anu Aku pauoakomu asalakono uweweuo.” Ka i'amba i Bilea lumako merongaako ira mia memota'uno i Bala atuu.

I Bala mo'ema ndi Bilea ka itotonaao Isaraeli

³⁶ Mansano rumongeo nine hawe i Bilea, meluarakoomo i Bala tepohaweakono i Kota Moabi a ntida wita koro Aranoni, i tompano tida wita atuu.

³⁷ Motae i Bala ndi Bilea, ”Komba montena akumo mia ke moboiko? Tembio nahi u'aiwa ndi ongkue? Nde mentee ke nahi kupolio moweeakomu tambomu?”

³⁸ Sine, sumangki i Bilea ndi Bala, ”Kitaomo, kanandio-andio hawe akumo ndi omue. Sine, nahina rosoku ba aku mompau maupo hapa? Pau anu ta ninaa-Do Ue Ala a laro ngangaku, onaemo anu aku pauo.”

³⁹ Ka i'amba lumakoomo i Bilea merongaakono i Bala ka hawe iramo i Kiriati-Husoti.

⁴⁰ I Bala mompesombaako ba'opia sapi ka asa bawaa bembe bimba, ka i'amba umoliwio asa ntia ndi Bilea ka a luwuno mia memota'u anu tumondao.

⁴¹ Tisomono i Bala tumotowoo i Bilea ka iwawao mewuatako a pongku wita Baala. Inso i ra'ai ikitao anu lalu i wiwino inso a nto Isaraeli.