Podoaa 21 - Wunta Mempori

Peteaa umpeda i Horoma

¹ Mokole i wita Aradi, to Kana'a anu mpo'ia i Wita Nege, rumongeo nine to Isaraeli me'aiwa inso a nsala Atarimi, ka i'amba metea umewai ira to Isaraeli, ka iwawa ira ba opia mia tinawa inso ndi ondae.

² Onaemo ka dompotanga to Isaraeli ndi Ondae i Ue, dompotae, ”Tewala Ipeweengakono ntu'u tongku andio a ngkaemami, kami meropuo luwuno kotano ranta ka itampula.”

³ Ondae i Ue rumongeo po'emado to Isaraeli, onaemo ka Dopeweengako ira to Kana'a atuu; ka i'amba mia atuudo ka luwuno kotado rinopu ranta kai masola. Onaemo pu'uno po'ianga atuu nineeako Horoma.

Ule mala

⁴ Mansado mpelungka inso i torukuno Hore, mpelempa te'aro i Tahi Teberau ka domentanggolilio wita Edomi, ka tongku atuu nami dompokompeteao aroado a ntonga nsala.

⁵ Ka do'amba mpepauki umewai Ira Ue Ala ka i Musa, ”Tembio ka Iwawa kami mpeluarako inso i Masiri? Ka kimemate i pada one andio? Hangano i ndi'ai nahina roti ka nahina uwoi, ka kaanga motewe andio nte'osa kamimo.”

⁶ Ka Do'amba i Ue mompokohina hadio ule mo'ito i tonga-tongado tongku atuu anu tumungku ira, ranta hadio inso a nto Isaraeli anu mate.

⁷ Ka do'amba tongku atuu me'aiwa ndi Musa ka dompotae, ”Ntehala kamimo, hangano mpepauki kamimo umewai Ira i Ue ka omue.” Pekakaimo ndi Ondae i Ue, ka Doliahako ira ule andio inso ndi omami. Ka i'amba i Musa mekakaiako ira tongku atuu.

⁸ Mepau Iramo i Ue, ”Weweuomo ule mo'ito ka naaomo a asa keu pinontade. Sompo mia anu tinungku, tewala ikitao, ta kongko tuwu.”

⁹ Ka i'amba i Musa moweweu ule mala ka inaao a asa keu pinontade. Tewala asa mia itungkuo ule, sine mengkita a ule mala atuu, manasa ta kongko tuwu.

Pelempaa lumako i wita Moabi

¹⁰ Ka i'amba mpelungka iramo to Isaraeli, ka mpekema i Oboti.

¹¹ Inso i Oboti mpelungka ira umpeda hanga ngkota i Abarimi, i pada one anu te'alaako i sabaano oleo Moabi.

¹² Inso i tu'ai mpelungka ira ka mpekema i Lembono Seredi.

¹³ Ka inso i tu'ai mpelungka ira mbo'u ka mpekema i asa towano Koro Aranoni anu i pada one ka anu waa meluarako inso i witado to Amori, hangano Koro Aranoni onaemo tida wita Moabi, i olodo to Moabi ka to Amori.

¹⁴ Onaemo pu'uno i larono wunta peteaa-Do i Ue pinau, ”Wahebi i Supa ka luwuno lembono lumako a ngkoro Aranoni,

¹⁵ ka apano luwuno lembono. Apano atuu tewile malua te'aro a witano kota Ari, ka mehonda a ntida witado to Moabi.”

¹⁶ Inso i ra'ai melako ira i Beeri. Ndiomo sumuru po'ianga-Do i Ue mepau ndi Musa, ”Pumpu iramo tongku atuu, Aku moweeako ira uwoi.”

¹⁷ I tempo atuu to Isaraeli mpenaniako penani andio, ”Luluamo, hei sumuru! Aiwa to mpenani ntepoposangki, hangano sumuru anu mengkinekedo mokole,

¹⁸ anu pinoko'ondaloako luwuno tuko poparentaa saru tukodo ulea mokole i olono tongku atuu.” Ka i'amba inso i pada one melako ira i Matana,

¹⁹ inso i Matana melako i Nahalieli, inso i Nahalieli melako i Bamoti,

²⁰ inso i Bamoti melako i lembono i witado to Moabi umpeda punsuno Torukuno Pisiga anu me'aro a mpada molue.

Peteaa umewaio i Sihoni, mokole i Hesiboni

²¹ Ka do'amba to Isaraeli mpotena mia lumako ndi Sihoni, mokoledo to Amori, saru pe'oliwi,

²² ”Ipo'inee kamimo ntelalo i witamiu. Nahi kami mepansia mpewinso a luwuno bondemiu ka luwuno lere anggoromiu. Nahi kami mpo'inu uwoi sumurumiu. Butu koa a nsala langkai kami mpelempa ranta ka kimelaloo witamiu.”

²³ Sine, nahi ehe ira i Sihoni to Isaraeli mpelempa melaloo witano. Tendeano, ipumpu ira luwuno sorodaduno ka dompeluarako i pada one umaropi ira to Isaraeli. Kohaweno i Yahasi meteaomo umewai ira to Isaraeli.

²⁴ Sine, to Isaraeli menangiakono mata mponai ka mpetorokio witano, inso a ngkoro Aranoni hawe a ngkoro Yabo, hawe a inuleno i Amoni, hangano tida witado inuleno i Amoni atuu tedoa moroso.

²⁵ Luwuno kota atuu dompoko'alao to Isaraeli, onaemo ka domerodo a luwuno kotado to Amori, i Hesiboni ka a luwuno kota kodeino.

²⁶ Hangano, kota Hesiboni onaemo kota po'iangano i Sihoni, mokoledo to Amori. Horio metea umewaio mokoledo to Moabi anu se'eluno, ka ipongko'alao luwu wita inso i a ngkaeno hawe a ngkoro Aranoni.

²⁷ Onaemo pu'uno ka dompotae puu mpowadi, ”Aiwamo i kota Hesiboni, moikoomo iwinangu ka ipinokomoroso kota po'iangano i Sihoni atuu!

²⁸ Hangano api meluarako inso i kota Hesiboni, langano api inso a ngkota po'iangano i Sihoni, anu pingko kumaano Ari-Moabi, ondae anu pabawaio luwuno pongku wita asa ngkeu Koro Aranoni.

²⁹ Masolakomo, oo Moabi! Memasola komiumo, oo tongkuno i Kamosi! Iweweuo luwuno ana ntamano gagi mia mpolai, ka luwuno anano beine gagi mia ntinawa ndi Sihoni, mokoledo to Amori.

³⁰ Tomempana iramo, tampulaomo kota Hesiboni hawe i Diboni, ka topokotampula ira hawe i Nopahi, anu tewile hawe i Medeba.”

Peteaa umewaio i Ogo, mokole i Basani

³¹ Kanandiomo domerodo to Isaraeli i witado to Amori.

³² Mansano montena mia i Musa padasoo kota Yaeseri, dompoko'alao luwu kota kodei petengi-tengino Yaeseri ka mensaari ira to Amori anu mekongko i tu'ai.

³³ Ka do'amba mpelengkuako ka domelako te'aro i Basani. Ka i'amba i Ogo, mokole i Basani saru luwuno palilino melako i Ederei umaropi ira ka dompetea.

³⁴ Sine, mepau Ira i Ue ndi Musa, ”Siimo doitoakono, hangano Aku meweengakono saru luwuno palilino ka witano a ngkaemu. Asalakono weweuo ndi onae kana anu wineweumu ndi Sihoni mokoledo to Amori anu mo'ia i kota Hesiboni.”

³⁵ Onaemo ka domenangio ka luwuno anano saru luwuno palilino, ranta nahina maupo te'asa mia anu pino'inee tola. Ka do'amba mpetorokio witano.