Podoaa 20 - Wunta Mempori

Mateno i Miriami

¹ Ka i'amba to Isaraeli, luwuno bawaa atuu mehawe i pada one Sini ia wula ko'asa, ka mpo'ia iramo tongku atuu i Kadesi. I tu'aimo mateano i Miriami ka kinaburu.

Halado i Musa ka i Haruni

² Asa tempo nahina uwoi tiado bawaa atuu. Mpepumpu iramo mpe'aro ndi Musa ka ndi Haruni.

³ Tongku atuu mpegagaakono i Musa, dompotae, ”Ande-andeno kimentampula tempono dometampula pepaekompomami i aro-Do i Ue!

⁴ Tembio ka iwawa ira bawaa-Do i Ue i pada one andio, ka kimemate saru pinotuwumami i ndi'ai?

⁵ Tembio ka iwawa kami mpeluarako inso i Masiri, ka iwawa kami a masolaa andio, po'ianga komba porawoa inii, nahina mbo'u keu ara, anggoro ka delima, tendeano maupo uwoi inua nahina?”

⁶ I Musa ka i Haruni binta ira bawaa atuu, lumako a mpewowano Kema Tepotowoa ka mesomba. Tengkitaomo maramba-Do i Ue ndi ondae.

⁷ Mepau Ira i Ue ndi Musa,

⁸ ”Alaomo tukomu atuu, ka omue ka i Haruni, akamu, asalakono tumena ira bawaa atuu mpepumpu; potaemo i arodo a pongku watu atuu ka ipoluarako uwoino; kanandiomo upoluarakoako ira uwoi inso a pongku watu ka mopo'inu ira bawaa atuu saru pinotuwudo.”

⁹ Ka i'amba i Musa umalao tuko atuu inso i aro-Do i Ue, kana parenta-Do ndi onae.

¹⁰ Mansano pumpu iramo i Musa ka i Haruni bawaa atuu i arono pongku watu atuu, mepauomo ndi ondae, ”Imeronge akumo, hei mia melambaha, nde asalakono kami moluarakoakomiu uwoi inso a pongku watu andio?”

¹¹ Umarino atuu i Musa tumandeo kaeno, ka i'amba tumunduhiakono tukono pendua pongku watu atuu, onaemo ka ipeluarako hadio uwoi, ranta ka dompo'inu bawaa atuu ka pinotuwudo.

¹² Sine mepau Ira i Ue ndi Musa ka ndi Haruni, ”Hangano nahi ipe'ala-ala Aku ka nahi pelangkaio mempori-Ku i arodo to Isaraeli, onaemo pu'uno nahi komiu wawa ira bawaa andio mpewinso a wita anu Aku weeako ira.”

¹³ Onaemo mata uwoi Meriba, po'iangado to Isaraeli megagaako Ira i Ue ka Dopopokitao mempori-Do i olodo.

To Edomi nahi eheako ira to Isaraeli ntelalo i witano

¹⁴ Ka i'amba i Musa montena mia inso i Kadesi a mokoledo to Edomi saru pe'oliwi, ”Kanandiomo paudo pepaekompomiu to Isaraeli: Ito'orio luwuno masusaa anu umari umalu kami,

¹⁵ nine uempu'umami melako i Masiri, ka tehine kimpo'ia i Masiri ka omami saru uempu'umami domeweweu nsa'o kami to Masiri;

¹⁶ nine mpebooli kami ndi Ondae i Ue, ka Dorongeo peboolimami, montena Ira asa mala'eka, ka tumaate kami mpeluarako inso i Masiri. Kanandio-andio mekongko kami i Kadesi, asa kota i wiwino tida witamiu.

¹⁷ Ipo'inee kamimo ntelalo i witamiu; nahi kami mpelempa lumalo ira bonde ka lere anggoromiu ka nahi kami mpo'inu uwoi sumurumiu; butu sala langkai kami mentondao, nahi pansia i koana ke i manggali, ranta kimelaloo tida witamiu.”

¹⁸ Sine dompotae to Edomi ndi ondae, ”Si ntelalo i witamami, te'ingka mpeluarako kami tumotowoakomiu ponai!”

¹⁹ Ka i'amba mpotae iramo to Isaraeli, ”Kami koa mpelempa telalo a nsala langkai, ka tewala omami ka pinotuwumami mpo'inu uwoi, manasa kami me'owahiakono doi, polo ka i'eheakami ntelalo mpelempa karu, butu koa onae atuu.”

²⁰ Sine mesangki ira, ”Si ntelalo.” Ka mpeluarako iramo to Edomi saru hadio palilino ka saru sorodadu anu moroso umaropi ira.

²¹ Mansano nahi dome'ehe ira to Edomi ntelalo to Isaraeli inso i witado, onaemo ka domepansia mebintao.

I Haruni mate

²² Mansado mpelungka inso i Kadesi, mehawe iramo luwuno bawaa Isaraeli i torukuno Hore.

²³ Mepau Ira i Ue ndi Musa ka ndi Haruni umpeda a ntorukuno Hore, i tidano wita Edomi,

²⁴ ”I Haruni ta pinumpu a uempu'uno, hangano onae nahi ta mewinso a wita anu Kuweeako ira to Isaraeli, hangano orua komiu i'ewaiomo petena-Ku umpeda mata uwoi Meriba.

²⁵ Poboiomo i Haruni ka i Eleasari, anano, ka wawa iramo mewuatako a ntorukuno Hore;

²⁶ lohuomo sangkano i Haruni ka pokonaomo atuu ndi Eleasari, anano, ka i'amba i Haruni ta pinumpu a uempu'uno ka mate i ra'ai.”

²⁷ Ka i'amba i Musa weweuo kana parenta-Do i Ue. Mpewuatako ira a ntorukuno Hore kontongaado luwuno bawaa atuu mengkitao.

²⁸ Ilohuo i Musa sangkano ndi Haruni ka ipokonao ndi Eleasari, anano. Ka i'amba mateomo i Haruni i punsuno torukuno atuu, ka i'amba i Musa saru i Eleasari metii inso i torukuno atuu.

²⁹ Mansado mengkitao luwuno bawaa atuu nine i Haruni mateomo, onaemo to Isaraeli ka dompengeseio i Haruni tolu pulu oleo tehineno.