Podoaa 17 - Wunta Mempori

Tukono i haruni mebunga

¹ Mepau Ira i Ue ndi Musa,

² ”Pauako iramo to Isaraeli kai pinoweeako asa tuko inso a sompo suku, inso a sompo petewawado, sompo-sompo suku, luwuno hopulu ka orua tuko. Ka i'amba buriomo neeno sompo petewawa a ntukono.

³ A ntukono i Lewi asalakono kau burio koa neeno i Haruni. A sompo petewawa suku asalakono hinao asa tuko.

⁴ Umarino atuu asalakono kau naao luwuno atuu i larono Kema Tepotowoa i arono Buruano Songka, po'ianga Kuwela tepohaweakomu.

⁵ Mia anu bininiki-Ku, tukono ta mentumba; kanandiomo kuliahakono inso ndi Ongkue pewuruki anu pinaudo to Isaraeli ndi omiu.”

⁶ Mansano mepau i Musa a nto Isaraeli, luwuno petewawado mpoweeakono asa tuko, singge mia inso a sompo petewawado, porokono hopulu ka orua tuko, ka tukono i Haruni kongko i olono luwuno tuko atuu.

⁷ I Musa numaao luwuno tuko atuu i aro-Do i Ue a laro kema po'iangano songka-Do.

⁸ Tisomono mansano mewinso i Musa a laro kemano songka atuu, tengkitaomo tukono i Haruni inso a inuleno i Lewi mentuntaomo, mensisi, mebunga ka mewuaako wua badami.

⁹ Ka i'amba i Musa wawao luwu tuko atuu meluarako inso i aro-Do i Ue a luwuno bawaa Isaraeli. Domengkitao, ka i'amba singge mia umalao tukono.

¹⁰ Mepau Ira i Ue ndi Musa, ”Pokuleomo tukono i Haruni i arono buruano songka kai ninaa gagi petondoni a luwuno mia bunto, ka mokotampulao pewurukido mongkona Ongkue, kasi domemate.”

¹¹ Iweweuomo i Musa kana parenta-Do i Ue ndi onae; kanatuumo iweweuo.

¹² Sine to Isaraeli mpotaeakono i Musa, ”Mentee ntu'u kami memate, kami metampula, luwumami kami metampula.

¹³ Maupo isema anu umpeda a Ngkema Mempori-Do i Ue, manasa ta mate. Asalakono ke kami pingko metampula?”