Podoaa 16 - Wunta Mempori

Pe'ewado i Kora, i Datani ka i Abirami

¹ I Kora anano i Yisihari anano i Kehati anano i Lewi, saru i Batani ka i Abirami, luwuno anano i Eliabi, ka i Oni anano i Peleti, otolu ira to Rube, umoluako ira mia

² ka dome'ewaio i Musa. Saru ondae, hinao rua etu lima pulu to Isaraeli. Ondae atuu luwuno petewawa bawaa, luwuno mia anu bininiki a laro nterisoa; luwuno mia tenee.

³ Domelimbuo i Musa ka i Haruni, saru mpotae ndi ondae, ”Lansara komiumo! Luwuno bawaa atuu mia memempori, ka Ondae i Ue kongko i tonga-tongado. Tembio ka ipompelangka-langkai a bawaa-Do i Ue?”

⁴ Mansano rumongeo i Musa mongkona atuu menggolontuomo ka mesomba.

⁵ Ka i'amba motaeakono i Kora ka luwuno bawaa anu tumondao, ”Tisomo mo'oru Ondae i Ue Ira pauo isema mia-Do ka isema anu mempori, ka Ira umeheakono mia atuu umpeda ndi Ondae. Mia anu bininiki-Do Ira umeheakono umpeda ndi Ondae.

⁶ Weweuomo andio, hei Kora ka luwumiu bawaa anu tumondao: ala iramo pontunua halo,

⁷ naaomo api i larono ka ponaakonomo dupa i wawono i aro-Do i Ue tisomo. Mia anu ta bininiki-Do i Ue, onaemo anu mempori. Melansara komiumo, hei omiu to Lewi!”

⁸ Ka i'amba i Musa motaeakono i Kora, ”Rongeomo, hei omiu to Lewi!

⁹ Nde napi mpesompoo, nine Doponsia komiu Ue Alado to Isaraeli inso a bawaa Isaraeli ka me'ineheako umpeda ndi Ondae, ka ime'anggao anggaa a Ngkema Mempori-Do i Ue ka mpentade i arono bawaa mekakaako ira,

¹⁰ ka nine omue ineheako umpeda, omue ka luwuno pepaekompomu inuleno i Lewi? Kanandio-andio omue motuntu mbo'u potoro sando mpesomba?

¹¹ Onaemo pu'uno, omue ka luwuno bawaa tumondako kontongaamiu memoroko umewai Ira i Ue. Hangano isemake i Haruni, kai mpewuruki ndi onae?”

¹² Kanatuumo i Musa montenaomo mia moboio i Datani ka i Abirami, luwuno anano i Eliabi, sine sumangki ira, ”Nahi kami behe aiwa.

¹³ Napi sompo ke, nine uwawa kami mpeluarako inso i asa wita anu hadio ntu'u susu ka siu hoanino kai po'inee kami memate i pada one, ka da upokogagio mbo'u koroimu ue ndi omami?

¹⁴ Mentee ntu'u, nahi uwawa kami ia wita anu hadio ntu'u susu ka siu hoanino, ke maupo moweeakami bonde ka lere anggoro gagi tia pusaka. Potaemu komokomorawuo matado mia andiodo? Nahi kami behe me'aiwa.”

¹⁵ I Musa tekudaomo ntu'u ka ipepau ndi Ondae i Ue, ”Siimo Iperioo pesombado. Napi kuhori mo'ala maupo te'asa kalide inso ndi ondae, ka napi kuhori moweweu anu mosa'o maupo ia asa mia inso i olodo.”

¹⁶ Ka i'amba motaeomo i Musa ndi Kora, ”Tisomo, omue ka luwuno bawaa tumondako asalakono me'aro ndi Ondae i Ue, omue, ondae ka i Haruni.

¹⁷ Moikoomo omiu singge mia mowawa pontunuano halo ka monaakono dupa i wawono, ka i'amba singge mia mesombaakono pontunuano halo i aro-Do i Ue, rua etu ka lima pulu pontunua halo. Omue mbo'u ka i Haruni, asalakono singge mia wawao pontunuano halo.”

¹⁸ Singge iramo mpowawa pontunuado halo, menaao api i larono, monaakono dupa i wawono, ka do'amba mpentade i arono pewowano Kema Tepotowoa meronga i Musa ka i Haruni.

¹⁹ Mansano pumpu ira i Kora luwuno bawaa anu tumondao umaropi ira orua ira i arono pewowano Kema Tepotowoa, tengkitaomo maramba-Do i Ue a luwuno bawaa.

²⁰ Ka Do'amba mepau i Ue ndi Musa ka ndi Haruni,

²¹ ”Impeliahako inso i tonga-tongano bawaa andio, Aku pingko ira i larono asa mpiniro.”

²² Sine orua ira mesomba ka dopotae, ”Oo Ue Ala, Ue Ala inso a mpenaa luwuno anu tuwu! Asa mia koa anu tehala, nde Komiu tekudaako ira luwu ke bawaa andio?”

²³ Mepau Iramo i Ue ndi Musa,

²⁴ ”Pauako iramo bawaa atuu: Impeliahakomo inso a mpo'ianga lumimbuo po'iangado i Kora, i Datani ka i Abirami.”

²⁵ Ka i'amba i Musa lumako ndi Datani ka i Abirami, domentondao luwuno mia memota'u Isaraeli.

²⁶ Ipotaeako iramo bawaa atuu, ”Moikoomo ime'olai inso a ngkemado mia ntehala ndi Ondae i Ue andio ka si mpodanggi maupo hapa inso a anudo, kasi mempinokotampula hangano luwuno halado.”

²⁷ Mpeliahako iramo inso a petengi-tengino po'iangano i Kora, i Datani ka i Abirami. Kanatuumo i Datani ka i Abirami meluarako iramo ka mentade i arono pewowano kemado saru kombiado ka luwuno anado anu tama ka anu kodei.

²⁸ Umarino atuu motaeomo i Musa, ”Anumo kanandio komiu mento'orio, nine ongkue tinena-Do i Ue weweuo luwuno wineweu andio, ka mongkona atuu komba tinooku ongkueku.

²⁹ Tewala te'ingka mia andiodo mate kana mateno sompo mia, ka mpopembasai ira anu pinembasaido sompo mia, ka ongkue komba Dotena aku i Ue.

³⁰ Sine, tewala Dopokogagio i Ue asa anu napi hori gagi, ka wita mongangao ngangano tumele ira saru luwuno anudo, ranta ka dompetii tuwu-tuwu a ntolinodo mia mate, ka komiu mento'orio nine mia andiodo mpepaukiako iramo i Ue.”

³¹ Da saraipo i'umari pauo luwuno pau atuu, tebokaomo wita i totodo,

³² ka tolino wileo ngangano tumele ira saru luwuno ihino rahano ka luwuno mia anu kongko ndi Kora saru luwuno arataado.

³³ Kanandiomo dompetii tuwu-tuwu a ntolinodo mia mate meronga luwuno anu hina ndi ondae; ka tolino wali tumutuwio i wawodo, ranta ka dometampula inso i olono bawaa atuu.

³⁴ Rumongeo peboolido, luwuno to Isaraeli anu umpedaako ira mpolai, hangano dompotae, ”Ba mansa itele kita mbo'u tolino kana ondae!”

³⁵ Ka i'amba meluarakoomo api inso ndi Ondae i Ue kumaano ranta ka ipingko rua etu ka lima pulu mia anu mpopesombaako dupa atuu.

³⁶ Mepau Ira i Ue ndi Musa,

³⁷ ”Pauakonomo i Eleasari, anano sando mpesomba Haruni, kai tandeo luwuno pontunua halo inso i olono anu mo'ai atuu ka rumawoo api atuu te'olai, hangano luwuno atuu mempori.

³⁸ Ka i'amba pontunuado halo mia ntehala anu inowahiakoomo penaano atuu, asalakono pinalu gagi lempe po'apii meda pontunua pesomba, hangano tempono domewawao mia atuudo i aro-Do i Ue, luwuno atuu gagi mempori. Mongkona atuu gagi petondoni a nto Isaraeli.”

³⁹ Ka i'amba sando mpesomba Eleasari umalao luwuno pontunua halo inso a mala anu domewawaomo mia memo'ai atuu, ka ipaluo gagi po'apii meda pontunua pesomba.

⁴⁰ Mongkona atuu gagi petondoni a nto Isaraeli, kasihina mepopokita mia biasa anu komba inso a inuleno i Haruni anu montunu dupa i aro-Do i Ue, ka onae kasi gagi kana i Kora ka bawaa anu tumondao. Kanandiomo iwineweu kana anu pinau-Do i Ue telalo ndi Musa.

⁴¹ Sine, tisomono luwuno bawaa Isaraeli mpewuruki ndi Musa ka ndi Haruni, dompotae, ”Ipepate iramo bawaa-Do i Ue.”

⁴² Tempono dompepumpu bawaa atuu umewai ira i Musa ka i Haruni, ka dompewolili te'aro a Ngkema Tepotowoa, tengkitaomo seru atuu tumutuwio ka tengkitaomo maramba-Do i Ue.

⁴³ Ka i'amba i Musa ka i Haruni lumako i arono Kema Tepotowoa.

⁴⁴ Mepau Iramo i Ue ndi Musa,

⁴⁵ ”Peliahakomo inso i tonga-tongano bawaa andio, ka Kupingko ira i larono asa mpiniro.” Onaemo ka dopesomba.

⁴⁶ Mepauomo i Musa ndi Haruni, ”Alaomo pontunua halo, naaomo api i larono inso i wawono meda pontunua pesomba ka ponaakono dupa. Lakomo pontuturako a bawaa ka weweuako iramo pesintuwua, hangano tensingkaomo tekuda-Do i Ue, ka pohuku mompu'uomo.”

⁴⁷ I'alaomo i Haruni pontunua halo, kana anu pinauno i Musa, ka i'amba melulu lumako i tonga-tongano bawaa atuu, ka tengkitaomo pohuku mompu'uomo i olodo tongku atuu. Ka i'amba monaakono dupa ka moweweuako ira tongku atuu pesintuwua.

⁴⁸ Mansano mentade i olodo mia memate ka mia mentuwu, menaa-naaomo pohuku atuu.

⁴⁹ Porokono mia anu mate kona pohuku atuu, hopulu ka opaa nsowu ka pitu etu mia, napi tedoa mia anu mate hangano pinogauno i Kora.

⁵⁰ Tempono ipekule i Haruni ndi Musa i arono Kema Tepotowoa, pohuku atuu menaa-naaomo.