Podoaa 15 - Wunta Mempori

Pesomba tinunu

¹ Mepau Ira i Ue ndi Musa,

² ”Pepaumo a nto Isaraeli ka potaeako ira: Tewala mpewinso komiu a wita anu Aku weeakomiu gagi po'iangamiu,

³ ka komiu popesombaako pesomba tinunu ndi Ondae i Ue, inso a nsapi ke inso a asa bawaa bembe bimba, moiko pesomba tinunu ke pesomba sinumbele, moiko gagi pesomba po'ihii pontanga pinesusua, ke pesomba a moputeno aroa ke pesomba i tempono oleo langkaimiu, weweua anu woono mokomawongko Ira i Ue,

⁴ ka mia anu mowawa pesombano ndi Ondae i Ue asalakono mompesombaako gagi pesomba kaanga asa ntia hopulu efa tarigu moiko ntu'u sinaloako lana asa ntia opaa hini.

⁵ Meronga pesomba tinunu ke pesomba sinumbele atuu, asalakono impesombaakono mbo'u asa ntia opaa hini anggoro gagi pesomba tinawa, a sompo bimba anu pinesombaako.

⁶ Sine, tewala asa bimba lakino anu pinesombaako, asalakono impesombaakono gagi pesomba kaanga orua ntia hopulu efa tarigu moiko ntu'u, sinaloako lana asa ntia otolu hini.

⁷ Ka gagi pesomba tinawa, asalakono impesombaako asa ntia otolu hini anggoro, anu woono gagi mokomawongko Ira i Ue.

⁸ Tewala asa sapi imeweweuo gagi pesomba tinunu ke pesomba sinumbele, moiko gagi po'ihii pontanga pinesusua maupo gagi pesomba tekaduduia ndi Ondae i Ue,

⁹ ka meronga sapi atuu asalakono pinesombaako gagi pesomba kaanga otolu ntia hopulu efa tarigu moiko ntu'u, sinaloako lana etonga hini,

¹⁰ ka gagi pesomba tinawa asalakono impesombaakono entonga hini anggoro. Onaemo pesomba tinunu anu woono mokomawongko Ira i Ue.

¹¹ Kanandiomo asalakono iwineweu a sompo sapi, sompo bimba lakino ka sompo bimba ke bembe.

¹² Maupo te'opia hadiono pinotuwu anu imeweweuo, sompo pinotuwu atuu asalakono imeweweuo kanandio.

¹³ Sompo lano mia i tu'ai asalakono moweweu kanandio, tempono mompesombaako pesomba tinunu anu woono mokomawongko Ira i Ue.

¹⁴ Tewala asa mia hawe mo'iaomo mpiha ndi omiu, ke asa mia susua anu mo'ia i olomiuke i olodo inulemiu te'ipua, ta mompesombaako pesomba tinunu anu woono mokomawongko Ira i Ue, ka kana anu imeweweuo, asalakono kanandiomo imeweweuo.

¹⁵ Mongkona bawaa atuu, asalakono hinao pompakosi ndi omiu ka a mia hawe anu mpo'ia ndi omiu. Ndiomo asa pompakosi ranta nahina tampulaano ndi omiu hawe a inulemiu, omiu ka mia hawe asalakono mengkena i aro-Do i Ue.

¹⁶ Asa songka ka asa atora anu ta tinondamiu saru mia hawe anu mpo'ia ndi omiu.”

¹⁷ Mepau Ira i Ue ndi Musa,

¹⁸ ”Pepaumo a nto Isaraeli ka potaeako ira: Tewala mpewinso komiu a wita ba isua Aku wawa komiu,

¹⁹ ka mpongkaa roti hasilino wita atuu, asalakono impowawa pesomba pinesusua ndi Ondae i Ue.

²⁰ Tarigu jelaimiu anu amba-ambano, asalakono imewawao gagi pesomba pinesusua onaemo roti bonggoli. Kanamo pesomba pinesusua inso a hasilino ponsesaamiu, kanatuumo asalakono impesombaakono.

²¹ Inso a ntarigu jelaimiu anu amba-ambano, asalakono impeweengakono pesomba pinesusua ndi Ondae i Ue, ranta hawe a inulemiu.”

Hala anu nahi pine'inungako

²² ”Tewala nahi impe'inungakono melaloo asa inso a luwuno parenta andio, anu umariomo Dopauo i Ue ndi Musa,

²³ luwuno anu Doparentaa komiu i Ue telalo i Musa, mompu'u a oleo Dopeweengakono parenta-Do ka ranta hawe a inule.

²⁴ Ka tewala mongkona atuu wineweu nahi domento'orio bawaa, nahi pine'inungako, asalakono luwuno bawaa meweweuo asa sapi lakino mongura gagi pesomba tinunu anu woono gagi mokomawongko Ira i Ue, meronga pesomba kaangano ka pesomba tinawano, menunu saru atora, saru asa mbo'u bembe lakino gagi pesomba po'onini hala.

²⁵ Sando mpesomba asalakono moweweu pesintuwua tiado luwuno bawaa Isaraeli, ranta ka dompohawe te'oninino hala. Hangano mongkona atuu gagi nahi pine'inungako, ka Ondae mbo'u mpowawa iramo luwuno pesomba gagi pesomba tinunu ndi Ondae i Ue, saru pesomba po'onini hala i aro-Do i Ue hangano anu nahi pine'inungako atuu.

²⁶ Luwuno bawaa Isaraeli ka mia mehawe anu mpo'ia i tonga-tongamiu ta mohawe te'oninino hala, hangano mongkona atuu domeweweuo luwuno tongku nahi pine'inungako.

²⁷ Tewala butu asa mia moweweu hala nahi pe'inungako, asalakono onae mompesombaako bembe waino anu tinuwuno asa nta'u gagi pesomba po'onini hala.

²⁸ Sando mpesomba asalakono moweweu pesintuwua i aro-Do i Ue tiano mia anu nahi pe'inungako moweweu hala, ranta hangano wineweu pesintuwua, mia atuu mohawe te'oninino hala.

²⁹ Moiko tiado mia lano to Isaraeli maupo mia hawe anu mpo'ia i tonga-tongamiu, asa koa songka ta tinonda ndi ondae mongkona mia anu moweweu hala nahi pe'inungako.

³⁰ Sine mia anu me'inungako moweweu, moiko lano mia i tu'ai maupo mia hawe, mia atuu mepaukiako Ira i Ue, onae asalakono pinokotampula inso i tonga-tongano tongkuno,

³¹ hangano imentatao pau-Do i Ue ka umewaio parenta-Do. Mia atuu asalakono pinokotampula, salano asalakono pinopotembiako ndi onae.”

Mia anu umewaio atorano Saba

³² Tempono to Isaraeli mekongko i pada one, domehaweo asa mia anu mopumpu keu ponahu ia oleo Saba.

³³ Ka do'amba mia anu mehaweo kontongaano mopumpu keu ponahu atuu, mopo'aroo ndi Musa, ndi Haruni ka a luwuno bawaa.

³⁴ Mia atuu wininso a laro raha pohukua, hangano napi pinakosi hapa anu asalakono wineweu ndi onae.

³⁵ Mepau Iramo i Ue ndi Musa, ”Mia atuu asalakono hinuku mate, luwuno bawaa Isaraeli asalakono mewuwunoakono watu i bungkuno pekemaa.”

³⁶ Ka i'amba luwuno bawaa mewawao i bungkuno pekemaa ka mewuwunoakono watu, ranta ka imate, kana anu pinau-Do i Ue ndi Musa.

Rawe-rawe pepopoto'ori

³⁷ Mepau Ira i Ue ndi Musa,

³⁸ ”Pepaumo a nto Isaraeli ka potaeako ira nine ondae ranta hawe a inuledo, asalakono mpoweweu rawe-raweno a untuno lembado ka a rawe-rawe atuu asalakono pinonaako bana wungo molo-molowulu.

³⁹ Tempono imengkitao rawe-rawe atuu, ta mopoto'oriakomiu a luwuno parenta-Do i Ue, ranta ka imeweweuo, ka nami mentondao mbo'u po'eheno aroa ka matamiu, anu weweu komiu mepansia.

⁴⁰ Tinoono ka impokompewowoloo ka meweweuo luwuno parenta-Ku, ka gagi mempori ndi Ondae Ue Alamiu.

⁴¹ Ongkuemo Ue, Ue Alamiu, anu wawa komiumo mpeluarako inso i wita Masiri, ka Ongkue gagi Ue Alamiu. Ongkuemo Ue, Ue Alamiu.”