Podoaa 14 - Wunta Mempori

Pe'ewado to Isaraeli

¹ Ka i'amba luwuno bawaa atuu mperaaliki meroku ka tongku atuu mpengese ira ia wongi atuu.

² Luwudo to Isaraeli mpewuruki ndi Musa ka ndi Haruni ka luwuno bawaa atuu mpotaeako ira, ”Ha, ba kimematemo koa i wita Masiri ke i pada one andio!

³ Tembio ka Howawa kami i Ue i wita andio, ka kimemateako ponai, ka kombia ka luwuno ana mami gagi mia tinawa? Nahi moikoopo ke kimpekule i wita Masiri?”

⁴ Mpepau ira pada ondaedo, ”Laluopo tompopotoro asa petewawa, ka to'amba mpekule i Masiri.”

⁵ Menggolontuomo i Musa ka i Haruni i arodo luwuno bawaa Isaraeli anu mpepumpu i tu'ai.

⁶ Sine i Yosua anano i Nuni ka i Kalebi anano i Yepune anu tewinso a luwuno mia anu mempadasoomo wita atuu berio sangkado,

⁷ ka dopotae a luwuno bawaa Isaraeli, ”Wita anu linalo mami mempadasoo atuu tedoa ntu'u tekosi.

⁸ Tewala Dopemoiko kita i Ue, Ira koa wawa kita mpewinso i wita atuu ka meweengakono ndi ontae, asa wita anu hadio ntu'u susu ka siu hoanino.

⁹ Polomo koa si me'ewai Ira i Ue, ka si medoitoako ira tongku i wita atuu, hangano ta pingko tomentele ira. Anu kumadudui ira ibinta iramo, sekono ontae Dokadudui kita i Ue, siimo doitoako ira.”

¹⁰ Ka i'amba luwuno bawaa atuu mpotae ira mewunoakono watu mia orua ira atuu. Sine maramba-Do i Ue tengkita a Ngkema Tepotowoa a luwuno to Isaraeli.

¹¹ Pau-Do i Ue ndi Musa, ”Hawe te'ipia mbo'u domentata Aku tongku andio ka hawe te'ipia mbo'u nahi domebehe mpompe'ala-ala ndi Ongkue, maupo hinaomo luwuno anu kinohali-haliako anu Kuweweuo i tonga-tongado!

¹² Aku tumunduhiako ira haki mesaki ka mokotampula ira, sine omue Aku weweuko gagi tongku anu lalu langkai ka lalu moroso sekonopo ondae.”

¹³ Ka i'amba i Musa mepau ndi Ondae i Ue, ”Tewala mongkona atuu domerongeo to Masiri, inso i tonga-tongado Itaate iramo tongku andio saru roso-Miu,

¹⁴ ka iramo mentutuluo a mpalili i wita andio. Kahinaano luwuno mia andio domerongeomo nine Omiu Ue, kongko i tonga-tongado tongku andio, nine Omiu Ue mepopokita Komiu ndi ondae saru ntepopo'aro rupa, ka nine seru-Miu mentade i wawodo saru Omiu melempa mese'elungi ira a laro nseru i tempono meene ka a laro api i tempono wongi.

¹⁵ Tewala Ipepate ira tongku andio ranta ka itampula, luwuno tongku anu rumongeo mongkona Omiu atuu ira mpotae:

¹⁶ Ondae i Ue nahi Dopolio wawao tongku andio mewinso a wita anu dinandi-Do saru sumpa ndi ondae, ka Dopepate ira i pada one.

¹⁷ Kanandio-andio po'ineeomo roso-Miu Ue mengkaa langkaino kana anu pinau-Miu:

¹⁸ Ondae i Ue atuu tedoa sabara ka hadio ntu'u pompehohawa-Do, Do'oninio sala ka pe'ewa, sine nahi Dopotolao mia anu sala inso a mpohukua. Ondae mombalo salano ama a luwuno anano, a inule ko'otolu ka ko'opaa.

¹⁹ Po'ineeomo I'oninio salado tongku andio menunu saru langkaino pompehohawa-Miu, kana I'oninioko iramo salado tongku andio mompu'u inso i Masiri hawe i ndi'ai.”

²⁰ Mepau Iramo i Ue, ”Ku'oniniako iramo salado menunu kana po'emamu.

²¹ Butumo koa, hangano Ongkue anu tuwu ka hangano maramba-Do i Ue anu buke asa wawo ntolino,

²² luwuno mia anu kumitaomo maramba-Ku ka luwuno anu kinohali-haliako anu Kuweweuo i Masiri ka i pada one, sine pempulumo dome'ara-arahako Aku ka nahi domebehe merongeo pau-Ku,

²³ manasa nahi ta kumitao wita anu Kudandiakono sumpa ndi uempu'udo! Luwuno anu tumata Aku andio nahi ta kumitao.

²⁴ Sine tetenaa-Ku i Kalebi, hangano me'aroa susua ka buke petondano ndi Ongkue, Aku wawao mewinso a wita anu umariomo ipewinsokio atuu ka inuleno ta me'ueo.

²⁵ To Amale ka to Kana'a mpo'ia i lembono. Onaemo pu'uno impepokulemo tisomo ka impelungkamo melako i pada one te'aro i Tahi Teberau.”

²⁶ Mepau Ira mbo'u i Ue ndi Musa ka ndi Haruni,

²⁷ ”Hawe te'ipia mbo'u ke bawaa anu lambaha andio mpewuruki ndi Ongkue? Luwuno pewurukido to Isaraeli ndi Ongkue Kurongeomo.

²⁸ Pauako iramo: Hangano Ongkue anu tuwu, kanandiomo pau-Do i Ue, mentee ntu'u kana anu pinaumiu i aro-Ku, kanandiomo Aku weweuo ndi omiu.

²⁹ I pada one andio hadio wata ngkoroi ta tumambole, luwuno mia i olomiu anu binuri, luwuno anu tinuwuno rua pulu nta'u torea, hangano mpewuruki komiumo ndi Ongkue.

³⁰ Mentee ntu'u nahi komiu mpewinso a wita anu Kudandiakomiu saru sumpa ka impo'iangario, sangkadio i Kalebi anano i Yepune ka i Yosua anano i Nuni!

³¹ Mongkona luwuno anamiu anu impotae ta gagi mia tinawa, ondaemo anu Aku wawa ira mpewinso, ka domento'orio wita anu nahi mpe'eheo.

³² Sine mongkona omiu, luwuno wata ngkoroimiu ta tumambole i pada one andio,

³³ ka luwuno anamiu ira mpelakopi gagi puu mpopakambi i pada one ilarono pato pulu nta'u ka ira mentembio nahi petenunumiu ranta luwuno wata ngkoroimiu pingko i pada one.

³⁴ Menunu saru porokono oleo imempadasoo wita atuu, pato pulu oleo, ka asa oleo rineke asa nta'u, ka ilarono pato pulu nta'u asalakono komiu mentembio salamiu, ka imento'orio anu nahi Kupe'eheo.

³⁵ Ongkue Ue, anu mepau kanandio. Mentee ntu'u Aku weweuo luwuno atuu a luwuno bawaa anu lambaha andio anu memoroko iramo umewai Aku. I pada one andio ira mepingko ka i ndi'aimo ira memate.”

³⁶ Kanatuumo luwuno mia anu umari tinenano i Musa padasoo wita atuu, anu mpekule iramo ka hangano pompohawe lele mosa'o mongkona wita atuu onaemo ka dompewuruki luwudo bawaa atuu ndi Musa.

³⁷ Luwuno mia anu mompohawe lele mosa'o mongkona wita atuu mate hangano pohuku i aro-Do i Ue.

³⁸ Butu i Yosua anano i Nuni ka i Kalebi anano i Yepune anu kongko tuwu inso i olodo luwuno mia anu umari lumako padasoo wita atuu.

Ponsapoia i selata mentenangi ira

³⁹ Mansano mohaweo i Musa pau andio a luwuno to Isaraeli, tongku atuu tedoa mpompemasusa.

⁴⁰ Tisomono dompewangu mo'o-mo'oru ira mpewuatako a punsuno torukuno saru mpotae, ”Kitao, kita koa melako a wita anu pinau-Do i Ue atuu, maupo mpoweweu kitamo hala.”

⁴¹ Sine motae i Musa, ”Tembio ka ime'ewaio petena-Do i Ue? Mongkona atuu nahi ta hina hasilino.

⁴² Siimo imelako, hangano Ondae i Ue nahi Ira kongko i tonga-tongamiu, kasi donangi komiu iwalimiu.

⁴³ Mentee ntu'u, to Amale ka to Kana'a mekongko ira i ra'ai i aromiu ka komiu memateako ponai. Hangano mpewolili komiu mebungkui Ira i Ue, ka Ondae i Ue nahi Ira kumongkomi komiu.”

⁴⁴ Maupo kanandio, mpe'upuako ira mpewuatako a punsuno torukuno atuu, sine burua pedandia-Do i Ue ka i Musa nahi bintao pekemaa.

⁴⁵ Ka i'amba mpetii iramo to Amale ka to Kana'a anu mpo'iangario mentorukuno atuu ka do'amba mposapoi ka sumiarawo ira hawe i Horoma.