Podoaa 13 - Wunta Mempori

Hopulu ka orua puu pompadaso

¹ Mepau Ira i Ue ndi Musa,

² ”Pontenamo ba te'opia mia padasoo wita Kana'a, anu Aku weeako ira to Isaraeli. Inso a sompo sukuno uempu'udo, omue asalakono montena asa mia, luwuno petewawa i olodo.”

³ Ka i'amba i Musa tumena ira inso i pada one Parani, menunu saru petena-Do i Ue. Luwudo mia atuu onaemo petewawa i olodo to Isaraeli.

⁴ Ndiomo luwuno needo: Inso a nsuku Rube: i Siamua anano i Sakuri;

⁵ inso a nsuku Simeo: i Sapati anano i Hori;

⁶ inso a nsuku Yehuda: i Kalebi anano i Yepune;

⁷ inso a nsuku Isakari: i Yigali anano i Yusupu;

⁸ inso a nsuku Eparai: i Hosea anano i Nuni;

⁹ inso a nsuku Benami: i Paliti anano i Rapu;

¹⁰ inso a nsuku Sebulo: i Gadieli anano i Sodi;

¹¹ inso a nsuku Yusupu, onaemo inso a nsuku Manase: i Gadi anano i Susi;

¹² inso a nsuku Dani: i Amieli anano i Gemali;

¹³ inso a nsuku Asere: i Seturi anano i Mikaeli;

¹⁴ inso a nsuku Napatali: i Nahibi anano i Wopisi;

¹⁵ inso a nsuku Gadi: i Gueli anano i Makihi;

¹⁶ Onaemo needo luwuno mia anu tinenano i Musa padasoo wita atuu. I Hosea anano i Nuni neeno i Yosua pinoponeeno i Musa.

¹⁷ I Musa tumena ira mempadasoo wita Kana'a, ”Imelakomo inso i ndi'ai i wita Nege ka impewuatakomo a mentorukuno,

¹⁸ Impepenteeomo kana'umpe pongkitamiu wita atuu, tongku anu mpo'iangario moroso ira ke molema, tedei ira ke hadio.

¹⁹ Kana'umpe mbo'u wita anu pino'iangarido, ba moiko ke mosa'o; kana'umpe luwuno kota po'iangaado, mebente ke naahi.

²⁰ Ka i'amba kana'umpe wita atuu, ba mewalo ke morungku, i ra'ai ba hadio koa keu ke naahi. Impedatoo aroamiu ka impowawamo tedei inso a hasilino wita atuu.” Tempo atuu kontongaano tempo po'opua wua anggoro anu amba-ambano.

²¹ Melako iramo mempadasoo wita atuu mompu'u inso i pada one Sini hawe i Rehobo, a nsala lumako i Hamati.

²² Mpelempa ira melaloo wita Nege ka mehawe i Heberoni. I ra'ai rau i Ahimani, i Sesai ka i Talumai, inuledo to Enaki. Heberoni winangu tese'elu opitu nta'u sekono Soani i Masiri.

²³ Mansado mehawe i Lembono Esikoli, i ra'ai dompompole asa sampa saru asa doa wua anggoro, ka i'amba orua mia sumelaakono asa mpole keu. Mpowawa ira mbo'u ba'opia wua delima ka wua ara.

²⁴ Po'ianga atuu domeneeakono mia Lembono Esikoli, hangano doano wua anggoro anu pompoledo to Isaraeli i ra'ai.

²⁵ Umarino pato pulu oleo, mpekule ira inso a mpopadasoa wita atuu.

²⁶ Melako ira ntepohaweakono i Musa, i Haruni ka luwuno bawaa Isaraeli i Kadesi, i pada one Parani. Mpowawa ira lele ndi ondae ka a luwuno bawaa saru mopokitao hasilino wita atuu ndi ondae luwudo.

²⁷ Domentutuluakono, ”Mpewinso kamimo i wita, isua itena kami. Lano wita atuu hadio ntu'u susu ka siu hoanino, ndiomo hasilino.

²⁸ Butu koa, tongku anu mpo'ia i wita atuu memoroso ira, luwuno kotano mebente ka langkai ntu'u. Inuledo mbo'u to Enaki kimengkita iramo i ra'ai.

²⁹ To Amale mpo'ia i Wita Nege, to Heti, to Yebusi ka to Amori mpo'ia i mentorukuno, to Kana'a mpo'ia i asa ngkeu wiwi ntahi ka i asa ngkeu wiwi ngkoro Yarade.”

³⁰ Ka i'amba i Kalebi mo'arahako mokorodoo aroado tongku atuu i arono i Musa, ipotae, ”Naahi! Kita koa melako ka mpetorokio wita atuu, hangano manasa kita koa menangio!”

³¹ Sine luwuno mia anu perongano lumako i ra'ai mpotae, ”Nahi kita mpokomelako sumapoio tongku atuu, hangano memoroso irapo sekono ontae.”

³² Dompohaweako ira mbo'u to Isaraeli lele mosa'o mongkona wita anu domempadasoo, dompotae, ”Wita anu kimelaloomo mempadasoo, onaemo asa wita anu mongkaa palilino. Luwuno mia anu kinita mami i ra'ai onaemo luwuno mia anu me'o'ondau tinadedo.

³³ Kimengkitao mbo'u i ra'ai mia melolangkai, inuleno i Enaki te'inso a mia melolangkai. Kimengkitao koroi mami kana kosume, kanatuu koa mbo'u domengkita kami.”