Podoaa 12 - Wunta Mempori

Halado i Miriami ka i Haruni

¹ I Miriami ka i Haruni tumatao i Musa mongkona saru beine to Kusi anu inalano, hangano onae mo'alaomo asa beine to Kusi.

² Dopotae, ”Mentee ntu'u ke Ondae i Ue mepau butu telalo ndi Musa? Kombake Ondae mepau telalo mbo'u ndi ontae?” Mongkona atuu Dorongeo i Ue.

³ Kanatuumo i Musa asa mia anu tedoa mauru, laluaopo sekono sompo mia i wawontolino.

⁴ Borono Dopepau i Ue ndi Musa, ndi Haruni ka ndi Miriami, ”Impeluarakomo otolu komiu a ngkema Tepotowoa.” Mpeluarako iramo otolu ira.

⁵ Ka Do'amba i Ue metii a laro nseru-Do ka mentade a mpewowano kema atuu. Dopoboi ira i Haruni ka i Miriami; me'aro iramo orua ira.

⁶ Mepau Ira, ”Irongeomo pau-Ku andio. Tewala i olomiu hinao asa mia nabi, asalakono Ongkue Ue mokomengkaao koroi-Ku ndi onae a laro pongkita. Aku mepau saru onae a laro mo'ipi.

⁷ Nahi kanatuu saru tetenaa-Ku i Musa, asa mia anu metenunu a laro luwuno raha-Ku.

⁸ Tepo'aro rupa Kupepau saru onae, nahina mo'oloti, komba mesingguru ka ikitao rupa-Do i Ue. Tembio ke nahi imedoito tumatao tetenaa-Ku i Musa?”

⁹ Tesingkaomo tekuda-Do i Ue ndi ondae, ka Do'amba lumako.

¹⁰ Tempono mewuatakoomo seru inso i wawono kema, tengkitaomo i Miriami kona haki ngkuli anu mesaki, mopute kana seru baku. I Haruni mewolili ndi Miriami ka ikitao i Miriami kona haki ngkuli anu mesaki!

¹¹ Ka i'amba motae i Haruni ndi Musa, ”Ipehohawa aku ueku, siimo ipopotembia kami hala mami anu wineweu mami a laro benge-benge mami.

¹² Si po'ineeo igagi kana ana dalo anu mate tempono ipeluarako inso a laro kompono ineno entonga moboomo ihino.”

¹³ Onaemo ka ipebooli i Musa ndi Ondae i Ue, ”Oo Ue Ala, po'ineeomo Ipokotompao.”

¹⁴ Ka Do'amba mepau i Ue ndi Musa, ”Ande-andeno amano umonuio rupano, nde nahi ta mo'o'anuno ke i larono opitu oleo? Po'ineeomo opitu oleo tehineno ipinonsia i bungkuno pekemaa, ka i'amba moikoomo iwali tinarima.”

¹⁵ Ka i'amba i Miriami pinonsia i bungkuno pekemaa opitu oleo tehineno, ka tongku atuu nahi dompelungka banapi wali tinarima i Miriami.

¹⁶ Ka i'amba mpelungka iramo inso i Haseroti ka mpekema i pada one Parani.