Podoaa 11 - Wunta Mempori

Api-Do i Ue

¹ Asa tempo tongku atuu mpewuruki i aro-Do i Ue mongkona urasa'odo. Rumongeo atuu, tesingkaomo tekuda-Do i Ue. Ka i'amba api-Do i Ue melanga i olodo ka ikaano wiwino pekemaa.

² Mpebooli iramo tongku atuu ndi Musa, ka i Musa mekakai ndi Ondae i Ue; ka i'amba mate api atuu.

³ Onaemo pu'uno mia meneeakono po'ianga atuu Tabera, hangano api-Do i Ue melangaomo i olodo.

Ondae i Ue medandi mompowee bau

⁴ Asa bawaa mia anu kongko i olodo tedoa me'ineheakono bau, ka to Isaraeli mbo'u mpengese dompotae, ”isemake anu ta pakaa kita bau?

⁵ Terorambe kita a bou anu kinaato i Masiri nahi inowahi, a nsuai, mandike, lewe lasona, lasona motaha ka lasona mopute.

⁶ Sine, kanandio-andio tedoa kitamo memorungku, nahina maupo hapa sangkadio butu mana andio anu kinitato.”

⁷ Ndio mbo'u mana atuu kana ketumba ka tengkita kana hulu bedola.

⁸ Tongku atuu mpelulu ngkoraane ngkoramai mebinio, ka do'amba megiliakono watu pogili ke me'isao a nohu. Domenahuo a ngkuro wita ka domeweweuo gagi roti bonggoli. Namino kana namino kaanga anu ginore.

⁹ Mansano metii tontoru a mpekemaa i tempono wongi, metiiomo mbo'u mana i tu'ai.

¹⁰ Ironge ira i Musa tongku atuu, luwuno mia inso a sompo suku mpengese i arono pewowa kemano. Tekuda-Do i Ue tedoa tesingka, ka i Musa kumitao mongkona atuu mosa'o.

¹¹ Ka i'amba i Musa mepau ndi Ondae i Ue, ”Tembio ka Iweweuo tetenaa-Miu andio nahi moiko ka tembio nahi kupohawe pompehohawa a pongkita-Miu, ranta ka Ipopotembiakune anggaa a luwuno tongku andio?”

¹² Ongkue ke anu mentiaako ira tongku andio ke ongkue anu me'anaako ira, ranta ka Ipepau ndi ongkue: Babaomo kana asa mia puu mpete'ia mobaba nana'ote anu mo'uo te'aro i wita anu Kudandiakono sumpa ndi uempu'uno?

¹³ Inso isuake aku mo'ala bau ka domewineeako luwuno tongku andio? Hangano mpengese ira saru mpotae ndi ongkue: Poweeakami bau kaanga mami.

¹⁴ Nahi kupolio tumembio asa-asaku anggaa a luwuno tongku andio, hangano mongkona atuu tedoa kupemobeao.

¹⁵ Tewala moweweu Komiu kanandio ndi ongkue, moikoopo Ipepate akumo, tewala lano aku mohawe pompehohawa a pongkita-Miu, ka siimo kukitao urasa'oku.”

¹⁶ Ka i'amba mepau Iramo i Ue ndi Musa, ”Pumpu iramo i aro-Ku inso i olodo luwuno mia memota'u Isaraeli pitu pulu mia, anu uto'orio gagi mia memota'uno tongku ka puu mpo'atora bawaano. Wawa iramo a Ngkema Tepotowoa, ka dompentade i ra'ai saru omue.

¹⁷ Aku metii ka mepau saru omue i ra'ai, ka Ku'amba umalao asa ntia Penaa anu kongko ndi omue ka numaao ndi ondae, ka saru omue ira mentembio anggaa a luwuno tongku atuu ka siimo mbo'u utembio asa-asamu.

¹⁸ Sine, a tongku atuu asalakono pauako ira: Pokomemporiomo koroimiu tiano tisomo, tempono komiu mpokaa bau. Kombake mpengese komiumo i aro-Do i Ue, saru mpotae: isemake anu ta moweeakami mongkaa bau? Moiko ntu'u tomentuwu i Masiri? Onaemo pu'uno Ondae i Ue Ira moweeakomiu bau kai mpokaa.

¹⁹ Komba butu asa oleo komiu mengkaano, komba mbo'u orua oleo, olima oleo, hopulu oleo ke rua pulu oleo,

²⁰ sine sompo asa wula, ranta bau atuu meluarako inso a engemiu ka ranta kai memongkokowuere. Hangano impebungkui Iramo i Ue anu kongko i tonga-tongamiu ka mpengese i aro-Do ka mpotae: Pombio ke ka tompeluarako inso i Masiri?”

²¹ Sine motae i Musa, ”Tongku anu perongaku andio, anu mpelempa karu, porokono nomo etu nsowu mia, ka mepau Komiu: Aku moweeako ira bau, ka sompo asa wula ira mengkaano!

²² Tewala luwuno bembe bimba ka sapi domensinumbeleako, nde ta koa sompo? Ke tewala luwuno bou a ntahi domerinakoako, nde ta koa sompo?”

²³ Sine sangki-Do i Ue ndi Musa, ”Nde kae-Do i Ue tetidahi? Kanandio-andio kokumitao ke gagio pau-Ku ndi omueke naahi!”

Pitu pulu mia memota'u

²⁴ Meluarako i Musa ka ipohaweo pau-Do i Ue a tongku atuu. Ipumpu ira pitu pulu mia inso a luwuno mia memota'udo tongku atuu ka itena ira mpentade lumimbuo kema.

²⁵ Ka i'amba metii Iramo i Ue a laro nseru ka Dopepau ndi Musa. Ka Do'amba umalao asa ntia Penaa anu kongko ndi onae ka Donaao a pitu pulu mia memota'u atuu. Mansano Penaa atuu kongko ndi ondae, ipewinsoki iramo Penaa kana nabi, sine umarino atuu naamo mbo'u.

²⁶ Orua mia, anu asa meneeako i Elidadi, anu susua meneeako i Medadi, da mo'ia a mpekemaa. Ondae andio tewinso a luwuno mia anu mebinuri, sine nahi dopetonda lumako a ngkema. Penaa mbo'u atuu kongko ndi ondae ka ipewinsoki ira Penaa kana nabi a mpekemaa.

²⁷ Ka i'amba meluluomo asa mia mongura pauakono i Musa, ”I Elidadi ka i Medadi ipewinsoki ira Penaa kana nabi a mpekemaa.”

²⁸ I Yosua anano i Nuni, anu mompu'u mongura igagi atano i Musa, sumangki, ”Ueku i Musa, pokompenaa-naa iramo!”

²⁹ Sine motae i Musa ndi onae, ”Nde mokuako koa ke mokowali aku? Ha, ande-andeno luwuno bawaa-Do i Ue gagi nabi, hangano Ondae i Ue moweeako ira Penaa-Do!”

³⁰ Ka i'amba i Musa ka luwuno mia memota'u Isaraeli mpekule a mpekemaa.

Manu-manu puru

³¹ Ka i'amba mepuuriomo angi te'inso ndi Ondae i Ue anu mowawa manu-manu puru inso te'alaako a ntahi, ka irawoo a wawo mpekemaa ka lumimbuo, bara'ura asa oleo pelempaa olaino a sompo siuno ka bara'ura orua hiku mantandeno inso a wawo wita.

³² Ka i'amba asa oleo ka wongi atuu, asa oleo mbo'u tisomono tongku atuu pumpu ira manu-manu puru atuu. Sompo mia mopumpu tedeinomo hopulu homeri. Ka do'amba mensiarawoo isuamokoa lumimbuo pekemaa tiado ondaedo.

³³ Kontongaano bau atuu kongko a ngangado, napi nginai, tesingkaomo tekuda-Do i Ue a tongku atuu ka Ondae i Ue tumunduhiako ira urasa'o anu langkai ntu'u tongku atuu.

³⁴ Onaemo pu'uno po'ianga atuu nineeako Kiberoti-Ta'awa, hangano i ra'aimo domengkinaburu mia anu tedoa mingki pongkaa bau.

³⁵ Inso i Keberoti-Ta'awa mpelungka iramo tongku atuu melako i Haseroti ka mpo'ia i tu'ai.