Podoaa 10 - Wunta Mempori

Unino napiri

¹ Mepau Ira i Ue ndi Musa,

² ”Weweuomo orua napiri inso a nsalaka. Asalakono uweweuo atuu inso a nsalaka pinalu, ka upakeo moboi ira bawaa Isaraeli ka tumena ira sorodadudo mpelungka.

³ Mansano pinuuri orua napiri atuu, luwuno bawaa atuu asalakono mpepumpu i aromu i arono pewowano Kema Tepotowoa.

⁴ Tewala butu asa pinuuri, luwuno petewawa, luwuno petewawa sorodadudo Isaraeli asalakono mpepumpu i aromu.

⁵ Tempono imempuurio unino pepopoto'ori, sorodadu anu mpekema i sabaano oleo asalakono mpelungka;

⁶ Tempono imempuurio unino pepopoto'ori kompenduano, sorodadu anu mpekema i selata asalakono mpelungka. Gagi unino pepopoto'ori asalakono pinuuri tumena ira mpelungka.

⁷ Sine, tumena ira bawaa mpepumpu, asalakono butu imempuurio, siimo ipe'uni pepopoto'ori.

⁸ Luwuno napiri atuu asalakono domempuurio anano i Haruni, luwuno sando mpesomba. Onaemo anu gagi pompakosi ranta nahina tampulaano ndi omiu hawe a inulemiu.

⁹ Tewala melako komiu mpetea i witamiu umewaio iwali anu mokomarasai komiu, asalakono napiri impopo'unio pepopoto'ori, kai merinambe i aro-Do i Ue, Ue Alamiu, ka kinadudui inso a iwalimiu.

¹⁰ A luwuno mbo'u oleo imemawongko, a luwuno maroaamiu ka sompo pompu'uano wula, asalakono imempuurio napiri atuu ia tempo mpopesombaako luwuno pesomba tinunumiu ka luwuno pesomba tekaduduiamiu; tinoono kai merinambe i aro-Do Ue Alamiu. Ongkuemo Ue, Ue Alamiu.”

Mpelungka inso i torukuno Sinai

¹¹ Ia ta'u ko'orua, wula ko'orua, tanggala rua pulu wula atuu, seru atuu mewuatako i wawono Kema Mempori, po'iangano songka-Do Ue Ala.

¹² To Isaraeli mbo'u mpelungka inso i pada one Sinai montonda potudano pelungkado, ranta kai penaa-naa seru atuu i pada one Parani.

¹³ Onaemo pelungkado amba-ambano montonda petena-Do i Ue telalo ndi Musa.

¹⁴ Anu tese'elu melungka onaemo sorodadu anu i totono bandera tepo'asaado inuleno i Yehuda montonda bawaado. Anu metewawa a bawaa atuu onaemo i Nahasoni anano i Aminada;

¹⁵ Anu metewawa bawaa suku inuleno i Isakari onaemo i Natane'eli anano i Suari;

¹⁶ Anu metewawa a bawaa suku inuleno i Sebulo onaemo i Eliabi anano i Heloni.

¹⁷ Umarino atuu Kema Mempori rinongka, ka mpelungka iramo inuleno i Geresoni ka inuleno i Merari anu mentandeo Kema Mempori atuu.

¹⁸ Ka i'amba mpelungka iramo sorodadu anu i totono bandera tepo'asaado i Rube montonda bawaado. Anu metewawa a bawaa atuu onaemo i Elisuri anano i Siedeuri;

¹⁹ Anu metewawa a bawaa suku inuleno i Simeo onaemo i Selumieli anano i Surisiadai;

²⁰ Anu metewawa a bawaa suku inuleno i Gadi onaemo i Elisapi anano i Rehueli.

²¹ Umarino atuu mpelungka iramo to Kehati, anu mentandeo luwuno sangka po'ianga mempori; Kema Mempori pinasaomo se'eluno napi domehawe.

²² Ka do'amba mpelungka sorodadu anu i totono bandera tepo'asaado inuleno i Eparai montonda bawaado;

²³ Anu metewawa a bawaa atuu onaemo i Elisama anano i Amihudi; anu metewawa a bawaa suku inuleno i Manase onaemo i Gamalieli anano i Pedasuri;

²⁴ Anu metewawa a bawaa suku inuleno i Benami onaemo i Abidani anano i Gideoni.

²⁵ Gagi baresi pokotompa luwuno sorodadu atuu, mpelungka iramo sorodadu anu i totono bandera tepo'asaado inuleno i Dani montonda bawaado; anu metewawa a bawaa atuu onaemo i Ahieseri anano i Amisiadai;

²⁶ Anu metewawa a bawaa suku inuleno i Asieri onaemo i Pagieli anano i Okirani;

²⁷ Anu metewawa a bawaa suku inuleno i Napatali onaemo i Ahira anano i Enani.

²⁸ Onaemo potudano pelungkado to Isaraeli montonda bawaado, tempono dompelungka.

²⁹ Ka i'amba motae i Musa ndi Hobabi anano i Rehueli to Midia, ponino i Musa, ”Kami mpelungka a mpo'ianga anu dinandi-Do i Ue tempono Dopepau: Aku koa meweengakono ndi omiu. Ipetondamo merongaakami, kami koa mpoweweu moiko ndi omiu, hangano Ondae i Ue modandiako ira anu moiko a nto Isaraeli.”

³⁰ Sangkino ndi Musa, ”Nahi aku metonda, sine aku lumako i witaku ka a mpepaekompoku.”

³¹ Motae i Musa, ”Ku'emao si binta kami, hangano omiumo anu tumo'orio kana'umpe kami mpekema i pada one; komiu gagi mata nsalamami.

³² Tewala itonda kami, moikoa anu Ira weweuo i Ue ndi omami kami koa meweweuo mbo'u ndi omiu.”

³³ Ka i'amba mpelungka iramo inso a ntorukuno-Do i Ue ka mpelempa otolu oleo olaino pelempaa, sekono Burua pedandia-Do i Ue melungka i arodo ka mpelempaa otolu oleo olaino pelempaa mpo'ungke po'ianga pena-naado.

³⁴ Seru-Do i Ue kongko i wawodo tempono meene, tempono dompelungka inso a mpekemaa.

³⁵ Sompo ipelungka burua pedandia atuu, motae i Musa, ”Ipentademo oo Ue, ka dontesiarawo iwali-Miu ka luwuno mia anu umo'aliaa-Komiu mpolai inso i aro-Miu.”

³⁶ Sompo ipenaa-naa burua pedandia atuu, ipotae, ”Ipekulemo, oo Ue a bawaa Isaraeli anu mapasowu-sowu andio.”