PILIPI 4 - Wunta Mempori

¹ Onaemo pu'uno, pepaekompo anu pinehohawaku ka anu kinekewoiku, po'undeku ka ramba-ramba uluku, impentademo mbo'u temoroso ndi Ondae i Ue, hei pepaekompo anu pinehohawaku!

Patudu pokotompa 4:2-9

² I Euodia ka i Sintike kupatudu ira, ka dope'asa aroa ka pinewowolo ndi Ondae i Ue.

³ Tamoako, ku'emao mbo'u ndi omue Sunsugo, waliku anu metenunu: tulungi iramo. Hangano mo'angga iramo saru ongkue a pompalelea Lele Mawongkoa, meronga saru i Keleme ka wali-waliku pe'asa mpo'angga anu mehano, anu needo teburi a Wunta tuwua.

⁴ Impo'undemo mpiha ndi Ondae i Ue! Pohonapo mbo'u kupauo: Impo'undemo!

⁵ Po'ineeomo domento'orio luwuno mia moikono aroamiu. Ondae i Ue umpeda Iramo!

⁶ Si mporerengkoo mongkona hapamo koa, sine impokomengkaaomo a luwuakoano po'ehemiu ndi Ondae Ue Ala a laro mpekakai ka po'ema saru pontarimakasi.

⁷ Rodoa inso ndi Ondae Ue Ala, anu lumaloio luwuno akala, ta mekariao aroa ka pinewowolomiu ndi Ondae i Kerisituu Yesu.

⁸ Gaagi poko'ariano, pepaekompo, luwuno anu mentee, luwuno anu maramba, luwuno anu moleo, luwuno anu mempori, luwuno anu mo'ahi, luwuno anu momoiko irinonge, luwuno anu pinau moiko ka tekona inunde-unde, impewowoloomo luwuno atuu.

⁹ Ka hapa anu impepaguruakonomo ka hapa anu imentarimaomo, ka hapa anu imerongeomo ka hapa anu imengkitaomo ndi ongkue, imeweweuomo atuu. Ka Ondae Ue Ala pu'uno rodoa Ira kumongkomi komiu.

Tarimakasi hangano pompoweedo bawaa 4:10-20

¹⁰ Mawongko ntu'u aroaku ndi Ondae i Ue, nine poko'ariano wali tuwu pinewowolomiu ka po'o'aroamiu ndi ongkue. Lano hinao koa mpiha po'o'aroamiu, sine nahina te'aluamiu.

¹¹ Kupauo andio komba hangano makura, hangano mepaguru akumo mesompoo a luwuno teweweu.

¹² Kuto'orio hapa atuu makura ka kuto'orio hapa atuu mare'ea. A luwuakoano ka a hapamo koa nahina te'asa anu gagi rahasia ndi ongkue; moiko mongkona mowohi, maupo mongkona mokoninggo, moiko mongkona mare'ea maupo mongkona makuraa.

¹³ Luwuakoano kupokotembio ndi Ondae anu moweeakune roso.

¹⁴ Sine moiko koa mbo'u wineweumiu, nine mpo'ala komiumo tia a laro masusaku.

¹⁵ Imento'orio koa mbo'u, hei to Pilipi; i tempono da iaopo kupompu'u paleleo Lele Mawongkoa, tempono kupelungka inso i Makedonia, nahina maupo te'asa bawaa anu morekeakune pasua ka anu ta sininga ndi ongkue sangkadio inso ndi omiu.

¹⁶ Hangano maupo i Tesalonika pohonamo impo'oliwiakune petulungi.

¹⁷ Sine anu inungkeku komba pompowee atuu, tendeano wuano, anu tekense mokolangkaio uramiu.

¹⁸ Kanandio-andio kutarimaomo luwu anu kinereku inso ndi omiu, tendeano toreaomo. Mare'e akumo, hangano kutarimaomo oliwimiu inso ndi Epaporoditu, aasa pesomba anu mana mo'ahi, aasa pesomba anu inehe-Do ka Dopemoikoo Ue Ala.

¹⁹ Ondae Ue Alaku Ira mokosompoo luwuno kineremiu montonda kaeaa ka maramba-Do ndi Ondae i Kerisituu Yesu.

²⁰ Pinokomaramba Iramo Ue Ala ka Amato ranta nahina tampulaano! Ami.

Tabea 4:21-23

²¹ Impohaweomo tabeaku a sompo-sompo mia mempori a ntepo'asaa ka Ondae i Kerisituu Yesu. Tabea ndi omiu inso a luwuno pepaekompo, anu meronga saru ongkue.

²² Tabea ndi omiu inso a luwuno mia mempori, tamoako inso ndi ondae anu a langkanaedo Datu.

²³ Pe'aroa-Do Ue Yesu Kerisituu kumongkomio penaamiu!