PILIPI 3 - Wunta Mempori

^1a Poko'ariano, pepaekompoku, impo'undemo ndi Ondae i Ue.

Menteea anu inso ndi Ondae Ue Ala 3:1b-16

^1b Buriakomiu mbo'u mongkona andio komba kupemobeao ka moweeakomiu manasaano.

² Imetangkoro ira dahu, imetangkoro ira mia mpo'angga anu mosa'o gaudo, imetangkoro ira mia mpotindi anu nahi mentee,

³ hangano ontaemo mia mpetindi, anu mpesomba hangano Penaa-Do Ue Ala, ka tompo'undeakono ndi Ondae i Kerisituu Yesu ka nahi tompe'ala-alao anu mongkona tuwu ntolino.

⁴ Maupo ongkue hinao koa mbo'u pu'uno me'ala-alao mongkona tuwu ntolino. Tewala hinao mia susua anu potaeno mokompe'ala-alao mongkona tuwu ntolino, ongkue laluaopo mbo'u:

⁵ tinindi a oleo ko oalu, inso a tongku Isaraeli, inso a nsuku Benami, to Ibarani ntu'u, mongkona pontuduku a songka Taura ongkue to Parisi,

⁶ mongkona inangga ongkue anu mobobarasai bawaa, mongkona menteea a mpontondaa songka Taura nahina tataaku.

⁷ Sine hapa anu i ndi'upua gagi uraku, kanandio-andio kutuduo rugiku hangano Ondae i Kerisituu.

⁸ Tendeano luwuakoano kutuduo rugi, hangano ponto'ori mongkona Ondae i Kerisituu Yesu, Ueku, marambaopo sekono luwuno. Hangano koa Ondae kupotolaomo luwuno atuu ka tumuduo rompo, ka kuhawe Ira koa i Kerisituu,

⁹ ka kongko ndi Ondae komba menteeku ongkueku hangano montonda songka Taura, tendeano menteea hangano pompe'ala-ala ndi Ondae i Kerisituu, onaemo menteea anu Doweeakune Ue Ala montonda pompe'ala-ala.

¹⁰ Po'eheno aroaku onaemo ka kuto'ori Ira ka pabawano pewangu-Do ka tepo'asaa a nteweweu nsa'o-Do, ka kugagi mengkenaako Ira a matea-Do,

¹¹ poko'ariano ka kupohawe pewangua inso i olodo mia mate.

¹² Komba ndio kana kuhaweomo mongkona andio ke bobotoliomo pompe'ala-alaku, tendeano ku'ungkeo mpiha, ba mansa koa kupokorakoo, hangano ongkue mbo'u Dorako akumo i Kerisituu Yesu.

¹³ Pepaekompo, ongkue isa'a komba tumuduo, nine kurakoomo, sine onae andio anu wineweuku: kukolupeo hapa anu i bungkukumo ka umaropio hapa anu i aroku,

¹⁴ ka melulu a anu tinunggai ka kupohawe pompowee, onaemo pepoboi nsuruga inso ndi Ondae Ue Ala a ntepo'asaa ka Ondae i Kerisituu Yesu.

¹⁵ Onaemo pu'uno tome'aiwamo, anu bobotoliomo pompe'ala-alato, mpompewowolo kanandio. Ka tewala susua pinewowolomiu mongkona anu asa rupa, mongkona atuu Ira koa mokomengkaao mbo'u Ue Ala ndi omiu.

¹⁶ Sine moikoomo ponto'ori anu tomehaweomo tompotilaloakono montonda sala anu tomentondaomo.

Patudu a bawaa 3:17–4:1

¹⁷ Pepaekompo, imentondaomo pandiriku ka imperio iramo, anu mentuwu mpengkena kana omami anu gagi pandirimiu.

¹⁸ Hangano, kana anu mararuomo kupauakomiu, ka anu kupokomengkaao mbo'u kanandio-andio kontongaaku mengese, hadio mia anu mentuwu gagi iwalino keu pinotamba-Do i Kerisituu.

¹⁹ Tompaakoado onaemo masolaa, Uedo onaemo kompodo, marambado onaemo mokoburudo, pinewowolodo butu te'aro a ntuwu tolino.

²⁰ Hangano ontae palilino Poparentaa suruga, ka inso mbo'u i tu'ai tomensikori Ira i Ue Yesu Kerisituu gagi Puu Pongkadudui,

²¹ anu Ira balio koroito anu mongkokolaro andio, ranta ka ikana koroi-Do anu maramba, montonda pabawa-Do anu mokompetuunduo luwuakoano ndi Ondae.