PILIPI 2 - Wunta Mempori

Patudu ka intepo'asa ka mpe'urumako kana Ondae i Kerisituu 2:1-11

¹ Gaagi hangano ndi Ondae i Kerisituu hinao patudu, hinao pontarero pompehohawa, hinao tepo'asaa Mpenaa, hinao mambe pehohawa ka mambe pekokolaroako,

² onaemo pu'uno saru andio impokosompoo po'undeku: imentuwumo mpe'asa aroa ka pinewowolo, a laro aasa pompehohawa, aasa sumanga, aasa tinoo,

³ saru nahi po'ungke tiano onaeno ke po'unde-unde anu nahina tuduno. Tendeano impe'urumako anu asa mia tumuduo anu susua laluaopo sekono onae;

⁴ ka sompo-sompo mia ka si butu merioo tiano onaeno, sine tiadokoa mbo'u mia susua.

⁵ Po'ineeomo a laro ntuwumiu ntepo'asa, mponaa pinewowolo ka po'o'aroa anu hinawe koa mbo'u ndi Ondae i Kerisituu Yesu,

⁶ anu maupo merupa kana Ondae Ue Ala, nahi Dotuduo pengkena-Do saru Ondae Ue Ala atuu gagi tia-Do anu asalakono kinorahako,

⁷ tendeano Dopokomoaomo koroi-Do ondae-Do ka Dopekoroi kana aasa ata, ka gagi mengkena saru mia.

⁸ Ka a laro nteweweu-Do kana mia, me'urumako Iramo ka momperorongeako hawe ka Domate, tendeano ranta mate a ngkeu pinotamba.

⁹ Onaemo pu'uno ka Dotedoa melangkai Ira Ue Ala ka moweeako Ira nee i wawono luwuno nee,

¹⁰ ka dompenggolontu a nee-Do i Yesu luwuno anu mekongko i langi ka anu mekongko i wawontolino ka anu mekongko i totono tolino,

¹¹ ka luwuno elo memangaku, ”Ondaemo i Yesu Kerisituu Ue,” montonda maramba-Do Ue Ala, Ama!

Ime'anggaomo mpiha tekaduduiamiu 2:12-18

¹² Hei luwumiu pepaekompo anu pinehohawaku, mpomperorongeako komiu mpiha; onaemo pu'uno ime'anggaomo mpiha tekaduduiamiu saru medoito ka mpondende, komba butu kana i tempono da kukongko, sine laluaopo mbo'u kanandio-andio tempono nahi kukongko,

¹³ hangano Ondaemo Ue Ala anu umanggao i laromiu moiko po'ehe maupo anggaa montonda po'ehe-Do.

¹⁴ Imeweweuomo luwuakoano si mpewuruki ka mpegaga,

¹⁵ ka si hina tataamiu, gagi ana-Do Ue Ala anu nahina tataano i tonga-tongado mia anu memolengku aroado ka anu ntepopo'oo andio, ranta ka imemewanta i olodo kana luwuno anano wula i wawontolino,

¹⁶ saru mpe'ini a mpau tuwua, ka kupokompo'unde a oleo-Do i Kerisituu, nine komba nahina tuduno po'anggaku ka pe'iseiku.

¹⁷ Sine maupo ka i'inuwu reaku a mpesomba ka pesomba pompe'ala-alamiu, mawongko aroaku ka mawongko aroaku saru omiu luwu.

¹⁸ Ka omiu mbo'u asalakono memawongko kanandio ka imemawongkomo saru ongkue.

I Timotiu ka i Epaporoditu 2:19–3:1a

¹⁹ Sine momperorohi aku ndi Ondae Ue Yesu aku koa ronga tumenao i Timotiu aiwa ndi omiu, ka irodo koa aroaku hangano lele mongkona teweweumiu.

²⁰ Hangano nahina te'asa mia ndi ongkue, anu me'asa aroa ka pinewowolo saru ongkue ka anu merioo ntu'u moikoamiu;

²¹ hangano luwuno mpo'ungke moikoado ondaedo, komba moikoa-Do i Kerisituu Yesu.

²² Imento'orio nine petenununo tengkitaomo ka nine itulungi akumo a pompekakaakoa Lele Mawongkoa mengkena kana aasa ana tumulungio amano.

²³ Onaemo anu kuperorohio ronga tumenao, tewala kuto'oriomo ba kana'umpe kara-karaku;

²⁴ sine kupe'ala-alao ndi Ondae i Ue, nine maupo ongkue aku koa ronga aiwa.

²⁵ Kontongaano atuu kupementuduo tumenao i Epaporoditu aiwa ndi omiu, onaemo pepaekompoku ka pe'asa mpo'anggaku saru waliku meteakako, anu tinenamiu ka ipekakaakune a laro kinereku.

²⁶ Hangano tedoa tekewoi ndi omiu luwu ka masusa mbo'u aroano, hangano imerongeo nine onae mahaki.

²⁷ Lano mentee onae mahaki ka ilawu mate, sine Dopehohawao Ue Ala, ka komba butu onae, tendeano ongkue mbo'u, ka si koteti-tetiangino masusaku.

²⁸ Onaemo pu'uno ka kuronga tumenao aiwa, ka impokomemawongko mbo'u ba imengkitao, ka makura masusaku.

²⁹ Gaagi imentotowoomo a luwuno mawongkono aroa ndi Ondae i Ue ka impelangkai iramo mia kana onae.

³⁰ Nde hangano anggaa-Do i Kerisituu ilawupo imate ka ita'oo penaano mokosompoo hapa anu da makura a laro pompekakaakomiu ndi ongkue.