Penani Maramba 8 - Wunta Mempori

¹ O, ande-andeno omue pepaekompoku tama, anu mo'uo a wua radano ineku, aku woo-wooko ba kuhaweko i bungkuno, ka nahi ta hina mia tumetewehi aku!

² Aku tumaateko ka wawako a rahado ineku, onaemo anu paguru aku. Aku mpo'inuakomu anggoro anu mana mo'ahi, uwoino wua delimaku.

³ Kae manggalino kongko i totono uluku, kae ngkoanano kumopui aku.

⁴ Ku'emao ka impedandi, luwuno ana beine i Yerusale, tembio ka impokotesingkao ka mpokontensilao pompehohawa napi tempono ineheno?

Pompehohawa moroso kana matea 8:5-7

⁵ Isema atuu anu me'umbaako inso i pada one, anu mehonda a mpinehohawano? A ntoto keu apeli kuwanguko, i ra'aimo inemu mentiaakomu, i ra'aimo imentia ka me'anaakomu.

⁶ Naa akumo kana pontondoni a aroamu, kana pontondoni a ntokiamu, hangano pompehohawa moroso kana matea, po'eheno ngisi kana tolinodo mia mate, langano onaemo langano api, kana langano api-Do i Ue!

⁷ Uwoi anu hadio nahi pokompepateo pompehohawa, luwuno korono nahi polio molomoo. Maupo ipeweengakono mia luwuno arataa a rahano tiano pompehohawa, onae ta kongko tinetewehi.

Umbungkoroi beine ka uaino

⁸ Hinao uaimami asa beine anu napi hina wua radano. Hapake anu kimpoweweu a uai beinemami a oleo mpesikenoa?

⁹ Tewala onae rere watu, kami mpowangu menara salaka i wawono; tewala onae pewowa, kami mewalaakono polanso keu arasi.

¹⁰ Ongkue onaemo rere watu ka wua radaku kana menara. I tempo atuu a matano ongkue kana mia anu mohaweomo rodoa manangai.

Me'uraopo sekono i Solema 8:11-12

¹¹ I Solema hinao lere anggorono i Baala-Hamoni. Ipeweengakono lere anggoro atuu a puu mpodagai, singge mia moweeakono asa nsowu labano salaka inso a hasilino.

¹² Lere anggoroku, ongkueku me'ueo, kongko i aroku; tiamumo asa nsowu lempe salaka atuu, mokole Solema, ka rua etu tiado mia anu medagaio hasilino.

Orua umbungkoroi mesangki-sangki 8:13-14

¹³ Hei, omue anu mo'ia i lere, wali-wali mpekokoongakono suaramu, poporongeomo atuu ndi ongkue!

¹⁴ Pontuturakomo, pinehohawaku, gagimo kana lagiwa, ke kana anano rusa a wawo luwuno torukuno pinaho rampa-rampa.