Penani Maramba 7 - Wunta Mempori

¹ Tedoa momoiko pelempamu saru sandala atuu, ana beine anu moleo gauno! Lengkuno tongamu kana peramba-ramba, wineweuno kaeno mia pande moweweu anu alusu.

² Puhemu kana sangkiri anu bonggoli, anu nahi makuraako anggoro sinalo. Kompomu howuno gandu, mewalaako sisi-sisi bonse.

³ Kana orua ana rusa wua radamu, kana ana induano lagiwa.

⁴ We'umu kana menara tindu, matamu kana limbo i Hesiboni, umpeda Pewowa Langkai Batirabimi; engemu kana menara i Libano, anu me'aro i Damasi.

⁵ Ulumu kana pongku Karameli, wuumu a ulumu mororontaha; mokole te'onggo a piniu-piuno.

Mo'ahino mompehohawa 7:6–8:4

⁶ Tedoa tekosi, tedoako mompokosanaa, O pinehohawaku, saru luwuno anu mo'ahi.

⁷ Ondauno koroimu kana keu kuruma ka wua radamu tepumpuano wuano.

⁸ Kupotae, ”Aku mingki momaruo keu kuruma atuu ka uminio luwu tepumpuano wuano. Po'ineeomo wua radamu kana tepumpuano anggoro ka woono penaamu kana wua apeli.

⁹ Paumu mo'ahi kana anggoro!” Oo, anggoro atuu waa tetutu a mpinehohawaku mewaa ntededei a wiwido mia tekonai mpoturi!

¹⁰ Ongkuemo me'ueo pinehohawaku, po'eheno aroano te'aro ndi ongkue.

¹¹ Aiwa, pinehohawaku, tolako a tonga mpada, merato i sompo inia!

¹² Aiwa, tolako mo'o-mo'oru a lere anggoro ka kumitao keu anggoro ba mentumbaomo, ba tewileomo sisino, keu delima ba mensisiomo! I ra'aimo aku weeakomu pompehohawaku!

¹³ Wua dudaimi tewuha woono, ka umpeda pewowato hinao mperupa-rupa wua mo'ahi, anu da sarai maupo anu tehine, anu kunaakomumo, pinehohawaku!