Penani Maramba 6 - Wunta Mempori

¹ Isuamo ilako pinehohawamu, hei tekosi i olodo beine? Te'aro isuake ilako pinehohawamu, ka tome'ungkeo mperonga?

² Pinehohawaku metiiomo a lereno, a maluano lere rampa-rampa ta mompakambi bimba a lere ka mo'opu sisi bonse.

³ Ongkuemo me'ueo pinehohawaku, ka ongkue onae me'ueo, anu mompakambi bimba a ntonga-tongano sisi bonse.

Po'unde-undeno umbungkoroi tama a umbungkoroi beine 6:4–7:5

⁴ Omue tekosi, pinehohawaku, kana kota Tiresa, tekosi kana Yerusale, mongkokongiri kana sorodadu saru banderano.

⁵ Polimbaomo matamu inso ndi ongkue, hangano ongkue gagi bulalingo hangano onae. Wuumu kana bawaano bembe anu mpetuda-tuda mpetii inso i Gileadi.

⁶ Ngisimu kana bawaano bimba, anu mpeluarako inso mpowo'ohia, anu mpe'ana indua luwu, ka nahina anu nahi pe'ana.

⁷ Kana bansino wua delima nipi-nipimu i asambalino pesoumbumu.

⁸ Kombiado mokole hinao nomo pulu, samburue halu pulu, ka luwuno ana beine nahi pinokodoa hadiono.

⁹ Sine onaemo asa-asano marapatiku, linolaroku, asa-asano anano ineno, ana mpinehohawano anu me'anaakono. Domengkitao ana beine ka mpotaeakono me'ura, luwuno kombiado mokole ka luwuno samburue me'unde-undeo.

¹⁰ ”Isemake onae anu me'umbaako kana towea mewanta, tekosi kana wulantii, mewanta kana mata'oleo, mongkokongiri kana sorodadu saru banderano?”

¹¹ A lere kenari kupetii kumita ira tumba i lembono, kumitao keu anggoro ba mensumbo ka keu delima mensisi.

¹² Se'eluno nahi kupokonto'orio, tekewoiku numaa aku a wawo ngkaretado ulea mokole.

¹³ Pekulemo, pekulemo, o ana beine Sulami, pekulemo, pekulemo, ka kimpokokitako! Tembio ka imengkitao ana beine Sulami atuu kana mongkita po'ense-ense peteaa?