Penani Maramba 5 - Wunta Mempori

¹ Aiwa aku a lereku, uai, umbungkoroiku, kupumpuo mire ka rampa-rampaku, kukaano inenano hoani ka siu hoaniku, ku'inuo anggoroku ka susuku. Impongkaamo, wali-waliku, impo'inumo, impo'inumo ranta molanguako pompehohawa!

Tekewoino umbungkoroi beine

² Ongkue moturi, sine aroaku mewangu. Rongeomo, pinehohawaku motingko-tingko. ”Ungkahiomo tondo, uai, pinehohawaku, marapatiku, rinorondoku, hangano uluku buke tontoru, ka wuuku buke te'itino tontoru wongi!”

³ ”Lembaku kulohuomo, nde aku wali mokonao mbo'u? Karuku kuwo'ohiomo, nde aku wali mokomeregeo mbo'u?”

⁴ Pinehohawaku winsoo kaeno telalo a bolono tondo, mondendeomo aroaku.

⁵ Ongkue mewangu umungkahiakono pinehohawaku tondo, kaeku nte'i'iti mire; nte'i'iti uwoino mire wunga ntonisoku a mpe'iniano tondo.

⁶ Pinehohawaku ku'ungkahiakono tondo, sine pinehohawaku mewoliliomo, lumako. Kana malimpu aku mansano moliu. Ku'ungkeo, sine nahi kuhaweo, kupoboio, sine nahi sangkio.

⁷ Puu mpodagai anu mpelempa a laro ngkota mehawe aku, mentunduhi ka mebelai aku, salendaku domerontuo puu mpodagai rere watu.

⁸ Ku'emao ntu'u, ana beine i Yerusale: tewala imehaweo pinehohawaku, hapake komiu mpotae ndi onae? Imempauakono, nine ongkue mahaki tekewoi!

Po'unde-undeno umbungkoroi beine a umbungkoroi tama

⁹ Hapake polaluano pinehohawamu sekonopo pinehohawa susua, hei tekosi i olodo beine? Hapake polaluano pinehohawamu sekonopo pinehohawa susua, ranta ka utedoa umema kami kanatuu?

¹⁰ Mopute morina ka motaha mewanta pinehohawaku, tekongkaa i olodo asa lakasaa mia.

¹¹ Kana wulaa, wulaa mpena, uluno, wuuno nahi moleo, mo'ito kana paa-paa.

¹² Matano kana marapati a ngkeuno uwoi, medoloako susu, mentoro a limbo anu buke.

¹³ Kombisino kana maluano lere rampa-rampa, Pe'olo-olotino mana mo'ahi. Kana ira sisi bonse wiwino, nte'i'iti uwoino mire.

¹⁴ Tokiano bunggolino wulaa, meramba-rambaako paramata Tarasisi, koroino nggorino ntindu, pinorawoako lasuaradi.

¹⁵ Karuno maramere mopute, melanda a empehi wulaa mpena. Tadeno koroino kana Torukuno Libano, tebiniki kana ira keu arasi.

¹⁶ Luwuno pauno moiko luwu, luwuakoano ndi onae tekosi. Kanatuumo pinehohawaku, kanatuumo waliku, hei ana beine i Yerusale.