Penani Maramba 4 - Wunta Mempori

Po'unde-undeno umbungkoroi tama a umbungkoroi beine 4:1-15

¹ Omue tekosi ntu'u, pinehohawaku, tedoako tekosi! Kana marapati matamu i asambalino pesoumbumu. Wuumu kana bawaano bembe anu mpetuda-tuda mpetii inso a mentorukuno Gileadi.

² Ngisimu kana bawaano bimba anu da saraipo domengkineru anu mpeluarako inso a mpewo'ohia anu mpe'ana indua luwu, ka nahina anu nahi pe'ana.

³ Kana asa beri pita kirimisi wiwimu, ka tekosino ngangamu. Kombisimu kana bansino wua delima i asambalino soumbumu.

⁴ We'umu kana menarano i Daudi, winangu ponaapa parewa mpetea. Asa nsowu kanta tendoe ndi onae luwuno kantado puu mpetea.

⁵ Kana orua anano rusa wua radamu, kana ana induano lagiwa anu tekonai mongkuri ewo i tonga-tongano sisi bonse.

⁶ Se'eluno ipepuuri angi ngkiniwia ka eo-eo moliu, ineheku lumako a ntorukuno mire ka a pongku dupa.

⁷ Omue tekosi ntu'u, pinehohawaku, nahina tataamu.

⁸ Aiwamo ndi ongkue inso a ntorukuno Libano, umbungkoroiku, aiwamo ndi ongkue inso i torukuno Libano, petiimo inso a punsuno Amana, inso a punsuno Seniri, punsuno Heremoni, inso a aado singa, inso a mentorukuno po'iangado santiwali!

⁹ Omue mokompondendeo aroaku, uai, umbungkoroiku, omue mokompondendeo aroa asa mpiro mata, saru asa ntii oluti ramba-rambano we'umu.

¹⁰ Mo'ahi ntu'u pompehohawamu, uai, umbungkoroiku! Tedoaopo mo'ahi pompehohawamu sekono anggoro, ka tedoaopo mana mo'ahi woono lanamu sekonopo luwuno mina-mina.

¹¹ Wiwimu mompo'iti siu hoani mpena, umbungkoroiku, siu hoani ka susu kongko a ntoto elomu, ka woono sangkamu kana woono Torukuno Libano.

¹² Uai, umbungkoroiku, lere tetutuwiako omue, lere tetutuwi, ka mata uwoi tetondoni.

¹³ Luwuno tumbamu gagi lere keu delima saru wuano anu mo'ahi, bunga pasari ka narawasutu,

¹⁴ narawasutu ka kuni, padamalala ka keu mo'ahi saru mperupa-rupa keu dupa, mire ka gaharu, saru mperupa-rupa rampa anu tebiniki.

¹⁵ O, mata uwoi a lere, insoano uwoi tuwu, anu waa inso a Ntorukuno Libano!

Orua umbungkoroi mambe kuahako 4:16–5:1

¹⁶ Pewangumo, hei angi utara, ka aiwamo, hei angi selata, pepuurimo a laro lereku, ka itewuhalako woono rampa-rampano! Po'ineeomo pinehohawaku aiwa i lereno ka kumaano luwuno wua anu mo'ahi.