Penani Maramba 3 - Wunta Mempori

Rinorambeno ana beine mongkona huleno aroano 3:1-5

¹ A wawo dasaku tempono wongi ku'ungkeo huleno aroaku. Ku'ungkeo, sine nahi kuhaweo.

² Aku mingki mewangu ka tumanggolilio kota; a luwuno sala ka tanalapa ku'ungkeo, huleno aroaku. Ku'ungkeo, sine nahi kuhaweo.

³ Puu mpodagai anu tumanggolilio kota mehawe aku. ”Imengkitaoke huleno aroaku?”

⁴ Dasaraipo kubinta ira, kutepohaweakono huleno aroaku; ku'inio ka nahi kupotolao, ranta kuwawao a rahado ineku, a bolongkono mia anu me'anaakune.

⁵ Ku'emao ntu'u, luwuno ana beine i Yerusale, hangano luwuno lagiwa ke hangano luwuno rusa waino anu mo'ila: si mpokontesingkao ka meleluo pompehohawa se'eluno napi ineheno!

Meronga-ronga a mpetaoa 3:6-11

⁶ Isemake atuu anu me'umbaako inso i pada one kana pebotono ahu api tetutuwiako mana mo'ahino mire ka dupa inso a mperupa-rupa awuno anu mana mo'ahi pinebalu-baluako?

⁷ Kitao, onaemo atuu selaano i Solema, domelimbuo nomo pulu puu mpetea inso i olono puu mpeteado to Isaraeli.

⁸ Luwuno mowawa ponai, tepaguru a laro mpeteaa, singge mia saru ponai a puu mpa'ano hangano wongi mongkokongiri.

⁹ Mokole Solema moweweu selaano inso a ngkeu Libano.

¹⁰ Luwuno karuno wineweu inso a nsalaka, pehondaano inso a wulaa, pentoroano mewungo, i larono domeramba-rambaakono pompehohawa luwuno ana beine i Yerusale,

¹¹ luwuno ana beine Sioni, peluarakomo ka kitaomo mokole Solema saru ramba-ramba uluno anu ipokonaakono ineno a oleo petaoano, a oleo mawongkoano aroano.